ДРАМА ТЕАТРЫНЫҢ ТУРАЗЫ НААӋЫЛАЛЧА
28.01.2020
Хабарлар
Культура. Хакасия пазы Валентин Коновалов драма театрында тыхтағ тоғыстары хайди парчатханын сыныхтаан
Наа чыл соонда драма театры тиксі тыхтағ тоғыстарына чабыл парған. Амды сценада актерларның орнына пӱдірігҷілер хайынчалар. Республика пазы Валентин Коновалов, тыхтағ хайдағ синде парчатханын сыныхтап, пу кӱннерде пӱдіріг объектінде пол килген.
Театрҷа экскурсияны республиканың пӱдіріг паза чурт-коммунальнай хоных министрі Сергей Новиков иртірген. Пастап ол Валентин Олеговичті тыхтағ тоғыстарының планынаң таныстырған.
Орыс паза Хакас драма театрларына ойыннар кӧзідерге оңдай пиріп, прай тоғыстарны чардыхти идерге киліскен.
Алында пӱдірігҷілер фойені, кірлесті, хырның чамдығын тыхтабысхан ползалар, пӱӱл олар ӧӧн сценаны, улуғ паза кічіг залларны, производство корпузын нааҷылабызарға киректер. Подрядчик «Театр-техника корпорациязы» ООО полча.
2020 чылда тыхтағ пис кӱнге орай пасталтыр, че пӱдірігҷілер ікі неделя аразына кӧріл парған графикке чидіп аларлар тіп молҷаан осхастар. Августта прай тоғыстар иділ парарға киректер. Амғы туста объектте 80 кізі істенче. Ахчадаңар чоохтаза, тыхтағ тоғыстарына 479 артиинаң миллион салковай кӧріл парған. Ӧӧн чардығы федеральнай бюджеттең кірген. Олардаң 180 миллион артиинаң салковай суулас, чарытхы оборудованиезін аларына парыбыстыр.
Наа оборудование - культура министрі Леонид Ерёминнің ӧӧн ӧрінізі паза поғдархазы. Хайди таныхтаан Леонид Валентинович, амды театрлар кӧрігҷілерні уламох чапсыдарлар. Тыхтағ соонаң режиссерларның сценаны аймах оңдайнаң алыстырар оңдай полар. Че Хакасияда наа оборудованиенең тузалан полчатхан специалисттер чох полтыр, аннаңар культура министерствозы кізілерні ӱгредерге ызар.
Хакасия пазы Валентин Коноваловха пӱдіріг парчатхан площадкаларны кӧзіткеннер. Ӧӧн сценаның кӧзеңелерін суурыбысханда, ол саңай пасхаҷыл кӧрінчеттір. Потологы чи хайдағ пӧзік. Кічіг залда тыхтағ 2019 чылның октябрьынаң парча. Анда одырҷыхтар саны хозыл парар. Производство корпузын пӱдірігҷілер мартта тимге сығарыбызарға пӧгінчелер. Объектті кӧріп алған соонда Валентин Олегович
министрлерге тыхтағ тоғыстарын хатығ сыныхтағда тударға чахығ пирген.
Драма театрының туразы тыхтаға чабыл парған даа полза, чайаачы ӧмелер кӧрігҷілерні наа ойыннарнаң ӧріндірерге тимненчелер. Орыс драма театры «Чиңіс» культура туразында 30 январьда 18.30 часта «Ганди субботаларда чоохтаспаҷаң» спектакльны (18+) кӧзідер. Аның премьеразы тынағ кӱннерінде иртті. Ӧӧн матыр - саарбах Мот. Пабазы сӧбіредең парыбысханда, Моттың чуртазы алыс парча. Ойында хырызыныстар кӧп, че анзы ӧӧн сағысты читірерге полысча.
Хакас драма театрының ӧмезі 12 февральда Ағбанда Тимірчолҷылар культура туразында 10.30 паза 12.30 часта «Буратино» нымахты (3+), 18.30 часта, тізең, «Женитьба» кӱлкістіг ойынны (12+) кӧзідер. Мартта театрда «Филумена Мартурано» спектакльның премьеразы иртер, апрельде - «Лекарь поневоле» ойынның. Халғанҷы спектакльны Мольернің пьесазынҷа режиссер Юрий Майнагашев турғысча. Юрий Матвеевич ойынны орыс паза хакас тіллерінең чайирға пӧгінче. Ідӧк театрның репертуарын «Сабир паза Сабира» ойын пайыдар. Пьесаның авторы - Илья Топоев. Афишаларны театрларның сайттарында паза социальнай сетьтердегі страницаларында кӧріп аларға чарир.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде