ХАЛҒАНҶЫ ӰЗӰРІГЛЕР
19.06.2018
Хабарлар
Табығлар-2018. «Единая Россия» Хакасияның пазына табығларға сығарчаң партия кандидадын табарынӌа тоғызын тоосча.
Пу кӱннерде «Единая Россияның» Хакас региональнай пӧлии пӱӱл 9 сентябрьда иртер Хакасияның пазына табығларға сығарҷаң партияның кандидадын табарын тоосча. Партия істіндегі азынада ӱн пирістің (праймеризтің) халғанҷы чыылии 14 июньда Ағбанда ирткен. Аның алнында «Единая Россия» партиядаң табығларда аралазарға сағынчатханнар - Хакасияның пазы Виктор Зимин, Ӧӧркі Чӧптің алтынҷы хығыртииның депутады, идінҷек Олег Гавловский паза Абаза город пазы Валентина Филимонова - партияның орындағы пӧліктері хачыларынаң хада тоғазығларны Саяногорскта паза Харатаста иртіргеннер.
Саяногорсктағы праймеризте ӱстӱнзархы аймахтардаң (Саяногорсктаң, Абазадаң, Алтай, Пии, Таштып паза Асхыс аймахтарынаң) килген единоросстар араласханнар. Харатаста ирткен праймеризте кандидат поларға сағынчатханнардаң алтынзархы аймахтардаң (Сорығдаң, Харатастаң, Шира, Орджоникидзе паза Ағбан пилтірі аймахтарынаң) килген орындағы пӧліктернің устағҷылары тоғасханнар. Тоғазығларда кандидат поларға сағынчатханнар табығларға сыхчатхан программаларынаң таныстырғаннар, регионны хайди тилідерге паза чуртағҷыларның чуртазын хайди чахсыландырарға сағынчатханынаңар искіргеннер.
Ағбандағы единоросстарнаң тоғазығ андағох оңдайнаң ирткен. Тоғазығ араласчылары кандидаттарның сағыс-кӧрістерінең танызып алғаннар, оларның полғаны ла хайдағ сидіксіністі иң пастап пӧгерге кирек тіп санапчатханын піліп алғаннар паза сурығлар пиргеннер.
Иң кӧп сурығ Хакасияның пазы Виктор Зиминге пирілген. Кӧзідімге, ағбандағылар «Ағбанда льготниктерге чир участоктары тикке пирілче, че уғаа асхынах. Пу сурығ хайди-да пӧгілер бе?» сурығ пиргеннер. Виктор Зимин андағ сидіксініс парынаң чарасхан, че хайди таныхтаан ол, мында Ағбан город ӱлгӱлері пыролығ ниместер. Прай кирек городта чир чидіспинчеткенінде. Аннаңар республика ӱлгӱлері, Ағбан город администрациязынаң паза пасха муниципальнай пӱдістер пастарынаң хада тоғынып, ағбандағыларға тикке чир участоктарын хонңых аймахтарда, Ағбан пилтірі паза Алтай аймахтарында, пир сыхханнар.
- Чағынғы аймахтарда ағбандағыларға 1600 артиинаң андағ чир участогы пиріл парған, - нандырған Виктор Зимин. - Ағбанда, тізең, чир чоғыл даа. Аннаңар піс амды, городтың хырығларын алғыдып, хоза чир пирерге пӧгінчебіс. Че ол чир кӧп хадыллығ туралар пӱдіреріне пирілер.
Хакасияның пазы пу тоғазығда ідӧк республика правительствозы алнында турчатхан наа пӧгіннердеңер искірген. Оларның аразында иң ӧӧні - муниципальнай пӱдістерге пирҷең «кредиторкаҷа» алымнарны чабызары. Амғы туста пу сурығны пӧгерінҷе чол картазы тимнелче тіп искірген Хакасияның пазы. Чағынғы туста партнерлардаң республика бюджедінзер 3 миллиард артиинаң салковай кірер тіп кӧрілче. Ол ахча муниципалитеттерге пирілер, ол санда Ағбанға (773 миллион салковай).
Паза Виктор Зиминнің чооғынаң, ӱлгӱлер амды чоннаң наа оңдайнаң тоғынарлар. Виктор Зимин анзына Интернеттегі прай даа социальнай сетьтерде позының страницаларын азып алған. Чуртағҷыларға іди Хакасия пазынзар постың сурығларынаң, сидіксіністерінең Интернет пастыра кӧні айланҷаң оңдай пирілче. Республика правительствозының кізілері ідӧк прайзы постың страницаларын тӧстирлер тіп таныхтаан ол. Ідӧк чуртағҷыларнаң тоғазығлар наа оңдайнаң паза тӧреміл ирт турарлар тіп кӧрілче - министрлер айда пір хати, аал-городтарҷа чӧріп, чоннаң тоғас турарлар.
Хакасияның пазы ӱлгӱ чонға улам азых пол парарға кирек тіп кӧстег турғысча.
- Ӱлгӱ азых поларға паза кізее тоғынарға кирек, - таныхтаан Виктор Зимин.
Партия істіндегі ӱзӱріглер тоозыл парғанда, амды «Единая Россия» региондағы партия конференциязын иртірер. Ол конференцияда партияның делегаттары, чазыт оңдайнаң ӱн пиріп, Хакасияның пазына табығларға кемні сығарарын табарлар. Конференция 20 июньда Ағбанда иртер тіп кӧрілче.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде