АНЫҢ ТАЛАНТЫН КІЧІГДӦК СИЗІНГЕННЕР
Статья
Ағбанда А.М.Топановтың адынаң драма театрында репетиция иртче. Артисттер ойынға тимненчелер. Чиит артист Александр Асочаков чалҷыны ойнапча. Рольын уғаа хынығ паза сын толдырча. Чарым час ла мының алнында гримеркада мин пу чиит оолнаң чоох алысхан полғам. Андада ол мағаа уйатчыл, кӧп чоохтанмас кізі чіли пілдір парған. Ағаа мындағ хылыхтығ тоғынарға сидік полар тіп сағын салғам мин андада. Че сценада аның хылии саңай алыс парған.
Чиит артистнең мині театрның литература пӧлиинің устағҷызы, Хакасияның саблығ артизі Светлана Николаевна Селигеева таныстыр салған. Хайди ол теен, Александр Асочаков Хакас театрының иң ус артисттерінің санына кірче. Пӱӱнгі кӱнде ол ӧӧн паза ікінҷі рольларны толдырча.
- Театрда хакас тіліне улуғ хайығ салылча. Хай пірее артисттер хакас тілінең уйан чоохтасчалар, аннаңар хынған рольны толдыр полбинчалар. Саша, тізең, хакас тілін ӧтіре пілче. Аннаңар даа, неке, сценада туртухпин тудынча, - Сашаны сахтапчатхан туста чоох алысчабыс Светлана Николаевнанаң.
Светлана Селигеева прай даа чиит артисттердеңер ачынып, хынып чоохтапча. Ол, кӧп палалығ іҷе чіли, тіпче: «Театрзар килген артисттер таланттығлар, устар. Піс, улуғлар, оларға хабазарға хаҷан даа тимдебіс».
Александр Асочаковнаң піс репетиция алнында чоохтазып алғабыс. Ӧӧн тема - кино. Светлана Николаевна тиктең нимес мағаа аннаң чоохтазарға чӧп пирген, неке. Саша спектакльларда ойнапчатханынаң пасха, ідӧк кинода суурынған. Че ойыннардаңар соонаң, амды, тізең, кино.
- Саша, 2009 чылда син «Байконур» фильмде суурынғазың. Аннаңар чоохтап пир.
- 2007 - 2012 чылларда мин Санкт-Петербургтағы театральнай искусствоҷа хазна академиязында ӱгренгем. 3-ҷі курста ӱгренчеткенімде, кастинг директоры Азиз Сатторов университетсер килген. Ағаа киноға азиат омалығ чиит оол кирек полған. Пістің университеттең пасха, кастинг Москвада, Бурятияда, Казахстанда, Европада
ирткен. Анда араласхан оолларға кино ӱзігі пирілген. Аны ағаа кӧзіт пирерге кирек полған. Ойынны Азиз Сатторов видеоға суурған, анаң Германиязар режиссер Файт Хелмерге ысхан. Режиссер мині таллап алған. Мағаа ӧӧн роль пирілген. Гагарин саарбах улуғ нимес аалда чуртаан. Аны ағазы ӧскірген. Іҷе-пабазы ӱреен. Пір хати телевизорда Франция хызын кӧр салған. Ол космонавт полған. Пірсінде космическай станцияда саай пол парған. Капсула оолағастың аалынаң ырах ниместе тӱс парған. Анда Франция хызы полтыр. Гагарин аны ибінзер ағылған. Аннаң андар кино полтазында кӧӧленіс, чарылыс паза даа пасха хынығ нимелер...
Фильм Казахстанда Алма-Ата городтаң ырах ниместе суурылған. Улуғ нимес аалыҷах ӧнетін пӱдірілген. Кинода «Байконур» станция паза аал чағыннар, че сынында олар ырах орныхчалар. Станциядағы киректі суурарға піс «Байконурзар» пір кӱн поездтіг, анаң нинҷе-де час машиналығ парғабыс. Ідӧк хай пірее сценалар Москвадағы космонавттарны тимнеҷең кінде суурылғаннар.
- Кинода суурынғанда, кӧңнің хайдағ полған?
- Кізі, наа ниме итчетсе, хаҷан даа чӱрексіпче полар. Мин дее чӱрексеем. Че кино табырах суурыл парған. Ол ікі ай тӧрт кӱн суурылған. Пір сентябрьдаң тӧрт ноябрьға теере. «Байконур» суурыл парғанда, мині пасха кинода аралазарға хығырғаннар. Мин парарға иткем, че киліспеен.
- 2016 чыл Кино чылы тіп чарлалған. Аннаңар пӱӱл ағаа улуғ хайығ салылар. Пірее кинода суурынарға хығырзалар, парарзың ма?
- Я, парарбын. Кино табырах суурыл парча нооза. Театрнаң тиңнестірзе, киноға кӧп кӱс хоратпинчазың. Ікі-ӱс репетиция соонаң суурарға чарир. Театрда, тізең, тоғынарға уғаа аар. Кӱннің сай ікілер хати репетиция. Пір-ікі час сценада ойнабызар ӱчӱн, азынадох тимненіс хатығ парча. Че андағ даа полза, театр минің чӱрееме чағын на. Анда артист кӧрігҷілернің харахтарын, кӧңнілерін іле кӧрче. Анзы ағаа аннаң андар ойнирға кӱс пирче. Кинода, тізең, андағ нимес. Кӧзідімге алза, мин, «Байконурда» суурынып, пілбинчем дее, хайди мин анда ойнаам - чахсы алай уйан. Театрда, тізең, актерның тоғызы сах андох паалалча.
- Пӱӱнгі туста телевизорҷа кӧзіділчеткен Россия киноларын, сериалларын син хайди паалапчазың?
- Пістің режиссерлар комедияларны чахсы суурчалар тіп сағынчам. Че драмалар, боевиктер, чаа кинолары кӧңніме кірбинчелер. Ідӧк пістің киноларда олох ла актерлар суурынчалар. Минің хынған фильмнерім «А зори здесь тихие», «Турецкий гамбит», «Адмирал» паза даа пасхазы.
- Позыңнаңар чоохтап пир. Хайдағ оңдайнаң театр академиязынзар ӱгренерге кіріп алғазың?
- Мин Пии аймаандағы Куйбышев аалдағы школада ӱгренгем. Школа тоосчатханда, хакас тілі паза литература ӱгретчізі Клавдия Сергеевна Чебодаева Санкт-Петербургтағы академиязар ӱгренерге кірерге чӧп пирген. Ол туста Ағбанзар мастер килерге кирек полған. Ол Хакасиядаң 12 оол-хысты театрзар таллаан. Клавдия Сергеевнанаң кибелістер, чоохтар, баснялар, сарыннар ӱгренгебіс. Ағбанзар сыныхтаға килгенібісте, алаң ас парғабыс. Чон тығырама, пір орынға 100-че кізі полған, неке. Владимир Васильевич Норенко 12 кізіні таллап алған, ол санда - мині.
Пісті, Хакасиядаң парған чииттерні, республиканың правительствозы паза культура министерствозы тикке ӱгреткеннер. Академияда піс тирең пілістер алып алғабыс, че мында, театрда, улам тирең тоғынарға килісче. Чииттер театрда кӧп. Олар прайзы даа чахсы ойнапчалар, че узыбысты ам даа тилідерге кирек. Улуғ алғызыбыс читірчебіс пістің опыттығ артисттерібіске. Піске олар чахсы хабасчалар,- салтар итче чиит артист.
Сизінгенде, Александр Асочаковха удаа оң полча. Владимир Норенко пір муң азыра оол-хыстаң Сашаны Санкт-Петербургта ӱгренерге таллап алған. «Байконурға» кастинг ирткенде, Хакасияның студентіне ідӧк оң полған. Саша таланттығ кізі полбаан полза, аны академиязар ӱгренерге, кинода суурынарға таллабасчыхтар, неке. Аның узын сизініп, класс устағҷызы Клавдия Чебодаева аны орта чолға кӧстеен. Амды, тізең, Александр Асочаков республиканың ӧӧн театрында істеніп, пір сценада опыттығ, таланттығ артисттернең хада ойнапча.
Тимнеен Оксана Сунчугашева.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде