ПІСТІҢНЕР СЫЙЫХТЫҒ ОРЫННАРДА
02.02.2022
Хабарлар
Марығ. Пу наада Н.Ф.Катановтың адынаң Хакас национальнай гимназияның воспитательлері Ирина Побызакованаң Людмила Троякова Татарстан Республикадаң чиңіснең айландылар
28 январьда Казаньда Россия Матыры Марат Ахметшиннің адынаң 113 № татар-орыс ортымах школазында «Истории славные страницы. Школы героев» регионнар аразындағы проекттер марииның финалы ирткен. Анда Совет Союзының паза Россия Федерациязының матырларының аттарын ал чӧрчеткен школалар паза организациялар араласчалар. Пӱӱл марығда Татарстан, Хакасия, Дагестан республикаларның, Волгоград паза Киров областьтарының ӱгренӌілері паза школа тоғынӌылары кӱстерінең сынасханнар.
Хакас гимназияның воспитательлері Ирина Климентьевна Побызакова паза Людмила Максимовна Троякова «Матыр школазы» номинацияда араласханнар. Анда 18-ке чағын кізі кӱзін сынаан. Ирина Климентьевна «Легенды среди нас. Алексей Семёнович Кышпанаков - учитель, ветеран ВОВ, подольский курсант» проект тимнеен, Людмила Максимовна, тізең, Хакас гимназияда ӱгретчі полып істенген ветераннардаңар проектті марыға сығарған. Н.Ф.Катановтың адының Хакас гимназияның воспитательлері пастағы паза ӱзінӌі орыннарға турысханнар! - «Истории славные страницы. Школы героев» регионнар аразындағы проекттер мариинда піс пастағызын на араласпаа быс. Ирткен чылларда марыға ӱгренҷілерні тимнеп ал чӧргебіс, олар даа сыйыхтығ орыннарға турысханнар. Пӱӱл позыбыс кӱзібіснең сынастыбыс. Пу марығ улуғларны паза кічіглерні пос чир-сууна хынарға ӱгретче, Илбек Ада чаада араласхан ветераннарыбысты ундутпасха, тархынны істезерге кӧніктірче, - чоохтапча Ирина Побызакова.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде