АЙАСТА МАҢНАН ХАЛАРҒА
14.09.2016
Хабарлар
Сомда: Юрий Алексеевич паза Алексей Юрьевич Карамашевтер.
Наңмырларға пай чайғы аал хонииндағыларға хысхызына малға азых тимнирге илееде сидіктер ағылған. Хыраҷылар, сала айас кӱннер ползох, сапхан отты чыырға маңнанарға кӱстенгеннер. Кӱскӱ чахсы, айас кӱннердең пасталды. От тимнепчеткеннерге сала ниик тыныбызарға оңдай пол парды. Олар амды пӱктерде харал парып чатчатхан оттарны чыыбызарға маңзырапчалар.
Че прай нименің позының тузы. Хыраларда тоңастығлар пыс парған, оларны сабар тус чит килді.
Пӱӱл Таштып аймаандағы «Нива» ООО-да 2274 гектар чирде тоңастығлар таарылған. Ирткен чылнаң тиңнестірзе, ол 750 гектарға кӧп. Андағ хозым хоных наа чирлер тузаланысха кирчеткен сылтаанда пол парған. Ол син тоңастығларны чыырға 4 комбайн тимнелген. Ӱртӱн айы пасталғаннаң, олар хыразар сығыбысханнар.
Тӧрт комбайнның ікізінде пабазынаң оолғы тоғынчалар. Улии - Юрий Алексеевич Карамашев -Хакас Республика аал хонииның саблығ тоғынҷызы. Аннаң хости істенче оолғы Алексей. Пӱӱнгі кӱнде адалығ оол Александр Тороковнаң хада Чоғархы Ибіг аалның хыриндағы хыраны тоос парирлар. Анда пуғдай таарылған. Пір гектардаң 20 артиинаң центнер ӱрен сабылча.
Ирткен чылда Ағбанда аал хонии тоғынҷыларына чарыдылған пайрамда «Нива» ООО-нын, хыраҷызы Юрий Алексеевич Карамашев Хакасия пазы Виктор Михайлович Зиминнің холынаң «Хакас Республика аал хонииның саблығ тоғынҷызы» знак алған. Оолғы Алексей, тізең, аймах синінде ідӧк пӧзік паалаға турысхан. Ол ікінҷі чылы комбайннаң тоғынча. Алексейнің чидіглері ам даа алнында тіп ізеніс пар. Ағаа пабазы чахсы кӧзідім нооза.
Автор :
Георгий КУНУЧАКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде