СЪЕЗД РЕЗОЛЮЦИЯЗЫН ЧУРТАСХА КИРЕРГЕ
02.07.2021
Хабарлар
Чыылығ. Хакасия пазы Валентин Коновалов паза Улуғлар чӧбінің кнезі Пётр Воронин хакас чонның XIV сьездінің резолюциязын чуртасха кирерін ӱзӱргеннер
Хакасия правительствозында республика пазы Валентин Коноваловтың устаанынаң хакас чонның XIV съездінің резолюциязын чуртасха кирерінңе пастағы чыылии ирткен. Чыылығда Улуғлар чӧбінің кнезі Пётр Воронин, республика пазының орынҷызы Ольга Пономарева, национальнай паза территориальнай политика министрі Михаил Побызаков араласханнар.
Резолюция «Хакас чирі» газетада пӱӱл 28 майда сыххан (39 №). Хакас чонның сьездінде алылған резолюцияда республиканың ӱлгӱ органнарына чӧптер пирілче. Пір саринаң аны чон чахии тиирге чарир. Оларның ӧӧн чардығы толдырығлығ ӱлгее килісче, аннаңар иң улуғ нандырығ ағаа артылча. Резолюцияны 2026 чылға теере, хаңан хакас чонның теестегі сьезді иртер паза ирткен сьездтің ӱчӱн нандырңаң тус чидер, чуртасха кирілер правительство чарадиин аларға кирек. Пір ай аразына республиканың министерство-ведомстволарынаң хада прай даа чахығлар чарадыл парған. Оох-теек ле сурығлар халған. Паза пір танығ - чахығларның ӧӧн чардығы аалдағы чонның чуртазын чахсыландырарына теелче.
- Сірер мині оңарыңар, - теен Пётр Иванович, - мин пу чахығларны сағын таппаам, ол чон сурынызы. Аннаңар піс аны пір дее хыйа ит полбаспыс. Ӱзӱрелер, пӧкчең оңдайлар табалар. Оларның чуртасха кирілгені ӱчӱн мин пис чыл пазынаң нандырығ тударбын.
Чоох парча хай пірее социальнай пӱдіріглернің тимге сығар тузынаңар паза пірее орыннарда чон сурчатхан пӱдіріглерні турғысчаң кирексініс чидіспинчеткенінеңер. Кӧзідімге, Асхыстағы лицей-интернатты алғыдар ӱчӱн хоза школаны 2022 чылда турғызарға харығ полчатхан сылтағ сығыс килген. Пу пӱдірігні Хакасия правительствозы Россияның аал хонии министерствозынаң хада чарат салған, че пу наада школаа чылығ пирҷең котельнайның кӱзі читпезі ілезіне сығысхан. Амды ӱлгӱлер котельнай суриин пӧгіп албаанда, наа школа пӱдірии турыбызар. Пиҷе хол аал чуртағҷыларының сурынызын - аалда ФАП пӱдір пирерін - чуртасха кирерге ідӧк сидік полар. ФАП пӱдірер ӱчӱн аалда 100-тең тӧбін нимес чуртағҷы саналарға кирек. Пиҷе холда ол син чуртағңы чоғыл.
- Че сірер сағыссырабаңар, - теен Ольга Игоревна, - килчеткен чылдаң сығара піс республикаа кӧзір чӧрҷең ФАП аларбыс. Ол аалзар чӧр турар.
- Піс ол оңдайнаң чаразарбыс, сынап ол ФАП-тың аалзар килер тузы чарадыл парар, кӧзідімге, понедельникте, средада, пятницада, - нандырған Пётр Воронин. - Чуртағҷылар пастағы полызығны тузында аларға кирек.
Андағ оңдайнаң пастыхтар илееде таластығ сурығҷа пір чарадыға килгеннер. Халған оларны министерство-ведомстволарнаң хада чарадыбызарға. Ӧӧні чон сурынызын, хазна пирчеткен оңдайларнаң тузаланып, чуртасха кирерге маңнанарға. Андағ программаларның пірсі - «Аалларның тиксі тилізі» хазна программазы. Ол 2024 чылға теере тоғынар, аннаңар пу тус аразына аннаң толдыразынаң тузалан халарға кирек.
- Піске резолюцияҷа толдыразынаң тоғыныбызарға кирек, - теен Валентин Олегович. - Прай министерство-ведомстволарға кӧстегліг сурығларны, тиксі паалап, чургасха кирерін кӧр саларға. Оӧні маңзырабин чарадығ аларға, правительство чахии чургасха кирер сын оңдайлығ паза чахсы синде тимнелзін.
Улуғлар чӧбі дее правительствоны чарадығны аларға маңзыратпинча. Чыл тоозылчатса, халых пірігізінің теестегі чыылиина ол чарадыл парза, чахсы полар. Июль тоозылғанҷа Ольга Пономареваның устаанынаң национальнай паза территориальнай политика министерствозы прай сурығларны чарат саларға кирек.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде