ӦӦН ПӦГІН - ЧОННЫҢ ЧУРТАЗЫН ЧАХСЫЛАНДЫРАРЫ
01.03.2019
Хабарлар
100 кӱн - тоғыста. Хакасияның пазы Валентин Олегович Коновалов регионның устағӌызына табылғаннаң 100 кӱн иртіп парды. Кибір хоостыра пу тусха тоғыстың пастағы салтарлары кӧрілче.
ИРТКЕН ЧЫЛДА ТАБЫҒ КАМПАНИЯЗЫ УҒАА ӰР ПАРҒАН. ВАЛЕНТИН КОНОВАЛОВ ПАСТАҒЫ ТУРДОХ ЧИҢІС ТУТХАН. АНАҢ ИЗЕРЕ ТАБЫҒЛАРДАҢ ВИКТОР ЗИМИН, АНДРЕЙ ФИЛЯГИН ПАЗА АЛЕКСАНДР МЯХАР СУУРЫНЫБЫСХАННАР. ІДӦК ГУБЕРНАТОР ПОЛЫБЫЗАРҒА ТИМДЕЗІНЕҢЕР ХАКАСИЯ ПАЗЫНЫҢ ТОҒЫЗЫН УР НИМЕСКЕ ТОЛДЫРҒАН МИХАИЛ РАЗВОЖАЕВ ИСКІРГЕН. ЧЕ РЕГИОН ЧУРТАҒӋЫЛАРЫ ВАЛЕНТИН КОНОВАЛОВТЫ ТАЛЛАП АЛҒАННАР.
ТАБЫҒЛАР 11 НОЯБРЬДА ИРТІП ПАРҒАНДА, УС КУН АРАЗЫНА ОН АЗЫРА МИНИСТР ПАЗА ПӦЗІК ЧИНОВНИК ТОҒЫЗЫНАҢ ПА-РЫБЫСХАН. ПІРЕЕЗІ НАА УСТАҒӋАА КИРЕКТЕРІН ДЕЕ ПИРБИН ПАРЫБЫСХАН. РЕГИОННЫҢ НАА ПАЗЫНА НИМЕ ХАЛҒАН?
СИБИРЬДЕГІ РЕГИОННАР АРАЗЫНДА ХЫСХАА ТИМНЕНІСЧЕ ХАЛҒАНӋЫ ОРЫН. ИНАУГУРАЦИЯ КУНІНДЕ, 15 НОЯБРЬДА АЛЫЛҒАН, ПІР ДЕЕ НИМЕЕ ТӦСТЕНМИН, КӦДІРІЛГЕН «СӦП-САП ТАРИФТЕРІ». ЭНЕРГЕТИКТЕРГЕ УЛУҒ АЛЫМНАР. БЮДЖЕТКЕ АХЧА ЧИДІСПИНЧЕТКЕНІ. ЧАХСЫ ТОЛДЫРЫЛБААН ПУДІРІГЛЕР. ІДИ ХАКАСИЯНЫҢ ПРОКУРАТУРАЗЫ ТАБЫҒЛАР СООНДОХ ИЛЕЕДЕ ЧИТПЕСТЕРНЕҢ ПУДІРІЛГЕН ПЕРИНАТАЛЬНАЙ ПАЗА МУЗЕЙ-КУЛЬТУРА КІННЕРІН ЧАБЫЗАРҒА ХЫСХАН.
АМДЫ ТОҒЫН САЛҒАН 100 КУННІҢ САЛТАРЛАРЫНАҢАР СУРЫҒЛАРҒА ХАКАСИЯНЫҢ ПАЗЫ ВАЛЕНТИН КОНОВАЛОВ НАНДЫРЧА.
- Валентин Олегович, кӧні чоохтаза, олаңай ла нимес киректер хала парған.
- Мин, табығларға парчадып, республикада киректер уғаа аар полчатханын чахсы оңарғам. Иң сидік киректер ЖКХ сферазында. Пірсі пірсінін соонҷа саайлар салтарлары тӱзеділген, че чылығ пирҷең тус узарадылча, ам ол тоозыл парир. Ниме дее полза, пістің команда ниме пар, аннаң тоғынча. Ӱлгӱ алысхан даа полза, тоғыс тудығ чох апарылча.
- Правительство тӧстел парды ба?
- Правительство прай даа тӧстел парды. Піс правительствоның наа, улуғ нимес пӱдізін чарат салғабыс. Пастағы орынҷы - Андрей Серафимович Асочаков, Ӧӧркі Чӧптің депутады, Хакасияда аны прайзы чахсы пілче, аарласнаң тузаланча. Пасха даа орынңылар турғызылған. Полған на должностьха кізіні турғысчатса, мин кем хайдағ тоғысты апар поларын чахсы кӧргем.
Че хайди табығлар алнындағы кампанияда молӌағ пирілген, азых марығ иртірілген, чӱзерлеп чоохтазығ апарылған. Ӱлгӱ азых поларға кирек. Аннаңар иргі командадаң нинӌе-де кізі халған. Кӧзідімге, ӱгредіг министрі Лариса Гимазутина, хазых хайраллаӌаң министр Владимир Костюш. Наа кізілер кӧп. Кӧзідімге, культура министрі Леонид Ерёмин. Ол позының киреенде уғаа чахсы профессионал.
- Пілдістіг, команда тӧстел парды. Че регионның тилізі регион ӱлгӱлерінең не палғалыстығ нимес, ол федеральнай кіннең палғалыстығ. Москванаң палғалыс тудар тоғыс хайди парча?
- Хазна президентінің кӧрізі - регионнаң хайдағ даа партияның кізізі устапчатханынаң палғалыстырбин, прай регионнарға полызарға. Андағ сағыс пресс-конференцияда искірілген, хайда президентке сурығны «Хакасия» газетаның журнализі пирген. Позының андағ кӧрізін Владимир Владимирович декабрьдағы тоғазығда тыытхан, хайдар мині паза, чыл тоозылчатханда, табылған губернаторларны хығыртып алған. Ӧӧні мында - ол кӧріс бюджетке киріл парған. 2019 чылда регионның бюджедінзер ахча федеральнай кіннең 2018 чылдағызынаң кӧп кірер. Ідӧк ирткен 100 кӱнде мин президенттің Сибирьдегі полномочиеліг кізізі Сергей Меняйлонаң, ӱгредіг министрі Ольга Васильеванаң, транспорт министрі Евгений Дитрихнең тоғасхам. Федеральнай кіннең тоғыс апарӌаң чахсы палғалыстар тудылча. Хада-пірге тоғынар планнар, проекттер пар, олар чуртасха кирілерлер.
- Валентин Олегович, федеральнай кіннең сидіксіністер чохта, ноға федеральнай СМИ-лар Сірерні критикаа тартчалар?
- Федеральнай кін - ол президент паза правительство, нандырығлығ министерстволар. Хакасия национальнай проекттерде араласчатханы хоостыра піссер хайди хайчатханнарын мин кӧрчем. Халғанӌы айларда кӧп чӧптезіг иділген, хайзыларынӌа пістің регион миллиардтар ахча алар. СМИ-лардағы критиканы алза, хайдағ-да тус пазынаң, пір алай ікі ай иртіп парза, хаӌан ниме-де ӱзӱрерге чарир, че табығлар ирткен кӱннең сығара ол пасталғаны мині таңнатхан. Ноға іди полча? Сентябрьда хазнаның пірее регионнарында губернаторлар табығлары иртерге кирек полған. «Единая Россияның» политтехнологтарына оппозицияның кізілері постарының тоғызын чахсы толдыр полбинчатханын табығӌыларға кӧзіт пирерге кирек полған. Анзын мин чахсы пілчем. КПРФ-таң паза ЛДПР-даң табылған Иркутск паза Владимир областьтарының, Хабаровск крайының губернаторлары ідӧк аймах искірігліг атакаларға, кӧні сӧклестерге урунғаннар. Сыннаң кирек іди парған. Пістің республикадаңар чоохтаза, андағ атакаларны Зиминнің командазында полған кізілер апарғаннар. Аның тузында олар чырғап чуртааннар, ам андағ чуртас чох халғаннар. Виктор Михайлович ам РЖД устағӌызының орынӌызы полыбысханын мин пілчем, ағаа оң ползын на тиирге чарир.
- Республикада политика саринаң киректерні пӱкӱлее хайди паалирӌыхсар?
- Хакасияда прайзына тӧӧй нимес парламент. Ӧӧркі Чӧпте читі партияның кізілері араласча.
- Анаң хайди олар пір чӧпке килчелер? Постарының на аразында нимес, ідӧк правительствонаң?
- Ӧӧн сурығларға депутаттар паза правительство пір чӧпке килер оңдай таапчалар. Анзы уғаа чахсы. Ікінӌі хығырығ алнында мин бюджетке илееде тӱзедіг киргем. Хайди сірер кӧргезер, олар прайзы алыл парған, пірдеезі тоғыр полбаан. Мин Ӧӧркі Чӧп депутаттарына хабазығ ӱчӱн алғызым читірчем. Пасха даа кирек сурығларӌа піс пілізізіп тоғынчабыс. Пар пӧгіннер, хайзыларын прай политика кӱстері чарадарға киректер, кӧзідімге, олох сӧп-сап реформазы. Ниме дее полза, піске ӧӧні - Хакасия, аның чуртағӌылары.
СӦС СОО: мынаң мындар материалларны толдыразынаң хығырарға сағынчатхан улусха, газетаның PDF-кӧрiмiне чарым чылға пазынарға чарир полған на наа айда. Сағам 2019 чылның март-август айларына пазын саларға чарир 200-ле салковайға.
Автор :
"Хабар"
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде