ПРАЙ ТОҒЫСХА АЗЫНАДА НАНДЫРЫҒЛЫҒ ТИМНЕНЕРГЕ
10.02.2017
Хабарлар
Сомда: Валентина Федоровна Земцова паза Виктор Михайлович Зимин.
Киҷее Хакасияның пазы Виктор Зимин республика правительствозының чыылиин иртірген. Регионның пазы министерство-ведомстволарның устағҷыларына чағынғы туста иртер мероприятиелерге азынада чахсы тимнен саларға чахығлар пирген.
Чыылығның тоғызын пастир алнында Виктор Зимин Алтай аймаандағы Хызыл чазы аалның ФАП фельдшері Валентина Земцоваа Россия президенті сыйыхтаан «За заслуги перед Отечеством» II степеньніг орденнің медальын читірген. 2015 чылда ӧрттерде Валентина Фёдоровна, позының кӧйчеткен туразын ӱзірбин, ФАП туразын ӧрттең ал халған. Владимир Путин, аалда полып, Земцованы сыйыхтирдаңар чарадығ алған.
Виктор Михайлович чыылығда республикада пӱӱл иртірілер мероприятиелерге нандырығлығ тимнен салардаңар чоох апарған. Аның чооғынаң, пастағы теесте 9 майда Чиңіс кӱнін пайрамнығ иртіреріне тимнен саларға кирек. Ол ӱлӱкӱн чииттерні патриотизмге, Чир-суубысха хынарға ӱгретче. пайрам Чиңіс паркында паза Пастағы май площадьында иртер, чааҷылар, чаа техниказы маршнаң иртерлер.
Хакасияның пазы ідӧк культура сферазындағы мероприятиелерге тимненердеңер чоохтаан. Оларның аразында культура наследиезін хайраллир чоннар аразындағы 7-ҷі форум, театрлар фестивальы, чииттернің чайаачы фестивальы адалғаннар. пу мероприятиелерде пасха даа регионнарның, хазналарның ӧмелері араласчалар, анда наа таланттар сығысчалар. Улам амғы Чииттер чылында оларны пӧзік синде иртірерге кирек полар.
Чыылығда кӧп хайығ салылған студенттернің пӱдіріг отрядтарының чӧрімін тилідеріне. Студенттерге хайдар парарын, хайдағ специальностьтарҷа тоғынарын азынада пілерге кирек. Олар анда пастағызын на пӱдірігҷі специальностьтарын алчалар. Тоғынған ӱчӱн оларға хайди даа чал ахчазы тӧлелзін. Аннаңар оларға тоғыс пирҷең ізестіг организация таллирға кирек. Тоғынарға пасха даа регионнарзар парарға чарир, че республикада даа студенттерге тоғыс читкіҷе табылар, кӧзідімге, чолларны тыхтир тоғыстар толдыра.
Республикаа Россияның инвестиция форумына постың проекттерінең кіріп аларға кирек.
Хакасияда хара тас аныҷаң, энергетика, металлургия, транспорт отрасльларынҷа проекттер кӧп. Ағбан суғ кизіре тахта пӱдірілзе, таарлағ кӧп апарылар, аның сылтаанда тоғынҷаң наа орыннар тӧстелер, бюджетке хоза парыс кірер. Прай министерство-ведомстволарға федеральнай органнарнаң палғалыс тудып, хада-пірге тоғынарға кирек полар.
Хакасияның пазы наа тимір чол вокзалын Ағбанда пӱдіреріне алынҷа хайығ салған. Хайди ол таныхтаан, андар автобустар чӧрҷең орынны хос саларға киректелер. Аэропорт хыринда
автовокзал пӱдіреріне федеральнай кін чӧпсінмеен, аннаңар ам пасха оңдайлар кӧрерге кирек.
Чонға ӧрттердең, суғлар тазарынаң хорғыс полбазына ідӧк кӧп хайығ салылған. Пу сферадағы ведомстволарға муниципальнай пӱдістернең палғалыстар тудып, чонға хорғыс полбас мероприятиелер тимнеп саларға кирек.
Виктор Зимин таарығ тоғыстарына, малға азырал тимниріне, улуғ хоныхтарға аал хонии техниказын аларына устағҷыларның хайиин айландырған.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде