Чон хазии – пастағы орында
02.12.2020
Хабарлар
Хакасия пазы Валентин Коноваловтың устаанынаң республикада коронавирусты тараттырбазынҷа паза кирдiрбезiнҷе штаб чыылии кӱннiң сай иртче. Пӱӱнгi чыылығның ӧӧн ӱзӱрии кафе-рестораннарның тоғыс тузын хозарына паза Наа чылны ӧменең удурлирын хайыға аларына теелген.
Чоохтирға кирек, коронавирусха хаптырғаннар саны олох синде тудылча, имнег полызиин киректепчеткеннер саны хызырылбинча. Тиксi алза, имнег полызиин читiрерi, хайдағ кӧзiдiглернең хайдар айланарын имҷiлер чонға тӧремiл чарытчалар. Республика ӱлгӱлерi орғаннар санын хосча. Аймах чӧптезiглер полызиинаң хабазыға килкiм предприятиелер хозылчалар. Ӏди пу неделяда Сойан городта 60 орынға имнег туразы хозылған, ағаа хоза прайзында хоза кии пирҷең оңдай пар. Андағ даа полза, Хакасияҷа Роспотребнадзор управление пастығының орынҷызы Татьяна Викторованың таниинаң, ағырығ тариры пiр синде турыбысса даа, пу чағында хазнада кискектiң наа штаммы тариры кӧрiлче. Декабрь тоозылғанҷа, январь айға республикада хоза 600 орын киректелер. Анзы, тiзең, амғы сидiк туста аар пӧгiлер.
Че республикада чонны азырирынаң айғасчатхан идiнҷектернi кафе-рестораннар тоғызын пiр часха хызырыбысханы сағыссыратча. Хакасияның экономика тилiзi министрi Виктор Богушевич штаб чыылиинда оларның сағыс-кӧрiстерiн читiрче паза алныларын аларға кӱстенче. Аның ӱчӱн алындағы штабта Хакасияҷа Роспотребнадзор управлениезiн аймах чуртас сариларында ағырығ тарапчатханын кӧзiдерге сурынғаннар. Пу чыылығда андағ искiрiг тимнелген. Ӏди Хакасияда коронавирус ӧӧнiнде улуғ алызығлар чох пу чуртас сариларында иң не тарапча (олар иң тарапчатханнардаң сала асхынах тарапчатханнарға теере кӧзiдiлгеннер): хазых хайраллиры (пiлдiстiг ноға), хазна ӱлгӱ органнары, садығ кирее, ӱгредiг, промышленность предприятиелерi, транспорт компанияларындағы водительлер, чурт-коммунальнай полызығ тоғынҷылары, банк специалисттерi, анаң на, тоғызынҷы орында, чонны азырапчатхан предприятиелер парча, халғанҷызында – аал хонии.
Андағ даа полза, Татьяна Викторова пу хатығласты хыйа алҷаң сылтағ кӧрбинче. Аның кӧрiзiнең чарасханнар республика пазының орынҷызы Татьяна Курбатова паза хазых хайраллаӌаң министр орынҷызы Александр Стреленко. Оларның чоохтарынаң, чон хазии пастағы орында. Че Хакасия пазы Валентин Коноваловтың кӧрiзiнең, удур-тӧдiр истерге паза пiлiзерге кирек. Салтарында пу сурығ, хатығлас iкi неделя тоғыныбысса, 7 декабрьда, салтарлар паалалза, ӱзӱрiлер.
Таңдағы штаб чыылиинда Виктор Богушевичтiң сурынызынаң Наа чылны ӧменең удурлиры ӱзӱрiлер. Чыылығда iдӧк пу кӧстегҷе тоғынчатхан идiнҷектер аралазар. Сағам идiнҷектер адынаң экономика тилiзiнiң министерствозы ӧмелерге Наа чылны 15 декабрьдаң удурлирға чарадарға чӧптепче. Ӧӧн кӧрiс: хазнаның ӱлгӱ органнары пу сурығны хайығда тутса, ағырығның тарапчатханы даа хайығда тудылар.
Хайдағ чарадыға килер штаб чыылии пу сурығларҷа? Хығырыңар газетабысты паза сайтсар удаа кiр турыңар, штаб чыылии кӱннiң чарыдылча.
Автор :
Наталья Субракова
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде