Хакас филармониязында «Carmina Burana» кантата премьера
18.09.2021
Хабарлар
18 сентябрьда Хакас филармониязында премьера полар. Кӧрiгҷiлер немец композиторы Карл Орф пасхан «Carmina Burana» кантатаны истiп аларлар. Аны Россияның чон артизi Лев Конторовичтiң устаанынаң «Мастера хорового пения» Академическай Улуғ хор толдырар. Москвадағы солисттернең хада сценаа республика филармониязының солизi, Хакас паза Алтай республикаларының саблығ артизi Артур Марлужоков сығар.
«Мастера хорового пения» пастағызын на нимес Хакасияда ааллапча. Полғаны ла хати артисттер кӧрiгҷiлернi премьераларнаң ӧрiндiрчелер. 2018 чылда хор «Кӧлееденi удурлап» концерт программазынаң кӧрiгҷiлернi ӧрiндiрген. Концерт тузында Вольфганг Амадей Моцарт пасхан «Реквием» Хакасияда пастағызын на толдырылған. Концерттi кӧрiгҷiлер чылығ удурлааннар.
Амды Лев Конторовичтiң ӧмезi кӧрiгҷiлернi премьеранаң пазох ӧрiндiрер. «Шедевры хоровой музыки» концерт программазының пастағы пӧлиинде Павел Чесноковтың, Альфред Шниткенiң, Сергей Рахманиновтың, Вольфганг Амадей Моцарттың паза Франц Шуберттiң хорға пазылған произведениелерi толдырылар, оларның пiреезi - Хакасияда пастағызын на. Ӏкiнҷi пӧлiкте – К. Орф пасхан «Carmina Burana» - сцена кантатазының премьеразы. Солисттер – Елена Логинова (сопрано), Вячеслав Воробьев (тенор) паза Артур Марлужоков (баритон)
«Шедевры хоровой музыки» концертте кӧглернi Хакас филармониязының симфония оркестрi Хакасия искусствозының саблығ деятельi Вячеслав Инкижековтың устаанаң толдырар. «Мастера хорового пения» ӧменең кӧрiгҷiлернi Хакасия искусствозының саблығ деятельi Татьяна Чаптыкова таныстырар.
«Мастера хорового пения» ӧменiң Москва филармониязының 100 чылына чарыдылған гастрольлары Россияның культура министерствозының «Филармонические сезоны» программазы хоостыра парча. 17 сентябрьда артисттер Минсуғда концерт турғысханнар. Пӱӱн концерт Ағбанда иртер. Ол 16:00 часта пасталар.
Автор :
Марина Грибкова
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде