АҒБАН ОЛҒАН САДТАРЫНА ПАЗА УЛУҒ ШКОЛАА ПАЙ ПОЛАР
22.01.2019
Хабарлар
Пӱдіріг. Ағбанда пӱӱл теестегі наа олған садының пӱдіриин пастапчалар. Ол пуох чылда ноябрьда тузаланысха кирілер. Ідӧк городта 1 сентябрьға пір улуғ школа азылар.
Ирткен пятницада городтағы пу ікі наа пӱдірігнең Ағбан пазы Николай Булакин Хакасия пазы Валентин Коноваловты таныстырған.
Наа олған сады городтың Хызыл Ағбан кічіг районында Литвиновтың орамазында орнығар. Ол 300 орынға кӧрілче. Анда иркеҷектер тиксі 12 группазар чӧр турарлар, ол санда ясля группазы полар. Аның проекті городтағы «Варенька» паза «Капитошка» наа олған садтарыни осхас. Пеер палаларын ӧӧнінде 6-ҷы паза 9-ҷы кічіг районнарның паза МПС-тың чуртағҷылары ағыл турарлар. Наа олған сады пӱдіриинең Хызылчардағы «Партнер» пӱдіріг компаниязы» ООО айғасча.
- Ағбанда кічіг чуртағҷылар саны кӧптең кӧп ле полып одырча, аннаңар чылда хайди даа пірер олған сады пӱдірілче. Че пӱӱл Ағбанда тузаланысха тиксі ӱс олған сады кирілер. Полғаны ла 300 орынға кӧріл парған. Андағ улуғ пӱдіріглер пістің республика олған садтарын паза ясляларын пӱдірерінҷе национальнай проекте ӧткін араласчатхан сылтаанда апарылчалар. Наа олған садтарында бассейн полар, - таныхтаан Николай Булакин.
Валентин Коновалов наа олған садының пӱдірии пасталчатханы республиканың ӧӧн городына паза Хакасияа даа танығлығ кӱн полча тіп таныхтаан. Аның чооғынаң, пӱӱл наа олған садтары ідӧк Асхыс паза Алтай аймахтарында азыларлар. Олар тузында тузаланысха кирілзіннер, анаң палачахтар, ӱгредіг заведениелерінің иркінін алтап, андар кӱннің сай чӧр турзыннар тіп алғаан.
Чоохтирға кирек, наа пӱдірігнің паазы - 172 миллион азыра салковай. Ахчаның 91 проценті федеральнай бюджеттең позыдылча, 9 проценті - Ағбан город бюджедінең. Наа олған садында ідӧк физиотерапия, логопедтің паза психологтың кабинеттері пар полар. Город администрациязының танығларынаң, Ағбанда пу 46-ҷы олған сады полар.
Пӱдіріг пасталар орында Валентин Коновалов паза Николай Булакин пастағы ӧзекті сапханнар. Оларға хозылған пӱдірігні апарчатхан компанияның устағҷызы Дмитрий Медведев.
Анаң олох кӱн Валентин Коноваловнаң Николай Булакин Ағбанда пір муң ӱгренҷее кӧрілген школа пӱдіриинде пол килгеннер. Наа школа городтың 6-ҷы кічіг районында Крыловтың орамазында пӱдірілче. Ам пӱдіріг-монтаж тоғыстарының 15 проценті ле читіре иділгелек. Анда істіндегі пӱдіріг тоғыстары апарылча. Николай Булакиннін чооғынаң, пӱдірігде сыбыра 120 -140 кізі тоғынча.
- Чайғыда прай пӱдіріг тоғыстарын тоос саларға, школа тастындағы ибіркі чирні прай иптеп саларға киректер. Анаң ӱгретчілер ӧмезіне анда наа ӱгредіг чылына тимненер тус пар полар, - таныхтаан город пазы, республика устағҷызын наа школанаң таныстырып.
Хайди ол чоохтаан, 3 хадыллығ школада пір сменада пір саңай 1000 пала ӱгренер. Сынап анда ікінҷі смена азылза, ӱгренчілер саны уламох кӧп полар. Школа пӱӱл тузаланысха кирілзе, наа ӱгредіг чылына андар олғаннар 1-ғы класстарға ла алылар, пеер, тізең, город лицейі пӱкӱлеезінен кӧзірілер. Лицей полған ӱгредіг учреждениезі, тізең, 29 № школа полыбызар. Пір муң ӱгренҷее кӧрілген школа пістің хазнада саннығ ла полтыр. Ам андағ улуғ школа Хакасияда пӱдірілче. Республикабыста анзы иң пастағы андағ школа полча. Пеер палаларын кӧп кізі чӧргізерге сағынча. Ол кічіг районнардағы школаларда ӱгренҷілер саны кӧптеңер, полған на классты читі-сигізердең азарға килісче. Аннаңар город устағ-пастаа пӱӱл Ағбанның 8-чі кічіг районында наа школа пӱдірерге пӧгінче. Анзы 31 № школа полар.
Ам Ағбанда Крыловтың орамазында пӱдіріл париған 3 хадыллығ школада 44 класс, ікі спортзал, улуғ библиотека, актовай зал полар. Ідӧк пастыхтар улуғ столовай полар орынны кӧріп алғаннар. Ол пастағы хадылында орныхча. Город мэрінің сӧстерінең, анда пір саңай 412 пала азыранар оңдай кӧрілче. Полған на класста 25 - 30-ар пала ӱгренер. Пасталығ класстардағылар алынча блокта ӱгренерлер, проектче кічіг класстардағыларға 16 кабинет тимнел парарға кирек. Наа школаның ікінҷі хадылында устағҷылар актовай залның, кічіг спортзалның паза пасха даа кабинеттернің пӱдірии хайди парчатханын кӧріп алғаннар.
Пу пӱдіріге ахчаның ӧӧн чардығы федеральнай бюджеттең хорадылча - 91 процент, аннаң пасха чардығы - муниципальнай бюджеттең. Тоғыстар прай тузында толдырылча тіп таныхталған. Пӱдірігні Хызылчардағы «Град» пӱдіріг компаниязы» ООО толдырча. Пӱдірігҷілер, істіндегі пӱдіріг тоғыстарынаң маңнанып алзалар, анаң школаның ибіркі чирін иптирлер. Школа стадионында волейбол паза баскетбол ойначаң площадкалар, футбол чазызы полар. Анаң пасха даа спорт паза ойын площадкаларында оборудованиелер турғызылар.
Пу тоғыс чорығында устағҷылар пӱдірігҷілернің тоғызына чӧпсінгеннер. Наа школаның тастындағы кӧрімін кӧріп, морсынчазың. Хаҷан ол тиксі пӱдіріл парза, уламох чапсых кӧрінер тіп ізеніс тӧріпче.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде