АРТИСТ ЧОЛЫН АСХАН-ТАПТААННАРҒА АЛҒЫЗЫН ЧИТІРГЕН
27.03.2019
Хабарлар
Пайрамнығ иир. Россияның саблығ артизі, Хакасияның чон артизі Светлана Чаптыкова-Чебодаеваның пайрамнығ чазына чарыдылған чалахай иир ирткен.
Хайди чоохтанған режиссёр Константин Станиславский, таланттығ артист сценада хаҷан даа хан-пиг поладыр. Пу хыйға сӧстер А.М. Топановтың адынаң Хакас драма театрының актеры Светлана Чаптыковаа килістіре полар тіп санапчам. Актер чолын таллап алған ипчее чайаачы чуртаста улуғ паза тирең тоғыс апарарға килісче. Светлана Семёновна актер тоғызынаң пасха режиссер, Россиядағы театрлар деятельлері пірігізінің Хакасиядағы пӧлиинің кнезі паза чалахай іҷе полча.
Пайрамнығ иирге чыылған чон Светлана Чаптыкованың олған тузынаңар, Ленинградтағы ӱгредіг чылларынаңар сомнар архиві пастыра піліп одырған. Россиядағы театрлар деятельлері пірігізінің кнезі Александр Калягин видео айланызында театр тоғынҷыларын паза кӧрігҷілерні Россияда Театр чылы чарлалып азылғанынаң алғыстаан. Театр чылы паза пайрамнығ тӧреен кӱннер пір туста таныхталчатханы уламох танығлығ кирек нооза.
Ленинградта хада ӱгренгеннернің видео пастыра алғыстастары Светлана Семёновнаны ирткен тустарзар апарған полар. Россияның чон артисттері Сергей Паршин паза Сергей Мигицко, ӱгредіг тузын сағысха киріп, хакас оол-хыстарынаңар чылығ сӧснең не ӱндескеннер. «Хакасия студенттері хаҷан даа хада-пірге тудынҷаңнар, ай-пораан полбаҷаңнар, ачых-чарых,пасхазына полызар оңдайлығ полғаннар, пір сӧснең, айдас курс полған!» - таныхтаан Сергей Мигицко. Устар Светлана Чаптыковаа наа рольлар паза чайаачы тоғыстар алғааннар.
Студент тузындағы сомнарда саблығ актерларны танирға чарир: Иван Салайдиновты, Георгий Сагалаковты, Юрий Топоевті, Юрий Майнагашевті, Татьяна Майнагашеваны, Мария Кыстоякованы...
Актерларның сценадағы чуртазы паза узының тилізі режиссерларнаң кӧні палғалыстығ полар. Режиссер Эльза Михайловна Кокова Ленинградтағы театр паза кино институдынзар актер профессиязына ӱгренерге хакас чииттерні ӱс хати ысхан. «Мин ізіг отнаң кӧйбезем, син ізіг отнаң кӧйбезең, прайзы даа іди кӧйбезе, кем харасхыны сӱрер?» - Эльза Кокованың хынған чооғы полҷаң.
Хакас театрларының таланттығ актерлары пастыра режиссерлар чонға чарытхыны читірчелер. Культура тархынында Александр Тугужековтың, Василий Ивандаевтің, Михаил Топоевтің ойыннары хаҷанға даа халарлар.
Чалахай иирні «Табан-шоу» хормачы ооллар ӧмезі хынығ апарған. Республикадағы Хакас паза Орыс драма театрлары алғыстастығ капустниктер тимнеп салтырлар. А.М.Топановтың адынаң Хакас театрының чииттері «Киндірлігдегі тартыстар» кӱлкістіг ойыннаң сыхханнар. Вестерн оңдайынаң парған кӧзідігде ковбойлар аалдағы чииттерні теелбектенерге ӱгрет парчалар. Кӧгліг музыка паза хормачыланыстар кӧрігҷі кӧңнін кӧдірген.
Чон алнынзар Россияның паза Хакасияның саблығ артизі Геннадий Чаптыков «Турналар», Аяна Чебодаева «Тайағым минің», Ольга Изотова «Чіт парба» ырларнаң сыхханнар. Россияның паза Хакасияның саблығ артизі Анна Туртугешева Михаил Кильчичаковтың хынысха чарыдылған рубаилерін хығырған. Артист кізінің иирі прай саринаң чайаачы поладыр.
Светлана Чаптыкова-Чебодаева суурынған хоос фильмнернің ӱзіктері кӧзіділген. М.Горькийнің адынаң «Мосфильм» киностудияның «Тайға ханының тоозылғаны» фильмінде чиит хыс пастағызын на суурынған.
«Ах парыстың тӧллері», «Ай хуу хады», «Піріккен чоллар» Киргизфильм паза «Нымзах отха паспаанда» Казахфильм киностудияларның фильмнерінде хакас артист ӧӧн рольларны толдырған. Светлана Семёновна «Харах оды» фильмні РТС телестудиянаң хада суурған. Аның премьеразын чон кӱскӱзер кӧрер.
Светлана Чаптыкованы пайрамынаң кӧп кізі алғыстаан паза порчолар читірген. Хакасия пазының пастағы орынҷызы Андрей Асочаков алғыстазында чылығ сӧстернең айланған:
- Аарлығ Светлана Семёновна! Сірер пістің чонның иң сіліг паза абахай хызы полчазар. Полған на кізее чағын туғанына чіли хайчазар. Сірер хакас чонын пірге тартчазар. Прай чӱреемнең алғыстапчам тӧреен кӱніңернең! Хазых чӧріңер, кӱннің сай чӱрееңерні хыныс чылытсын, чайааныңар пӧзік ползын!
Светлана Семёновнаның кӱлӱк хылиин прайзы таныхтапча, хайди прай чирде маңнанча полчаң тіп хайхапчалар. Сценада ойнапча, ойыннар турғысча, халых чуртаста араласча, иб аразында хайынча, чайаачы тоғыстар пасча... «Ол - рольларны ӧтіре ойнапчатхан хайхастығ артист, чонға чахсы киректер читірчеткен ипчі, Хакасияның сын хызы» сӧстер сценадаң истілгеннер.
- Пайрамнығ иир мағаа ла чарыдылбинча, - чооғында таныхтаан С.С.Чаптыкова.
- Иң пастағызын, улуғ алғызым читіріп, мині орта чолға кӧстееннерге паза ӱгретчілеріме аны чарытчам. Аттарыбыс сӱрнӱкпин чӧрзін, чоныбыс кӱстіг чуртазын!
Пайрамнығ иирнің сценазын ӧӧнінде чииттернің ойыны чазаан. Анзын кӧре, таланттығ паза пілістіг артисттерібіс наа актерлар тӧлінің чолын таптапчатханнарын сизінерге чарир. Светлана Чаптыкова-Чебодаева оларға орта чол кӧзітчеткен чарых чылтыс полчатханынаң прайзы чаразар тіп сағынчам.
Автор :
Елена САГАТАЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде