ХАЙДАҒ СІЛІГ ЧИР
14.08.2019
Хабарлар
Тузалығ ӱгредіг. Хакасиязар чайаачы кӧңніліг олғаннар хонҷых регионнардаң чайғы сай чыылысчалар. Мында оларға «Сойан тағларындағы кӱскӱ» ӱгредіг-пленэр иртче. Пӱӱл палалар Таштып аймаандағы «Сюгеш» тынағ базазында устарын таптадылар
Пӱӱл Хакасиязар Хызылчар крайынаң паза Кемеров облазынаң чайаачы кӧңніліг олғаннар килгеннер. Олар ікі чарылғаннар: чиит музыканттар паза хоосчылар. Пастағы подгруппада ӧӧнінде Хакасия чуртағӌылары. Анзы таңнастығ нимес. Кічіг частығ музыканттар ӧӧнінде хомыснаң ойнирында устарын ӧскіргеннер. Оларны Россия культуразының паза Хакасия культуразының саблығ тоғынӌызы, Ағбандағы А.А.Кенельнің адынаң олған музыка школазының пӧзік категориялығ ӱгретчізі Мария Сартыкова хакас чонның кӧг тириинең чахсы ойнирға кӧніктірген, мастер-класстар иртірген. Аның ӱгренӌілері сыбыра маңат тимненіс кӧзітчелер.
Кічіг частығ хоосчыларнаң Москвадаң килген ӱгретчі айғасхан. Кира Фахрутдинова Россияның хоосчылар академиязының Москвадағы хоосчылар лицейінде тоғынча. Хакасияда ол пастағызын на. «Сюгеш» тынағ базазы хайдағ сіліг чирде орныхчатханы аалӌының кӧңніне тың кірче. Тайға идеендегі кізіні изіртчеткенге тӧӧй арығ кии, ибіркі сіліг кӧрімнер палаларның кӧңнілерін матап кӧдірчеткеніне хайығ айландырча хоосчы-ӱгретчі. Тиксі Россияны санға алза, ағаа мындағ ӱгредіглерге чӧрерге килісчеткен осхас. Палаларнаң айғазарға, оларға мастер-класстар иртірерге ол хынча.
Москвадаң килген аалӌы Мария Сартыкованаң, «Сюгеш» тынағ базазының администраторы Наталья Сарагашеванаң паза даа пасхазынаң табырах танысхлап алған. Амды аның сурығлары тоозылбиныбысханға тӧӧй пілдірче. Ағаа прай ниме піліп аларға хынығ паза чапсых. Хакасияның аймах пулуңнарынаң паза хонӌых регионнардаң чыылысхан олғаннарнаң ідӧк кӱн тооза айғазарға, чахсы хоостирға ӱгрет саларға тимде. Позының тоғызында ӱгретчі аймах-пасха оңдайлар тузаланарға харасча. Чахсы оңар полбинчатсалар, сах андох кӧзіт сыхча, чарыда чоохтап пирерге кӱстенче. Палаларнаң хада чӧрчетсе, тус ирткенін сизінмин дее халча. Пірее килістіре орын табылза, олғаннарны хоостирға одыртхлабысча. Піреезіне, тізең, алынӌа чахығлар пирглеп саларға хынча. Андағ туста палаларның оңдай-хылии ӱгретчее уламох чахсы азылча.
Олох туста «Сюгеш» тынағ базазынзар Москвадағы В.И.Суриковтың адынаң хоосчылар институдының студенттері чиде салғаннар. Улуғ нимес делегацияның устағӌызы Сергей Олейников, саблығ хоосчы. Аалӌылар Хакасияның аймах пулуңнарында поларға маңнанғаннар. Студенттер кічіг частығ чайаачы устарнаң чағын нанӌылар полыбысханнар, пленэрге хада чӧр сыхханнар. Москвадаң килген студенттер, оларның устағӌызы Хакасиядағы искусство школаларының ӱгренӌілеріне, ӱгретчілеріне мастер-класстар иртір турарға тимделер. Сергей Олейниковтың хоостарын коллекционерлер хынып алчалар, пӧзік паалапчалар.
Пӱӱн, 14 августта, чайаачы кӧңніліг олғаннарның ӱгредігліг тынағ кӱннері тоозылча. Олар «Сюгеш» тынағ базазында пір неделя полғаннар. Амды палалар Таштып чирінде хайди тынанғаннарын, нимее ӱгреніп алғаннарын кізілерге кӧзіт пирерге киректер. Аннаңар 14 августта 14.00 часта Таштыпта А.И.Кыжинаевтің адынаң культура туразында хомыснаң ойнирға ӱгренген палалар, оларның ӱгретчізі устарын кӧзідерлер, концерт турғызарлар. Кічіг частығ хоосчылар, тізең, чайаачы тоғыстарын орындағы Культура туразының фойезінде кӧзідіге сығарарлар. Андағ оңдайнаң аалӌылар Таштып аймааның устағ-пастаана постарына чахсы, тӱзімніг тынанып, ӱгреніп алар оңдай пирген ӱчӱн алғыстарын читірерлер.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде