"САЯНЫ" КОМАНДА - ӰЗІНҶІ ОРЫНДА
10.03.2017
Хабарлар
Меспектіг хоккейҷе пӧзік лигадағы командалар аразындағы тиксі Россиядағы марығларның 2016-2017 чыллардағы сезоны тоозылды. Командалар Россияның суперлигазына сығар ӱчӱн марығласханнар.
Хакасияның «Саяны» командазы финал ойыннарында ӱзінҷі орынға сығып алған. Сыктывкар городтағы «Строитель» команда, марығда чиңіс тудып, Россияның супер-лигазынзар позына чол асхан. Таныхтирға кирек, суперлигазар ікі команда сыхча. Ікінҷі орында «Мурман» команда (Мурманск) пол парған.
Халғанҷы ойыннарда пістің команда Казахстандағы «Акжайык» команданаң тоғасхан. Чылығ кӱннер турыбысхан сылтаанда, пус нымзах полыбысхан. Че андағ сидік оңдайларда ойнаан даа полза, «Саяны» ыырҷызынаң хыринда узын чахсы кӧзіт пирген, 7:3 саннаң чиңіс тутхан. Пістің команда ӱчӱн турызып, ӱзер гол Александр Захваткин паза Фёдор Розвезев кирібіскеннер. Паза пip меспекті - Максим Бовт.
5 мартта пістің команда «Маяк» (Краснотурьинск) команданаң тоғасхан. «Саяны», 8:2 саннаң ізестіг чиңіс тудып, 9 саннығ турнирні тоосхан. Халғанҷы ойында «Саяны» команда ӱчӱн ойнапчатхан Александр Захваткин 3 гол «ыырҷы» хаалхазына кирген. Ідӧк пістің командада голларны Николай Верещагин, Андрей Хлюпин, Максим Бовт, Олег Селиверсткин паза Фёдор Розвезев киргеннер. «Маяк» командада Андрей Фелькер паза Евгений Царегородцев голлар киргеннер.
«Саяны» пӱӱлгі марығда, ирткен чылнаң тиңнестірзе, уйан арах ойнабысхан. Че іди дее полза, пістің хоккеисттер пик хылыхтарын кӧзіткеннер. Полған на ойында «Саяны» чиңіске прай кӱзін салған. Ізенчебіс, пазағы сезонда ол марығда мыннаң даа кӱстіг ойнир.
Автор :
Тимнеен Антон ЧЕРТЫКОВ
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде