ОЛҒАННАРҒА ӰЛӰКӰН ӦРІНІС СЫЙЛААН
06.06.2017
Хабарлар
Хандых айының 1-ғы кӱні Олғаннарны арачылаҷаң чоннар аразындағы кӱн полған. Пу кӱнні прай тилекей чоны таныхтапча. Пістің дее Асхыста олғаннарға ӱлӱкӱн полды.
Асхыс суғ хазында, хас пазында, чон толдыра, кӧбізін олғаннар. Чол хыринда ниикке чӧрҷең машиналар изере турчалар, орай килгеннеріне пу чағында техниканы турғысчаң орын чоғыл. ГИБДД тоғынҷылары, полиция паза ӧрт ӱзірҷеңнер хайыныс чӧрчелер.
Сценада Культура туразының тоғынҷылары хайынчалар. Ойын пасталыбысхан. Чайаачы олғаннар школазының ӱгренҷілері постарының устарын кӧзіткеннер. Сценазар Раиса Сунчугашева устапчатхан «Таныҷах» теелбек олған ӧмезі сыххан.
Аннаң андар Культура туразының тоғынҷызы Екатерина Бытотова олғаннарнаң хада теелбектер пастаан. Сценаның ікі саринда киинең ӱбӱрткен батут-тура, анда палаҷахтар сегірестепчелер. Аттракционда олғаннар аккумуляторлығ машинаҷахтарда ойлат чӧрчелер. Пу аттракцион ээзі - Оксана Пышняк. Мындох почта тоғынҷылары олғаннарға хайхастығ сомнығ открыткалар, почта тартчатхан ойнаҷаң машинаҷахтар кӧзіткеннер.
Хости идінҷек Екатерина Шадрина олғаннарға аймах ойнаҷахтар сат парча. Сценаның пір саринда олған библиотеказының тоғынҷылары, палаларға викторинада аймах-пасха сурығлар пиріп, утханнарға сыйыхтар пирчеткеннер.
Ибіре кӱӱлек турча, олғаннарның ӧтіг табыстары динамиктер табызын пасчатханға тӧӧй. Сала мидееліг оолағастар ойын сағын таап алтырлар. Постаментке тӧӧй ниме турча, пӧзии 1 метрҷе полар, улии - 2х2 метр. Нинҷе-де оолах ӱстӱн-де турча, пасхазы, постаментсер сығара атығып, тігілерні тӱзіре сазыбызарға кӱстенче. Пірдеезі постаментте ӱр тур полбинча, тӱзіре тастадыбысчалар.
Хонҷых ааллардаң илееде аалҷы килгенге тӧӧй. Мин таныпчатханнар Пазадаң, Апчинайдаң паза Чоғархы Асхыстаң палаҷахтарынаң хада ӱлӱкӱнге килтірлер. Палаҷахтарға ойнап аларға хынығ. Оңдайында олар тосханҷа ойнап алған поларлар. Ӱлӱкӱн орайға теере полған.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде