ПРОФЕССИЯ ТАЛЛИРЫ - ООЙ НИМЕС
09.04.2019
Хабарлар
Хакасияның чонға тоғыс тапчаң служба тоғынҷылары, іҷе-пабаларнаң тоғазып, ӱгренҷілерге профессия таллир сурығҷа чӧптер пирчелер.
Хакасияның чонға тоғыс тапчаң службазы 1 - 10 апрельде город-аймахтарда іҷе-пабалар чыылығларын иртірчелер. Тоғазығларда сӧбіре палаа позына килістіре профессия таллап аларында хайди полыс поларынаңар чоох парча.
Республиканың чонға тоғыс тапчаң служба тоғынчылары іҷе-пабаларға амғы туста істеніс рыногындағы киректердеңер, регионда хайдағ специалисттер чидіспинчеткеннеңер искірчелер паза хайди палаа посха килістіре профессия таллап алардаңар чӧптер пирчелер. Ідӧк іҷе-пабалар чииттерге профессия таллап алар сурығ хоостыра чонға тоғыс тапчаң служба хайдағ мероприятиелер иртірчеткеннеңер піліп алғаннар.
Чонға тоғыс тапчаң служба тоғынчыларының таниинаң, олғаннарға посха килістіре тоғыс таап аларында паза пасха даа профессияа кӧстегліг сурығларны пӧгерінде іҷе-пабалар улуғ хозым итчелер.
Профессия таллиры - ол иң не сидік паза нандырығлығ таллағ. Аннаң кізінің таңдағы чуртазы палғалыстығ. Амғы туста Россияда, хай пірее танығларҷа, 10 муңҷа профессия саналча. Че оларның аразында ас ла саны саарбахтар аразында сабланча. Удаа ӱгренҷілер паза іҷе-пабалар, істеніс рыногындағы киректерні пілбин, ол-пу профессияны саба паалапчалар. Аннаңар чонға тоғыс тапчаң службазының пӧгіні - ӱгренҷілерге таңдағы профессиязын таллап алар ӱчӱн хабас пирері. Хайди даа олғаннарға паза іҷе-пабаларға істеніс рыногындағы киректеңер искірерге паза киректелчеткен профессиялардаңар, тоғыс орыннарын пирчеткеннернің кирексіністерінеңер паза даа пасха кӧп сурығдаңар чоохтап пирерге кирек.
«Россияда тоғыс» тиксі Россияның тоғыс банкының танығларынаң, производствода, пӱдірігде, имнег киреенде паза чир ис-пайын анирында киректелчеткен специалисттер чидіспинчелер.
Автор :
Ольга КАРТИНА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде