ЧИИТТЕРНІҢ САҒЫСТАРЫ ТОЛЗЫН
31.07.2019
Хабарлар
Пӱӱл регионнар аразындағы «Этнова-2019. Чылығ Сибирь» чииттернің форумы 9-ҷы хати ізиин ӧткін оол-хыстарға асты. Форум ікі сменаа чарыл парған: 1-ғы сменада 18 - 22 частығ чииттер араласханнар, 2-ӌі сменазында, тізең, 22 - 35 частығлар. Тоғынчатхан оол-хыстарға читі площадкада устарын тилідерге паза сағыстарынаң ӱлезерге оңдай пирілче.
9-ҷы форумда «Сбербанк», «РЖД», «МФЦ» предприятиелернің, «Чиит ӱгретчілер», «Россияның ӱгренҷілер чӧрімінің кураторлары» пірігістернің чииттері араласчалар. Тиксі 100-ке чағын кізі.
Ікінҷі смена пайрамни азылған соонаң, чииттернең Хакасияның пазы Валентин Коновалов чоох алысхан. Оол-хыстар ағаа аймах сурығлар пиргеннер: сӧбіредеңер, политикадаңар, экологиядаңар, наукадаңар. РЖД-ның чиит тоғынҷылары Валентин Коноваловтаң хайди ол пос тузын иртірчеткеннеңер сурғаннар. Хакасия пазы, сурыға нандырчатханда, амды аның андағ тус асхынах полча теен. Че, андағ даа полза, оңдай ползох, ол сӧбірезінең тынанарға кӱстенче. Чоохтирға кирек, сӧбірее теелчеткен сурығ кӧп полған.
Анзы араласчылар постары сӧбіреліг полчатханынаң палғалыстығ полар тіп сағын салғам. Чииттернең чоохтасчатханда, Валентин Коновалов форумның араласчыларына ідӧк аймах сурығлар пирген. Оларның пірсі Хакасиядағы туризмге теелген. Чииттер, сурыға нандырып, ӧӧнінде сидіксіністердеңер ле чоохтааннар. Оол-хыстарның таниинаң, пістің хазнада чуртапчатханнарға, Россияның аймах пулуңнарында тынанып алар ӱчӱн, кӧп сидіксіністерні тобырарға килісче. Олар пістің хазнада чоллар хомай, чайғызын билеттер паазы уғаа аарлығ пол парча тіп хомзынғаннар. Хакасияның пазы ол сӧстернең чарасхан, Хакасияның правительствозы туризмҷе, экономикаҷа стратегия планы тимнелче тіп киртіндірген. Чоохтирға кирек, «Этнова-2019. Чылығ Сибирь» чииттер форумында туризмнеңер кӧп сурығ ӱзӱрілче. Ізенчебіс, соонаң олар пістің чир-суубысха тӱзімніг поларлар.
Хакас чииттернің «Асхыр» пірігізінің араласчызы Виктор Шульбереков Валентин Коноваловха «Кочевниктернің ӱні» марығдаңар чоохтап пирген. Ӧткін хакас оол килер чылда марығны алғым арах иртірерге пӧгінчебіс тіп таныхтаан. Аның кӧрізінең, марығ, ӱсче кӱн фестиваль оңдайынаң иртсе, республикаа туза ағылар. Фестиваль Хакасиязар туристтерні хоза тартар тіп санапча ол. Чоохтирға кирек, «Кочевниктернің ӱні» марығны «Асхыр» пос кӱзінең паза спонсорлар полызиинаң иртірче. Викторның чооғын истіп, пу сурығҷа алынҷа тоғазығ иртірерге кирек тіп айланған оолзар Хакасияның пазы.
«Чиит ученайлар чӧбі» площадканың араласчызы Елена Тиникова Хакасия пазына кӧп сурығ пирген. Сизінгенде, чиит хысты кӧп ниме сағыссыратча. Аның сурығлары туризмге, наукаа, экономикаа теелгеннер. Оларның пірсі «Кимдегі Сибирь» проектке чарыдылған. Аның кӧрізінең, экономика науканаң пик палғалыстығ. Аннаңар пӱӱл оларның площадказы Сибирьдегі городтарны істезерге пӧгінче.
Елена ікінҷі чылы «Этнова» форумда араласча. Аның чооғынаң, пӱӱл «Чиит учёнайлар» площадкада тӧрт регионнаң сигіс оол-хыс араласча. Ирткен чылда чиит ученайлар ӱс проект тимнеп салғаннар тіп таныхтаан ол.
Елена - уғаа ачых-чарых хыс. Ол студент полғандох наукаа тартыл сыххан. Ӱгредиин тоосханда, ол аспирантуразар кірібіскен. Соонаң студенттерні ӱгреткен. Амды Елена Тиникова ХакНИИЯЛИ-да істен парча паза Чиит ученайлар чӧбінің кнезі полча. Науканаң айғазып, ол ідӧк аймах форумнарда, марығларда араласча.
Республика пазы чиит улуснаң чоохтазығны тоосчатханда, прайзынаң хайдағ чазыт сағыс тол парарына тың ӧрінерҷіксер тіп сурған. Чыылған улус, хатхырыбызып, пір ӱннең тӧбін синніг ипотекалар тіп нандырған. Андағ нандырығ Валентин Олеговичті хайхатхан. Анаң ол сыннаң даа полғаны ла пос чуртынаңар сағынча тіп таныхтаан. Парар алнында, ол стенедегі чаҷында чииттерге «Сағынған сағыстарың толзын» тіп алғазын пас салған.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 1 |
Кӱн таңмазы
Хакасияда
Россияда
Тилекейде