СОП-САПНАҢ ТОҒЫНАРЫН ТӰЗІМНІГ ИДЕР
27.03.2020
Хабарлар
Оӧркі Чӧп. Хакасияның ӧӧркі Чӧп президиумы теестегі чыылиинда сӧп-сапнаң палғалыстығ сурығларны ӱзӱрібіскен
Хакасияның Ӧӧркі Чӧп кнезі Владимир Штыгашев 25 мартта президиумның теестегі чыылиин иртірген. Чыылығның ікі сурии сӧп-сапнаң палғалыстығ полған.
Пастап Ӧӧркі Чӧптің экологияҷа, чир-чайаан ис-пайынҷа паза чир-чайааннаң тузаланарынҷа комитедінің кнезі Валерий Старостин республиканың сӧп-саптаңар законынзар алызығлар кирчеткен закон проектінең таныстырған. Хайди ол чарытхан, алызығлар пістің законны федеральнайға килістіре тӱптестірер пӧгіннең кирілчелер.
Федеральнай синде І паза ІІ класс хорғыстығ сӧп-сапнаң тоғынҷаң федеральнай схема тӧстирінҷе кирексіністер турғызыл парған, - искірген ол. - Анзынаң пасха Россия Федерациязы субъекттерінің полномочиелері чарыдылча: хайдағ сӧп-сапты чох идерін олар сыныхтағда тударга киректер.
І паза ІІ класс хорғыстығ сӧп-сапнаң тоғынарын федеральнай органнар сыныхтағда тудар осхастар, ІІІ класс хорғыстығ сӧп-сапнаң тоғынарын - региондағылар. Ідӧк сӧп-сапты чох итчең наа кӧрім кирілчеттір - «энергетическай утилизация». Чарыда чоохтаза, сӧп-саптың прай тузалығ нимелерін алып алған соонаң аны, ӧртеп, чарытхы алай чылығ пирҷең энергияа айландырарлар. Аннаңар хатығ коммунальнай сӧп-сапнаң тоғынарынҷа тарифтер кӧрімнеріне наа кӧрімніг тариф хозылчаттыр - энергетическай утилизация тарифі.
Сӧп-сапнаңох палғалыстығ ікінҷі сурығ федеральнай законзар алызығлар кирердеңер закон проектіне ӱндезері полған. Закон проектін Хазна Думазының депутаттар ӧмезі тимнептір. Олар сӧп-сап чыылчатхан орынны, хайда контейнерлер (бактар) турчалар, арығлирын региондағы операторларға арт салар чӧпнең сыхчалар.
Нимедеңер мында чоох парча? Амғы туста сӧп-сапты чыыпчатхан паза чох итчеткен региондағы операторлар тасхар турчатхан контейнердең алай бактаң чирзер тӱс парған сӧп-сапты чығбинчалар, орындох артыс салчалар. Итсе, Россия правительствозы 2011 чылда алған чарадығ хоостыра ол тоғысты олар, сӧп-сапты тартчатханнар, толдырарға киректер. Че региондағы операторлар ол чарадыға хайығ салбинча осхастар, сӧп-сап орнын арығлирға, тізең, кирек ле. Салтарында ол тоғысты муниципалитеттер постарына алчалар, че закон хоостыра ол кӧстегліг нимес хорадығлар пол парча.
Хакасияның ӧӧркі Чӧп президиумы ол сағыс-кӧріснең чарасхан: ол сурығны федеральнай синде пӧккені сӧп-сапнаң тоғынарын улам тӱзімніг идер, туралар хырин иптирін чахсыландырар, ӧрттер сығызарына хорғысты чох идер паза муниципальнай бюджеттер ахчазын ӱзӱрлирге полызар.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде