КӦӦК НИМЕДЕҢЕР ТАПСАПЧА?
12.03.2019
Хабарлар
Культура. А.М.Топановтың адынаң Хакас драма театрында «Кӧӧк уйазының ӱстӱнҷе учуғып» ойынның премьеразы иртті. Аны режиссер Сергей Коков турғысхан
Спектакльда ӧӧн рольларны Алиса ТОЛМАЧЕВАНАҢ Максим СУЛТРЕКОВ толдырчалар
Реабилитация кіні, терапия пӧлии. Анда имненчеткен кізілер правилолар хоостыра чуртапчалар. Іди медсестра Рэтчед (Алиса Толмачева) чарат салған. Пациенттер пір туста турарға, чунынарға, телевизор кӧрерге киректер. Медсестраның таниинаң, правилоларға тудынғаны кізілерге хазыхтанып алар оңдай пирче.
Олох пӧгіннең терапия пӧлиинде пациенттер чыылии тӧреміл иртче. Анда ағырчатхан кізілернің сидіксіністері ӱзӱрілче. Кӧзідімге, чиит Билли Биббит (Михаил Карачаков) чыылығ тузында хайдағ тустаң сығара килегейленчеткеннеңер чоохтап пирерге кирек. Терапия пӧлииндегі улусты психиатр Спиви (Виктор Коков) имнепче, че ол даа Рэтчедтің оңдайынча полча. Хайди медсестра чарат салар, пӧлікте чуртас іди парар. Че кинетін не терапия пӧлиинің чуртазын наа пациент Макмёрфи (Максим Султреков) сайбабысча.
«Кӧӧк уйазының ӱстӱнче учуғып» романнаңар чоох парза, кізілер писатель Кен Кизинің произведениезін не нимес, аны хоостыра суурылған хоос фильмні сағысха кирчелер. Киноны режиссер Милош Форман чайаан, ӧӧн рольны Голливуд «чылтызы» Джек Николсон толдырған. Роман даа, хоос фильм дее тилекейдегі иң саблығ чайаачы тоғыстар санына кірчелер. Аннаңар режиссер Сергей Коковтың алнында сидік пӧгін турған. Олох произведениені ағаа наа оңдайнаң «чоохтап пирерге» кирек полған.
Спектакль кӧрігҷілерні пастағы минутадаң чапсытча. Ойынға килген чон депрессиянаң паза пас ағыриинаң ирееленчеткен кізілерні кӧрерге тимнен салған. Сценада, тізең, кӧгліг музыка ойнапча, чазанған матырлар теелбектеніп ала сыхчалар, ікі официант, залзар подностығ тӱзіп, кӧрігҷілерге чей читірче. Той парчаттыр нооза! Ол сценаа кӧрігҷілернің кӧбізі пастап алаң ас парған, че анаң кізілер спектакльны харах албин кӧргеннер. Кем пілче, режиссер драма орнына кӱлкістіг ойын даа турғызыбысхан полар.
Спектакльны романнаң тиңнестірзе, Сергей Коков полтазынзар кӧп наа ниме кир салтыр. Ойынны сарыннар, теелбектер чазапчалар, олар матырларның омаларын чарыдарға полысчалар. Че, минің кӧрізімнең, ӧӧн алызығлар медсестра Рэтчедтің омазына теелгеннер. Романда піс 50 час ас парған, айағ пілбинчеткен, робот осхас ипчіні кӧрчебіс. Аның танығларынаң, пациенттерні пір холда тударға, оларны чабыра пазарға кирек. Сидіксіністерні турыстыра тобыр полбинчатса, ол кізі ағырығ, аны имнирге киректелче. Спектакльдағы медсестра пасха оңдайлығ, ол часнаң даа хай-хай чиит, кӧрімінең дее абахай. Че ол - часка чох кізі. Алиса Толмачеваның матыры, турыстыра кізее тоғазып, сӧбіре тӧстеп аларға пӧгінче. Ойынның пастағы сценазында кӧзіділген той аның сағынған сағызы полтыр. Анзы киліспеенде, Рэтчед реабилитация кініндегі пациенттерні хазыхтандырып аларына прай кӱзін салча. Че абахай ипчі пір ле ниме оңар полбинча: кізілерге правилолар нимес, часка кирек.
Медсестра тӧстеен кибірлердең тоғыр Макмёрфи харбасча. Законны хыйыстырған ӱчӱн, ол нинҷе-де ай харибде одырарға кирек, че табырах сағыстығ ирен хатығласты реабилитация кінінде иртірібізерге чаратхан. Пик сындырлығ, чалахай кӧңніліг матыр полған на пациенттің чахсы сарин кӧрерге, имненчеткен кізілерге полызарға кӱстенче. Аның хабазиинаң хулахха паза тілге кинек тіп саналчатхан Вождь Бромден кіндегі улуснаң чоох алызып пастапча, Билли Биббит ӧкерек хыснаң танызып алча, психиатр Спивинің дее реабилитация кінінің тоғызына кӧрізі алысча. Че чағбан чӱректіг матыр медсестра Рэтчедтің не чазыт сағыстарын оңар полбаан. Пу ікӧлең пілізіп алған полза, спектакльда кирек саңай пасха иде парыбызарчых.
Артисттер рольларны чалтырама толдырыбысханнар. Иң пурун кӧрігҷілер сцена устарын Иван Салайдиновты, Виктор Коковты, Юрий Котюшевті, Кирилл Султрековты, Арлекин Толмачевты, Сергей Доможаковты таныхтааннар. Саблығ артисттер хайдағ даа матырның омазын чарыт пирерге кӱстер. Че минің хайиимны оларның чиит арғыстары тартханнар. Иң пастап узынаң Михаил Карачаков хайхатхан. Чиит кізі хайди ойнапча! Аның Билли Биббиді - ічезінің паза медсестра Рэтчедтің хатығ холларына кірген чиит оол. Килегей, амыр хылыхтығ Биллиге хатығ чухча, іди дее полза, ол чахсы нимее тартыларға кӱстенче. Хайдағ даа туста хылығы чох кізілерні чонда нимее салбинчалар. Че Михаил Карачаковтың матырына айапчазың, чуртазы киліспееніне хомзынчазың.
Вождь Бромденні алынча таныхтирға кирек. Ол рольны Виктор Сагалаковнаң Андрей Тюкпиеков теести толдырчалар. Писатель Кен Кизи пу матырны улуғ хайығда тутхан, тиктең нимес романда чоох аның адынаң апарылча. Аар ӱлӱстіг Вождь Бромденнің омазын чайирға оолларға сидік полған, неке. Актерларға хулахха паза тілге кинек полаачыхтанчатхан кізіні кӧзідерге, олох туста чирлерін пыластырыбысхан индеец чонның ӱлӱзін чарыт пирерге киректелген. Кӧрігҷілер, спектакльны социальнай сетьтерде ӱзӱріп, Виктор Сагалаковтың даа, Андрей Тюкпиековтың даа тоғызына пӧзік паалағ пиргеннер.
Тиксі алза, Санкт-Петербургта чуртапчатхан чир-суғҷыбыс уғаа кирек ойын турғыс салған. Спектакль пастыра ол хайдағ даа кізее чылығ сӧс, хабазығ киректелче тіп сағысты читірген. Пӱӱнгі кӱнде кізілер алынҷа тудынчалар, кӧбізі хонҷығы кем полчатханын пілбинче. Сағыс-кӧрізібісті алыстырбазабыс, прайзыбысха даа реабилитация кінінде имненерге килізер. Тиктең нимес ойын сценада ла нимес, ідӧк залда парған. Пу айда артисттер «Кӧӧк уйазының ӱстӱнҷе учуғып» (14+) ойынны хатап кӧзідерлер.
Аны 16 мартта 17.00 часта кӧріп аларға чарир полар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде