СПОРТКОМПЛЕКСТЕ ТИКСІ ТЫХТАҒ ТОҒЫЗЫ ИРТЕР
20.10.2021
Хабарлар
Тоғыс чорығы. Пу кӱннерде Хакасия пазы Валентин Коновалов Боград аймаанда пол килген. Чорых тузында ол Бородинода полып аларға, аал чӧптерінің чыылиинда аралазарға паза чуртағӌыларнаң тоғазарға маңнанған
БОРОДИНОДАҒЫ СПОРТКОМПЛЕКС
Хакасияда спорт инфраструктуразы саринаң Боград аймаанда киректер иң уйан полар, неке. Аймахта пір ле спорткомплекс. Ол Бородино аалда орныхча. Алында Боградта паза Улуғ Чорбада спорткомплекстер полған, че олар чабыл парғаннар. Іди дее полза, аймахта пауэрлифтинг, армиядағы холазахнаң тудыс паза гиря кӧдірер спорт чахсы тиліпчелер. Анзын орындағы спортсменнернің чидіглері киречілепче. Кӧзідімге, амды сабланчатхан Даниела Колесник Сарығ хас аалдаң. Пауэрлифтингче тилекей чемпионы спортта пастағы хаалағларын тӧреен аалында иткен. 15 частығ Александр Каур Боградтаң, пӱӱл мартта армиядағы хол-азахнаң тудысча Россияның первенствозында чиңіс тутхан. Саарбах орындағы «Боград» чааҷы-спорт клубында узын таптапча.
Гиря кӧдірер спортнаң айғасчатханнарны алынҷа таныхтирға кирек. Бородинодағы тренер Александр Шипилёвтың устаанынаң оол-хыстар Россия синіндегі марығларда тӧреміл чиңіс тутчалар. Че спортсменнернің тренировкалар иртірер оңдайлар тың на чахсы нимес. 1987 чылда пӱдірілген спорткомплексте тиксі тыхтағ тоғыстар иртірерге кирек. Орындағы ӱлгӱлер, пу сурығны пӧгіп, Хакасия правительствозынзар айлантырлар. Республика пазы Валентин Коновалов, Боград аймаанзар чорыхха сығып, иң пурнада Бородинодағы спорткомплексте пол килерге чаратхан.
Анда Валентин Олеговичті Хакасияның спорт министрі Сергей Кочан, Боград аймааның пазы Сергей Клименко, Бородино аал чӧбінің пазы Елена Думбровская, спорткомплекстің директоры Сергей Наумов удурлааннар. Спорт пӱдіриинің тиксі улии - 1357,9 квадрат метр, мында спортзал паза бассейн пар. Че бассейн орныхчатхан пӧлік хаҷанох изел партыр. Тиктең нимес учреждениенің устағҷызы Сергей Наумов экскурсия тузында піреезі кинеп парар тіп чочынған. Министр Сергей Кочанның таниинаң, пу пӧлікте бассейн орнына ікінҷі зал идібізерге чарир. Спортзалның улии 967,9 квадрат метрге тиңнелче. Ол улуғ кирексіністе. Кӱннің сай пеер 75 кізі чӧрче, ӧӧн чардығы - олғаннар. Спорткомплексте волейболча, ниик атлетикача, футболча, пауэрлифтингче паза гиря кӧдірерінҷе секциялар тоғынчалар, аймах марығлар тӧреміл иртірілчелер. 2020-2021 чылларда ла анда 800 спортсмен араласхан. Спорт тиріглері чидіспинчеткен сылтаанда олғаннар тренировкаларда гирялар орнына пластик ідістерні кӧдірчелер. Оларның улии - 5 литр.
Пу сурығнаң спорт министерствозы полыс пирерге тимде. Чыл тоозылғанӌа ведомство гирялар ал салар.
Тиксі тыхтағ тоғыстарынаңар чоохтаза, пӱӱл спорткомплекстің хыры алыстырылар. Аны ӧтіре наңмыр паза хар кірче. Пирілген субсидияның сині - 400 муң салковай. 2022 чылда спорткомплекстің стенелері нааӌылалар, наа поллар тӧзелер, чылығ пирӌең паза канализация системалары алыстырылар. Ол пӧгіннең республика бюджедінең 1 миллион 225 муң салковай позыдылар. Ідӧк пӱӱл Боградта «Спорт - чуртас сині» федеральнай программа хоостыра ГТО ачығы тимге сығар. Тоғыстар хыызында парча. Аның соонда 40х20 квадрат метрліг футбол чазызы тӧзелер.
ЧЫЫЛЫҒ
Тоғыс чорығы чыылығнаң узарадылған. Ол Боград аймааның администрациязында ирткен. Мероприятиені азып, Валентин Олегович Боград аймааның пазы Сергей Клименконың тоғызына пӧзік паалағ пирген. Аның кӱстенізінең аймах ікінӌі чылы изере чылығ пирӌең тусты тузында пастапча. Хакасия ӱлгӱлері аймахтағыларны полызығ чох артыспинчалар. 2021 чылда ла правительство орындағы коммунальнай комплексті нааӌылирына 35 миллион салковай позытхан. Ол ахчаа Сон пазы паза Сарығ хас аалларда котельнайларда паза чылығ пирӌең сетьтерде тиксі тыхтағ тоғыстары иртірілгеннер. Боградта канализацияны паза суғ пирӌең системаны тыхтабысханнар. Бородинода котельнайның туразын нааӌылабысханнар. Ідӧк Пушной аалзар модуль-блоктардаң пӱткен котельнай алылған паза тузаланысха кирілген.
В.О.Коноваловтың соонда Боград аймааның пазы Сергей Клименко сан пиріс иткен. Сергей Васильевичтің чооғынаң, прай котельнайлар тоғынчалар, хара тас читкіӌе. Че аал чӧптерінің алымнары кӧп. Знаменкадағы аал чӧбінзер 4 аал кірче, суғ ӱчӱн чуртағӌыларның пірдеезі тӧлирге хынминча. Андағох сидіксініс Улуғ Чорбада. Пӧзік хас аал чӧбінің чарытхы ӱчӱн алымнары 14 миллион салковайға чит парған. Пушной аал чӧбінің - 8 миллионға. Оларға налогтар паза чарытхы ӱчӱн тӧлирге кирек. Троицкайдағы муниципальнай унитарнай предприятие (МУП) чахсы тоғынча, алымнарын чабызарға оңдай таапча. Бородинодағы МУП - банкрот, анда наа предприятие тӧстелер. Аймахтың устағ-пастаа аал чӧптерін хайығ чох артыспинча, ағырсымнығ сурығларны пӧгерге полысча. Іди полза, ЖКХ полномочиелерін ааллар синінең аймахтар синіне пирерге кирек пе? Аал чӧптеріндегі МУП-тарны пір предприятиее піріктірзе, ол тӱзімніг тоғын полар ба? Тӱрчедең тасхар соохтар турыбызар. Аймах позына прай алымнарны алып алза, счеттарға арест салыл парарға айабас.
Сергей Клименконың сурығларына Хакасияның пӱдіріг паза ЖКХ министрі Валерий Келин нандырған. Хайди таныхтаан Валерий Александрович, аал чӧптерінің прай пу тоғыстарын апарарға специалисттер, ахча чидсіпинче. Хакасияда, тізең, прай сетьтер ортымахти 70 %-ке иргілен парғаннар. Оларны федеральнай ахчаа нааӌылабызарға чарир. ЖКХ полномочиелері ааллар синінде халза, республика пір федеральнай программаа даа кір полбас. Хакасия правительствозы аймахтарға ахчанаң, техниканаң полыс пирер. Чахсы тоғынчатхан МУП-тарға теңмеске кирек. Алымнар суриин пӧгібізер оңдай тілирлер.
Чыылған чон министр В.А.Келиннің чооғынаң чарасхан, законопроекттең тоғыр полбаспыс теен. Муниципалитеттер адынаң Татьяна Шевченко чоох тутхан. Ол Сарығ хас аал чӧбінең устапча. Татьяна Николаевна оларға ӱгредігліг семинарлар иртір турарға сурынған. Іди Хакасияның национальнай паза территориальнай политика министерствозы тоғынчаттыр. Салтарларында Боград аймааның аал чӧптері, марығларда аралазып, ахча утып алчалар. Анзы хай пірее сурығны пӧгібізерге оңдай пирче.
ЧУРТАҒҶЫЛАРНАҢ ТОҒАЗЫҒ
Кибір хоостыра чорыхтың халғанӌызынзар Хакасия пазы Валентин Коновалов чуртағӌыларнаң тоғасхан. Пушнойдағы аал чӧбінің депутады Ольга Галимулина чир-суғӌызы Екатерина Васильеваа полыс пирерге сурынған. Ипчі чалғызан ӱс паланы ӧскірче. Позы онкологиянаң ағырча, II группаның кинегі полча. Тун палазына пылтыр уйаларына операция иткеннер. Диагноз - Юинг саркомазы. Че паланы Москвазар апарып, диагнозты орта турғызарға кирек. Екатерина Васильеваның одың даа алар ахчазы чоғыл. Валентин Коновалов профильнай ікі министерстваа сидіксіністе чуртапчатхан ипчее полызарға чахығ пирген.
Толча аалның чуртағӌызы Лидия Оберемконы суғ сурии сағыссыратчаттыр. Ол позы аал клубынаң устапча. Анда, тізең, тиксі тыхтағ тоғыстары пір дее иртірілбеен. Хазна программаларында аралазарға кӱстентірлер, че кирек киліспиндір. Валерия Лыкум республика пазына Пушнойдағы фельдшер-акушер пункты нааӌылалған ӱчӱн алғызын читірген. Че имнег учреждениезінде мебель иргі паза хайди даа компьютер кирек. Лидия Пигалева - Пӧзік хас аалның чуртағӌызы. Аалның ӧӧн чардығында тасхар чарытхы пар, че оларның орамазында харасхы. Михаил Калюкшин Боград аалдағы Лениннің орамазында чол тыхтабызарға сурынған. Андар таксисттер дее чӧрерге хынминчалар. Прай сурыныстар санға алылғаннар. Оларны министерстволар пӧгерлер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
28 | 29 | 30 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде