2021 чыл Хакас кип-чооғы чылы полар
29.12.2020
Хабарлар
Мындағ чарлағ идiбiскен Хакасия пазы Валентин Коновалов 29 декабрьда ирткен правительствоның пӱӱлгi халғанӌы чыылиинда. Хайди ол чарытхан, Хакасияның культура, ӱгредiг паза наука, национальнай паза территориальнай политика министерстволарынаң хада мындағ чарадығ хакас чонның культуразын хайраллир паза чайаачызын тилiдер пöгiннең алылған.
- Хакас кип-чооғынаң палғалыстығ мероприятиелернi пуох министерстволар иртiрерлер. Че мин муниципальнай пӱдiстер оларға прай саринаң полыссыннар тiп чахығ пирчем, - теен Валентин Олегович.
Паза пу чыылығда республика устағӌызына Россия президентiнiң Сибирьдегi федеральнай округча полномоченнай кiзiзi аппарадының республикаӌа федеральнай инспекторы Николай Сайбараков Россия президентiнiң алғыстас пiчиин читiрген. Аны ол Россияның хазна чöбiн тöстеенiне паза аны тилiдерiне хозым итчеткен ӱчӱн алған.
- Мындағ пöзiк паалағ пирген ӱчӱн улуғ алғыс. Че иң пурнада мин тиксi правительствоны, полған на министрнi, ведомство устағӌызын, специализiн алғыстирға сағынчам. Мыннаң мындар пiдöк ле чахсы тоғынарына iзенчем. Турғызылған пöгiннер уғаа кöп нооза, - алғыстаан Валентин Олегович. Iдöк ол республиканың чуртағӌыларын чағдапчатхан Наа чылнаң алғыстаан, прайзына часка паза хазых алғаан.
Правительствоның чыылиинда ööн сурығлар iдöк Наа чыл ӱлӱкӱннерiнең палғалыстығ полғаннар. Хакасия пазының орынӌызы Юрий Курлаев ӱлӱкӱннернi öрт сых парарынаң хорғыс чох иртiрерiне тимненiстеңер чоохтап пирген. Чон амырын хайраллаӌаң служба-ведомстволар хараа-кӱнöрте хадағда поларға тимделер теен ол. Хайди алнында искiрiлген полған, пандемия ӱчӱн чон кöп чыылысчаң пайрам-ӱлӱкӱннер иртiрiлбестер. Ӱлгӱдегiлер Наа чылны сöбiренең не удурлирға чöп пирчелер.
Автор :
Александра Карамчакова
Кӱн таңмазы
Хакасияда
Россияда
Тилекейде