«РОССИЯНЫҢ КӦГЛЕРІ» ФЕСТИВАЛЬ КӦРӀГҶӀЛЕРНӀҢ ЧӰРЕКТЕРӀН ХАЙЫЛДЫРҒАН
01.09.2017
Хабарлар
Пу наада Хызылчар крайында кӱӱлеп иртті «Pоссияның кӧглері» X фестиваль-марафон. Аның ӧӧн пӧгіні - пістің хазнада чуртапчатхан чоннарның фольклорын тилідері. Фестиваль-марафоннаң Россияның чон артизі Надежда Бабкина устапча. Хакас артисттері анда тӧреміл араласчалар.
Надежда Георгиевнаның кӱстенізінең фестиваль чыл сай аймах регионнарда иртче. Ӱс чыл мының алнында «Россияның кӧглерін» Хакасияда удурлааннар, пылтыр фольклор ырларын Кемеров облазында искеннер, пӱӱл, тізең, теес Хызылчар крайына читкен. Пістің республикадаң фестивальда «Айланыс» ансамбль араласхан. Хакасияның саблығ артизі Степанида Саможикова, Хакасия искусствозының саблығ деятельлері Александр Саможиков паза Олег Чебодаев, Ирина Чугунекова, Евгения Костякова, хакас сарыннарын толдырып, хонҷых регионның кӧрігҷілеріне ӧрiнiс сыйлааннар. «Россияның кӧглері» фестивальдаңар Степанида Саможикованаң Ирина Чугунекова чоохтапчалар:
- Пу уғаа чахсы фестиваль. Ол кізілерні фольклорнаң таныстырча, артисттерге узын тилідерге оңдай пирче. Фольклор сарыннарының пайрамы 11 - 20 августта ирткен. Он кӱн аразына концерттерні Хызылчар, Енисейск, Дивногорск, Железногорск, Канск, Иланскай, Назаров, Шарыпов, Минсуғ городтарда паза Краснотуранск аалда пирерге маңнанғабыс.
Кибір хоостыра прай концерттерні чуртағҷылар тикке кӧріп алғаннар. Пӱӱл фестивальда читі ӧме араласхан, ӱс ансамбль Москвадаң полған, пір Краснодардаң, пасхазы Сибирьдегі чайаачылар. Ідӧк полған на городта піске орындағы артисттер хозылғаннар. Араласчыларның аразында якут чонның хызы Альбина
Дегтяреваны таныхтирға кирек. Таланттығ ипчі «Айархаан» ӧменең устапча, че фестивальға чалғызан килген. Хайди ол морсымнығ хайлапча! Аның узына аптаттырып, кӧрігҷілер матап айа сапханнар. Ідӧк Бондаренко харындастарны истерге чапсых полған. Константиннең Кирилл аккордеоннаң ойнапчалар. Чиит музыканттарны аймах концерттер тузында телевизорда удаа кӧрерге чарир. Олар аккордеоннаң хайдағ даа кӧгні толдырыбызарға оңдайлығлар. Кемеровтағы «Сибирьдегі калейдоскоп» ӧме, теелбектер толдырып, хонҷых регионның чуртағҷыларының чӱректерін хайылдырған. Чоохтирға кирек, Хакасиязар пу ӧме гастрольларнаң удаа килче. Фестивальның ӧӧн «чылтызы» Надежда Бабкина полған. Пылтыр ол, ағырыбызып, концерттерде ӧткін араласпиндыр. Пӱӱл, тізең, чон хынчатхан ырҷы сценада, сарнап, пырлахтан турған.
«Айланыс» фольклор ӧмезі фестивальда ікі сарын толдырған. Степанида Степановна таныхтапча:
- «Хайҷыларыбыс» паза «Эк, чаным, пай ирен» кӧглерні кізілер хынып искеннер. Сизінгенде, Хызылчар крайындағы чон хакас хайына хынадыр. Сарнирға пастапчабыс, сах андох «Браво!», «Бис!» хысхырчалар. Ыырҷыларны піди чылығ удурлаза, олар уламох тың кӱстенчелер.
Ирина Чугунекованың чооғынаң, Железногорскта паза Шарыповода Хакасиядаң сыххан кӧп чон чуртапчаттыр. Хонҷых регион даа полза, чир-суғҷыларға тоғазарға хаҷан даа ӧріністіг.
Надежда Бабкина хакас ансамбльның узын пӧзік паалаан. Полған на концерт соонда саблығ ырҷы пістің артисттерге прай кӧрігҷілерні хамнап салчазар тіп чоохтаҷаң полтыр. «Айланыс» ансамбльның устағҷызы Степанида Саможикова чооғын узаратча:
- Россияның кӧглері» фестиваль-марафонда ікінҷі хати араласхабыс. Надежда Георгиевнаның устаанынаң ол сыбыра пӧзік синде иртче. Прай концерттер тузында пасталчалар, пірдеезіне орайладарға чарадылбинча.
Ансамбльның араласчылары постарын турыстыра кӧзітселер, оларны фестивальға хатап хығырчалар. Халғанҷы чылларда пу фестиваль Сибирьдегі регионнарда ирткен, пазағы чылда Надежда Бабкина аны Уралзар апарарға пӧгінче. 2018 чылда піске хығыртығ килер бе, пілбинчебіс, че мындағ килкім мероприятиеде араласхан ӱчӱн Надежда Георгиевнаа улуғ алғыс читіргебіс. Ізенчебіс, піс сыйлаан кӧклӧҷек ағаа талаан ағылар.
Таныхтирға кирек, «Россияның кӧглері» фестиваль-марафон 10 чыл аразына 8 федеральнай округта иртірілген, ол 70 регионның чуртағҷыларына ӧрініс сыйлаан.
Автор :
Айара ЧЕБОДАЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде