ХАКАСИЯА-НАА МАШИНАЛАР
10.01.2020
Хабарлар
Асхыстағы имнег туразына пирілген наа машинаның рульы кистінде - Павел АСОЧАКОВ
Имнег кирее. Хакасияа хазна хабазии хоостыра Наа чыл алнында 8 наа машина пирілген. Олар - табырах имнег полызии автомобильлері
Табырах имнег полызиин пирҷең машиналар клӱстері Хакасиядағы имнег тураларының ӧӧн имҷілеріне Г.Я.Ремишевскаяның адынаң республиканың имнег туразының ачығында пайрамни читірілген. Ол ачыхта изере 8 наа автомобиль турған.
Имнег киреенең айғасчатхан улусты танығлығ кӱннең алғыстааннар Хакасия пазының орындызы Татьяна Курбатова паза республиканың хазых хайралладаң министрі Владимир Костюш. Хайди таныхтаан Татьяна Анатольевна, пістің регионға халғанды чылларда хазна хабазиинда тиксі 68 наа автомобиль пирілген. Ам ағаа хоза 8 машина читірілген, хайзына 30 миллион азыра салковай хорадылған. Олар федеральнай бюджет ахчазына алылғаннар. Наа техника сылтаанда чонға имнег полызии тузында паза чахсы пирілер тіп ізендірген чооғында Татьяна Курбатова.
Владимир Костюштың чооғынаң, халғанды тӧрт чыл аразына табырах имнег полызиин пирчеткен автомобильлернің паркы 97 процентке нааҷылалған. Андағ танығлығ киректердеңер искіріп, министр пеер чыылысхан чонны ідӧк Наа чылнаң алғыстаан.
Кинетін соохтал килген кӱнде наа транспорт клӱстерін табыраанда пайрамни читір пиргеннер, алғыстас сӧстерін хысхаҷахти чоохтап. Табырах имнег полызиин пирдең ӱс машина Ағбандағы имнег туразына пирілген. Пірер машина - Саяногорсктағы табырах имнег полызиин пирдең станцияа, Асхыс паза Ағбан пилтірі аймахтарындағы ӧӧн имнег тураларына. Наа транспорт санында ікі реанимобиль полған. Оларның пірсін республиканың ӧӧн имнег туразына алар ӱлӱс тӱскен, ікіндізін - Перинатальнай кінге.
Асхыс аймааның ӧӧн имнег туразына пирілген наа автомобильнің рульы кистіне водитель Павел Асочаков одырған. Ол - улуғ опыттығ водитель. Шофёр полып, 1980 чыллардаң сығара істенчеттір. Асхыста имнег туразында 7 чыл тоғын салған, халғанды 3 чыл табырах имнег полызиин пирҷең машинаның «тінін» тут парча. Ағаа наа машинаны Асхыс чирінзер читір саларға ӱлӱс тӱскеніне ӧрінізін чазырбинчатхан. Наа транспорт пирілчеткеніне ідӧк имнег тоғынҷылары ӧрінчелер.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде