ӦӦН ПӦГІН - ХАКАСИЯДАҒЫ ХООС ЛИТЕРАТУРАНЫ ТИЛІДЕРІ
18.12.2019
Хабарлар
Культура. 13 декабрьда Чайаачылар туразында пӱӱл пайрамнығ тӧреен кӱннерін таныхтапчатхан писательлерні аарлааннар паза учреждениенің 10 чылын ӱлӱкӱннееннер
Чайаачылар туразы Хакасияның иң чиит культура учреждениелерінің санына кірче тізе, саба полбас. Ол 2009 чылда августта тӧстелген. Аның ӧӧн пӧгіні - Хакасиядағы хоос литератураны тилідері.
Учреждениенің пастағы директоры полған Илья Топоевтің таниинаң, 2000 чылларның ортызында Писательлер пірігізінің орындағы пӧлиинде сағыбаан сидіксіністер пасталыбысхан. Ағбанның устағ-пастаа пірігіс орныхчатхан чуртты пылас сыххан. Ағаа хоза, закон хоостыра Хакасияның культура министерствозына ахчалығ полызығ идерге чарадылбиныбысхан. Прай ахчаны пірігіс позы тоғынарға кирек полған. Хайди полчаң? Андада культура министрі полған Светлана Окольникованаң чӧптескен соонда, республикада Чайаачылар туразын тӧстирге чарадығ алылған. «Пу сағысты чуртасха кирбеен ползабыс, амға теере Писательлер пірігізі чох таа пол парарҷых, неке», - чоохтапча Илья Прокопьевич.
Чуртты ал халып (2010 чылда аны муниципалитет учреждениее саңайға пирібіскен), Чайаачылар туразы аймах проекттер чуртасха кир сыххан. Чыл тооза учреждение семинарлар, литература курстарын, мастер-класстар, лабораториялар иртірче. Марығлардаң хайди даа «Таланттарның тигір хурын» таныхтирға кирек. Анда устарынаң чиит авторлар сынасчалар. Чиңісчілернің чайаачы тоғыстары алынҷа чыындыда сыхчалар. Ағаа хоза артыхтарның артығына литература лагерьінде аралазар оңдай пар. Пу кибір 2014 чылда салылған. Пастағы туста лагерь республика синінде иртчең полза, 2017 чылдаң анда Хакасияның на нимес, Сибирь регионнарының чииттері араласчалар. Кӧзідімге, пӱӱл хакас писательлернің устаанынаң пастағызын на якут студенттер устарын таптааннар.
Драматургтарға иртірілчеткен лабораторияларны алынҷа таныхтирға кирек. 2018 чылда апрельде Чайаачылар туразы, Россияның театр деятельлері пірігізінің орындағы пӧлиинен хада-пірге тоғынып, «Хакасиядағы драматургтарның лабораториязын» иртірген. Алында пис ай авторлар пьесаларынаң таныстырғаннар. Салтарында режиссерлар 11 чайаачы тоғыс пастыра эскизтер турғызыбысханнар. Оларның ікізі - Фарит Загидулиннің «Максты ӧдірібізерге» паза Наталья Семенникованың «Тимір чол-табырға» - амды Орыс паза Хакас драма театрларының репертуарларына кірче. Пӱӱл лабораториялар тоғызы узарадылған. «Ах иб» театр фестивальы тузында критиктер орындағы сигіс драматургтың пьесаларын ӱзӱргеннер.
Чыл сай Чайаачылар туразы пайрамын таныхтапчатхан писательлернің кинделерін сығарарға кӱстенче. 2009 чылдаң пасти М.Е.Кильчичаковтың «Таллама лирика», М.Р. Баиновтың «Ӧскей ах хазыңа пӱрлер», А.Д.Козловскийнің «Орама городча пас чӧрген», В.Г.Майнашевтің «Кӱмӱс тӱстер» паза пасхазының тоғыстары чарыхха сыхханнар.
2016 чылдаң учреждениенең Надежда Бурнакова устапча. Аннаң хада ӧмеде сигіс кізі істенче. Пӱӱл Хакасияда Писательлер чылы чарлалғанда, тоғынҷыларға аар чӱк артылған. Чыл ибіре иртірілчеткен мероприятиелерге ікі улуғ пайрам хозылған: драматург Михаил Кильчичаковтың 100 чазы паза Писательлер пірігізінің 70 чылы. Чайаачылар туразы Н.Г.Доможаковтың адынаң библиотеканаң паза Хакас драма театрынаң хада прай мероприятиелерні пӧзік синде иртірібіскеннер. Анзын пайрамнарға Сибирь регионнарынаң килген писательлернің паза литератураа хынчатхан улустың ӱндезіглері киречілееннер.
13 декабрьда учреждениенің ӧмезі, аалҷыларны чыып, кибірліг «Пайрамнығ романны» иртірген паза Чайаачылар туразының 10 чылын таныхтаан. «Пайрамнығ романның» ӧӧн пӧгіні - тоғылах частарын таныхтапчатхан чайаачыларны аарлиры. Кибір хоостыра полған на усты сценаа хызыл кибісче сығарып, сыйых читірілген. Оларның санында Валентина Шулбаева, Илья Топоев, Анатолий Султреков, Юрий Черчинский полғаннар.
Чайаачылар туразының пайрамынаңар чоохтаза, ӧмедегілер учреждениеде тоғынған прай кізілерні, танығлығ мероприятиее хығырып, сыйыхтааннар. Мында директор Надежда Бурнакованы махтирға кирек. 2009 чылдаң Чайаачылар туразында илееде чон істентір, оларны тілеп, пічіктерде илееде тус хасхланарға киліскен полбас па. Аарлығ аалҷыларның санында Хакасияның культура министрінің орынҷызы Ирина Браим, С.П.Кадышевтің адынаң культура кінінің директоры Анна Шаламова, Н.Г.Доможаковтың адынаң библиотеканың устағҷызы Юлия Костякова полғаннар. Олар Чайаачылар туразына мыннаң мындар тӱзімніг тоғынарға, наа чидіглерге чидерге алғааннар. Чалахай иир тузында улуғ нимес концерт полған. Чыылған чонны чайаачызынаң Ирина Кулагашеванаң Александр Кобежиков ӧріндіргеннер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде