ОЛАРНЫҢ СЫЛТААНДА ААЛЛАР ЧУРТАПЧА
08.10.2021
Хабарлар
10 октябрьда - Аал хонии тоғынҷызы кӱні. Пу кӱнге чарыдып, кресен-фермер хонии пазы Валерий Кольчиковнаң, тоғазып, чоох алысхабыс
Полған на кізі фермер пол полбас, маллар тудары паза ӧзімнер ӧскірері кӧп кӱс кирексіпче. Пірее туста ол парыс пирбинче. Пу тоғыста сыдамахтығ, кӱстенҷік поларға кирек. Андағларның санына Асхыс аймаандағы Индіркі Тӧӧ аалда чуртапчатхан Кольчиковтар сӧбірезі кірче. 2017 чылда тӧстелген кресен-фермер хониинаң маңнаныстығ устапча Валерий Кольчиков. Пу аар тоғыста ағаа пабазы паза тайызы чахсы хабасчалар.
Валерий Индіркі Тӧӧ аалда от айының 16-i кӱнінде 1991 чылда тӧреен. Сӧбіреде ол чалғыс пала. Пабазы Геннадий Константинович мал имҷізі полып тоғынған. Іҷезі Татьяна Павловна, Топоевтер хызы, орындағы имнег туразында санитарка полып істенче. Школада ӱгренчеткенде, Валерий аймах спорт кӧрімнерінең айғасхан. Футбол секциязында ол тренер Виктор Еремеевич Боргояковтың холында тимненген. Аннаң пасха волейболнаң паза стол теннизінең айғасхан. Пу спорт кӧрімнерінҷе аны Артур Николаевич Субраков ӱгреткен. Спорт чидіглері чиит оолның чахсы полған. Индіркі Тӧӧдегі школаның волейбол командазы 2006 чылда аймах синіндегі марыға сыххан. Анда хазыр кӱрезіглерде индіркі тӧӧдегілер ӱзінҷі орынға турысханнар.
2009 чылда, школа тоозып, Валерий Кольчиков Ағбанзар чол тутхан, 1№ лицейзер электромонтажникке ӱгренерге кірібіскен. Че ӱгредіг заведениезін ағаа тоозарға киліспеен. Анаң чиит оол армияа хығыртылған. Чааҷы службазын 2010-2011 чылларда Приморскай крайда разведкада апарған.
- Служба тузында Россия паза Хыдат аразындағы кии хырығларын хадарғабыс. Разведчиктер самолеттарның радио палғалыстарын тутчаңнар. Че мин ол кирекнең айғаспаам, хадағ-да турғам, - чоохтапча Валерий.
Ибзер Валерий Кольчиков 2011 чылда рядовой званиеліг айланған. Армия соонаң чиит оол паба-іҷезіне малларны ӧскірерге полыс сыххан. Кічігдең сығара пу тоғыснаң айғасхан кізее анзы чағын полған. 2015 чылда ол кресен-фермер хониин тӧстеен, азығ айында пос киреен санға турғыс салған. Ол туста Кольчиковтар сӧбірезінің пір трактор, от сапчаң тиріг паза трактор тырбос полған.
Олох чылда Валерий Кольчиков, чиит фермер полып, грантха пічіктер тимнеен, хонҷыхтарының пай чирлерін садыс сыххан. Оларны кадастр органында посха пазып алған. Мында ағаа хада хонғаны Надежда чахсы полыс пирген. Бухгалтер специальностьтығ кізі кирек пічіктерні прай орта тимнебіскен. Іди хазна сӧбірее 1 миллион 275 муң салковай грант пирген.
Анзы наа ла тоғынып пастапчатхан фермерге чахсы хабазығ полған. Валерий Кольчиков ол ахчаа хоза трактор паза маллар алып алған. Іди фермер 57 пас герефорд породалығ інекті ӧскіріп пастаан. Че пастағы чылдох ағаа сидік чуххан. Чайғы хуруғ полғаннаңар, мал азии сығызы уйан полған. Аннаңар Валерий Кольчиков ӱзінҷі чылы пуғдай, сула ӧскірче. Тоңастығларны чыырға сӧбіре складты арендаа алча.
- Тиксі алза, пір гектардаң ортымахти 20 центнер сула сыххан. Кӱннер хомай турчатханнаңар, пуғдайны ам даа читіре саппадыбыс. 2018 чылда тоңастығлар иң чахсы сыхханнар, ол чылда пір гектардаң ортымахти 20 артиинаң центнер сых парған, - чоохтапча Валерий Кольчиков. - Хыра тоғызынаң ӱзӧлең, пабамнаң паза тайымнаң, айғасчабыс.
Пӱӱл Кольчиковтар сӧбірезі грант ахчазынаң толдыразынаң тузаланыбызар. Амды фермернің тӧрт трактор, комбайн паза тракторға кирек тиріглер пар. Тузаланчатхан чирнің улии 86 гектарға тиңнелче. Анзы тоңастығларны чахсы ӧскіріп аларға оңдай пирче. Фермер оларны 55 гектарда ӧскірче. Валерий Кольчиков тоңастығларны прай Асхыс аймаанха таратча. Аннаң пасха, аймах чуртағхылары олардаң сызыр садызып алчалар. Халған чирін Кольчиковтар покосха позытханнар, анда кӧп чыллығ от одырт салғаннар. Пазағы чылда аны пазох одыртарға киректелер.
Чииттер, городсар парбин, аалда азахха турчатханы ӧріндірче. Кольчиковтар осхас кӱлӱк, кӱстенҷік кізілер сылтаанда аалда чуртас ӱзілбинче.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде