ХАЗНА ЧАХИИ ПӰДІРІГҶІНІҢ КӰЗІНҶЕ
16.08.2019
Хабарлар
Тоғазығ. Хакасия пазының орынҷызы тоғызын толдырчатхан Константин Харисов республикадағы пӱдіріг предприятиелерінің устағӌыларынаң паза тоғызынаң танысхан
Орғах айының 13-ӌі кӱнінде Хакасияның садығ-промышленность палатазының туразында Хакасия пазының орынӌызы тоғызын толдырчатхан Константин Харисов республикадағы пӱдіріг компанияларының устағӌыларынан паза тоғызынаң танысхан. Пӱдірігӌілерні ирткен ӱлӱкӱнінең алғыстап, Константин Харисов оларның республика экономиказына паза чон чуртазына итчеткен хозымнарын таныхтаан. Тоғазығның пӧгіні, тізең, Хакасияда пӱдіріг киреен айныдарға харығ полчатхан сурығларны ӱзӱрері паза хазна чахығларынаң айғазарға ниме чидіспинчеткенін ілезіне сығарары полған.
Республикадағы килкім пӱдірігӌілер паза пӱдіріг ниме-нооларын сығарчатхан компанияларның ӧӧн чардығы 10 - 50 чыл тоғын парир, олар пӱдіріг кирее «нименең тынчатханын» чахсы пілчелер. Чоохтирға кирек, кӧп квартиралығ туралар пӱдіриинде сидіксіністер пасталыбысханда, компанияларның чардығы промышленностьсар парыбысхан, чардығы - хазна чахығларынзар. Хайзы даа кӧстегӌе улуғ чахығлар тоғасча. Хара тас промышленнозы даа пӱдірігӌілерге тоғыс пирчеттір: пос кирексіністеріне аймах пӱдіріглердең пасти тимір чол станцияларын алғыдарынӌа тоғыстарға теере. Хакасияда санға турғызылған, че ӧӧнінде пасха регионнарда тоғынчатхан компаниялар парох. Константин Нурфаязович оларны хайыға алчатхан, пӧгін - оларны пос чирінде тоғындырарға, кӧзідімге, тиксі тыхтағ программазында.
Хакасияның толдырығлығ ӱлгӱ кізілеріне тиксі пӱдіріг киреендегі ӧӧн сидіксіністерні Хакасияның пӱдірігӌілер пірігізінің президенті Михаил Борисов чарыт пирген. Иң пастағызын, пӱдіріг компаниялары тиксі хазнада чурт паазының тӧстелчеткеніне чӧпсінминчеттірлер. Аннаң Москвада ӧнетін кін айғасчаттыр. Михаил Андреевичтің таниинаң, паалар ам даа иргі кирексіністерӌе турғызылчалар. Пӱдіріг ниме-нооларына, полызығларына паалар алысчатханы, чал ахчазы ӧскірілчеткені паза наа оңдайлар, технологиялар тузаланысха кирілчеткені санға алылбинчаттыр. Ікінӌі сидік сурығ - пӱдіріглерзер чарытхы, чылығ паза суғ пирӌең сетьтерні тартары. Ол тоғыстар паазына предприятиелер пасха хорадығларны кир салчаттырлар. Ӱзінӌі сидіксініс - тоғынӌылар сурии. Пӱдіріг тоғыстары хыызында парчатса, ол ӧӧнінде чылығ тус, тоғынӌылар вахтаа парыбысчалар алай посха тоғынчалар. Пасхазы, тізең, сынында ол тоғысты киректебинче, тоғыс чох саналчатхан ӱчӱн пособие аларға кӧнік парғаннар. Олар пічіктерінде хол салдырарға ла кил парчалар. Паза пір сидік сурығ - республика чолларынӌа аар паза килкім таарлағны тартарға аарлыға сых парчатханы. Кӧзідімге, автокранны Богучан аймаанзар кӧзіре халар ӱчӱн, 132 муң салковай тӧлеп саларға кирек.
Пӱдірігӌілернің сидік сурығларын Константин Харисов позына таныхтап салған паза мыннаң мындар республикада чуртасха кирілчеткен хазна программаларында аралас полар компанияларнаң алынӌа чоохтазығ апарған.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде