СУРЫҒЛАР ПОЛЗА, АЙЛАНЫҢАР
21.06.2017
Хабарлар
Хакасия правительствозының прай министерство-ведомстволарында чуртағҷыларнаң тоғазығлар иртірҷең график тимнел парған. Ай сай аны регионның пазы чаратча. Хакасияның пазы Виктор Зимин ідӧк республика чуртағҷыларынаң тоғазығлар иртірче.
Ӱр ниместе республика пазынзар тоғазыға Ағбанда чуртапчатхан Стальмаков ирепчі килген. Хайхастығ сӧбіре, анда он папа ӧсче. Палалар ӧзіп одырчалар, турадағы душ улуғ сӧбірее чидіспинче. Тураа чапсыра мылча пӱдірер сағыс пар. Андағ пӱдіріг идіп аларға сидік полыбысханда, іҷе-паба, полызығ сурып, ӱлгӱзер айланарға чаратханнар. Тоғазығда Виктор Зимин мындағ улуғ паза ынағ сӧбіре ӧскірер кӧрістері ӱчӱн аалҷыларға алғызын читірген. Республиканың экономиказына сидік тее чухчатса, ол орынҷызы Валерий Марковха сӧбірее полые пирер оңдай табарға чахығ пирген.
Оларның соонда Виктор Зиминнің аалҷылары полғаннар Ағбан пилтірінең килген Нина Мусатова паза аның пис частығ Никита оолағы. Никита кічіг дее полза, республика пазы аннаң, хол пиріп, изеннескен. Сӧбіренің сидіксінізі - суғ. Суғ алҷаң колонка тасхар. Хысхыда ол тооп парча, чайғыда удаа тоғынминча. Суғ чох, тізең, истіг чуртас чоғыл. Виктор Михайлович кирек ноға піди хомай пол парғаннаңар орындағы ӱлгӱдең хайди даа сурар. Амды оларға суғ алҷаң орынны ибде ит пирерлер. Чахығны толдырарға июль ай пирілче. Хайди ол толдырылчатханын Виктор Михайлович позы сыныхтағда тудар.
Кізілернің сурығлары кӧп, Хакасия пазынаң тоғазып аларға ідӧк кӧп кізі сағынча. Че регион устағҷызынзар килер алнында, ноға сірернің сурииңар айланған орында пӧгілбееннеңер чоохтирға тимде поларға кирек. Хакасия правительствозы искіриинең, удаа сурығларны табырах пӧгібізерге нандырығлығ министрлерзер ле айланарға чарир.
Тоғазыға 9.00 - 18.00 частарда пу телефоннарҷа пазын саларға чарир: 8(3902) 299-189,8(3902) 299-168.
Ідӧк республика правительствозының сайтынҷа пазын саларға чарир: www.r-19.ru. Андар кірерге ӧӧн страницада «Общество» вкладка таап, сыххан менюда - «Интернет-приёмнайда» пазынарға кирек.
Хакасияның правительствозында пу адресче чуртағҷыларнаң тоғазығлар иртірҷең график: Ағбан г., Лениннің ор., 67, 106 каб.
22 ИЮНЬДА 10.00 частаң - хазых хайраллаҷаң министерство;
23 ИЮНЬДА 10.00 частаң - ис-пай паза чир хайызығларынҷа министерство;
27 ИЮНЬДА 10.00 частаң - экономика министерствозы;
28 ИЮНЬДА 15.00 частаң - республика пазы орынҷызының тоғызын толдырчатхан кізі;
28 ИЮНЬДА 10.00 частаң - транспорт паза чол хонии министерствозы;
29 ИЮНЬДА 10.00 частаң - национальнай паза территориальнай политика министерствозы;
30 ИЮНЬДА 10.00 частаң - социальнай арачыланыс министерствозы.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде