МЕЛЬПОМЕНА КӦП ӦРІНІС АҒЫЛДЫ
18.12.2019
Хабарлар
2019 чыл - Театр чылы. 16 декабрьда артисттер Театр чылын сарыннарнаң паза ойын ӱзіктерінең ӱдескеннер
Тус табырах иртчеттір. Ӱр ниместе ле тиксі Россияда Театр чылы азылған, пу кӱннерде, тізең, аннаң анымҷохтазарға тус читті. Театр искусствозынаң палғалыстығ улус Мельпомена таниинаң ирткен чылны «Читігеннің» наа туразында ӱдескен.
Хакасияның культура министрі Леонид Ерёмин, чалахай иирні азып, республикада Театр чылы фестивальларға, пайрамнарға паза чидіглерге пай полды тіп таныхтаан. Пір чыл аразына Хакасиядағы театрлар 25 улуғ мероприятие иртірібіскеннер. Мында хайди даа «Чир Чайаан» паза «Ах иб» фестивальларны, Театр марафонын, «Тиңнең тиңе» амғы режиссураның лабораториязын, аймах форумнарны таныхтирға кирек. Орыс драма театры паза «Нымах» кӧклӧ театры, пайрамнығ чылын ӱлӱкӱннеп, наа ойыннарнаң хайхаттылар.
Чидіглердеңер чоохтаза, «Читіген» Москвада ирткен «Орыс олтырых» чоннар аразындағы фольклор театрларының фестивальында чиңіс тутхан. Пістің артисттер «Ахол» ойынны кӧзіткеннер. Аны режиссер Саяна Ултургашева драматург Илья Топоевтің пьесазынҷа турғысхан. Хакас драма театрының чайаачылары «Апсах паза талай» ойыннаң ӱс фестивальда араласханнар: «Туғанлык» (Уфа), «Науруз» (Казань) паза «Федерация» (Грозный). Спектакльда ӧӧн рольны Хакасияның чон артизі Виктор Коков толдырча. Чир-суғҷыбыс, апсахтың омазын толдыразынаң чарыт пирген ӱчӱн, «Туғанлыкта» фестивальның президенті Рифкат Исрафиловтың сыйиина турысхан. Юлия Тиникова-Чепашеваны махтирға кирек. Хакас абахай тиксі Россиядағы «Киртінчем!» фестивальда «Иң артых ипчінің рольы» номинацияда утып алған. Астраханьда артисттер «Хыснаң оол» спектакльны кӧзіткеннер. Аның режиссеры Саяна Ултургашева полча.
«Нымах» театрда тыс пілбес кізілер істенчелер. Пӱӱл олар «Чир Чайаан» фестивальны иртірерге, аймах марығларда устарынаң сыназарға маңнанғаннар. Артист Рима Зайнуллина «Шомбай-fest» фестивальда (Казань) «Иң чахсы актер рольы» номинацияда чиңіс тутхан, Павел Шнягин, тізең, «Перекрестокта» (Новосибирск) «Пластика этюды» номинацияда артыхтарның артығына сыххан.
Театр чылы артисттерге, кӧрігҷілерге кӧп ӧрініс ағылды, че иң танығлығ ол «Читіген» театрға полды тиирге чарир. Пылтыр театр ӧмезіне ойыннарыңны пос сценазында кӧзідерзер теен ползалар, пірдеезі киртінмесчік, неке. Че чуртаста хайхастар поладыр. Хакасия пазы Валентин Коноваловтың чарадиинаң пӱӱл саблығ театр наа туразар кӧскен.
Чалахай иир тузында Леонид Ерёмин артисттерге, режиссёрларға Хакасияның культура министерствозының Аарластығ паза алғыстас пічіктерін читірген. Ідӧк Театр чылында аймах марығларда араласхан олғаннарны сыйыхтааннар. Мероприятие улуғ нимес ойыннарнаң паза сарыннарнаң узарадылған. Иирнің халғанҷызынзар кізілерні чағдапчатхан Наа чылнаң Соох апсахнаң Хар хызыҷах алғыстааннар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде