ТОЙЫМ - ХАЙЫҒДА
18.12.2019
Хабарлар
Тоғыс чорығы. Хакасия пазы Валентин Коновалов тоғыс чорығынаң Тойым аалзар пар килді
ТОҒЫСТАР ТУЗЫНДА ТОЛДЫРЫЛЧА
Пу тоғыс чорығында Хакасия пазы Валентин Коновалов Тойымда «Демография» нацпроект хоостыра пӱдірілчеткен психоневрология интернадының чуртаҷаң корпузының пӱдіриин сыныхтаан. Пӱдіріг орнында тоғыс хайнапчатханы кӧрінген. Кӱскӱдегі сыныхтағ тузынаң тиңнестір полбассың. Андада подрядчик пӱдіріг тоғыстарын толдырарынча кӧрілген тустаң соона халчатхан. Хакасияның устағ-пастаа тоғысты айныдарға прай кӱстерні тартарға чахығ пирген. Алызығлар кӧріндіре.
Ниме иділ парған пу тусха? Чурт корпузының пастағы хадылы прай даа пӱдіріл парған, ікінчі хадылының чарымызында стенелер турғызыл парған, кӧбізінде кӧзенектер пар. Пӱдірігде 140 тоғынҷы істенчеттір. Оларны тартарынҷа ідӧк республиканың істеніс министерствозы араластыр.
- Пӱӱнгі кӱнге подрядчик кӧрілген тус хоостыра істенче, - искірген Хакасияның пӱдіріг паза ЖКХ министрі Сергей Новиков. - Пу чылға чӧптезіг хоостыра пӱдіріге 151 миллион салковай кӧрілген, аның 80 процентіне пӱдіріг тоғыстары толдырыл парған. Чыл тоозылғанӌа халған 30 миллионҷа салковай тузаланыл парар.
Килчеткен чылда тураны хырлирға киректелер. Министрнің кӧрізінең, проектте кӧрілген хыр (ол чікім) Сибирьге киліспинче, сағыс пар аны ікі сарилығ хырға алыстырыбызарға. Аның ӱчӱн проектті алыстырарға кирек. 2020-2021 чылларға тиксі тоғыстар паа - 487 миллион салковай. Пу тоғыстарға садығ пӱӱлӧк иртер.
- Сірер пілчезер, пу пӱдіріг алынҷа сыныхтағда тудылча, - таныхтаан Хакасия пазы Валентин Коновалов, пӱдіріг штабының чыылығ араласчыларынзар айланып, - аннаңар килчеткен чылда пӱдіріг тоғыстарын кӧрілген тус хоостыра толдырарға!
ААЛ ТИЛІЗІ САҒЫССЫРАТЧА
Тойымдағы Культура туразында Хакасия пазы Валентин Коновалов чуртағҷыларнаң тоғасхан. Чуртағҷылар пу тоғазығны сағааны залға чон толдыра чыылысханы киречілеен. Пастағы тӧрт сурығны аал чӧбі пазы Владимир Селютин пирген. Аны 2020 чылға аал чӧбіндегі коммунальнай полызығларға паалар ам даа чарадылбааны, Тойым, пір профильліг аал полып, моногородтар санына кіріп, пір дее ахчалығ хабазығ албин, устағ-пастаға сан пиріс пічіктерінең не айғазарға килісчеткеніне, чылығ паза суғ пирчең сетьтер иргілен парғанына паза Культура туразы изелчеткеніне сағыссырапчатханын читірген. Полғанына ла нандырығ пирілген.
Коммунальнай полызығларға паалар чыл тоозылғанча чарадыл парар тіп молчағ пирілген (аны Хакасияның энергетикаҷа паза тарифтерні сыныхтағда тударынҷа хазна комитеді чаратча. - Авт.). Хакасияның экономика тилізі министрі Николай Евдокимовтың искіриинең, моногородтарға ахчалығ хабазығ чолларны наачылирына паза ибіркі чирлерні иптиріне наа программаҷа пирілер. Республика коммунальнай сетьтерні наачылирынча федеральнай программа тоғынып пастирын сағыпчаттыр, че Тойымға най кирек полза, хабазығ кӧрілер. Тойымдағы Культура туразын тиксі тыхтир ӱчӱн нацпроектке кіріп аларына ізенерге халча.
Аннаң пасха аал чӧбі пазы ӧңніг металлар заводына хайығ айландырған. Аны ээзі, оборудованиені кӧзірібізіп, сайап пастабыстыр. Че ис-пай, чир ӱчӱн налог пір бюджетке дее кірбинче осхас. Валентин Олегович пу сурыға Хакасияның ис-пай паза чир хайызығларынҷа министерствозына хайарға чахаан.
Чуртағҷыларны ідӧк сӧп-сап реформазы, школадағы чылығ пирҷең система иргілен парғаны, олған имҷізі неделяда пір ле хати кил парчатханы паза пасха сурығлар сағыссыратхан.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде