МИРГЕН АТЫҒҶЫЛАР УСТАРЫНАҢ СЫНАСХАННАР
29.03.2019
Хабарлар
Спорт. Асхыста С.З.Карамчаковтың адынаң спорткомплексте охчаадаң таңма атчаңнар марығласханнар.
Пу марығны Асхыстағы спорт комитет тимнеен, оларға Ағбандағы «Ирбис» клуб матап полыстыр. Марығлар таңдади Асхыстағы охчаадаң атарынҷа тренер Юрий Ильич Аёшинге «Ирбис» клубтың тренері Иван Викторович Шевченко, полызып, таңмалар хазаҷан маттар хоза ағыл пиртір.
Марығны «Часхы соғаннар» адааннар. Анда, Ағбандағы паза Асхыстағы спортсменнердең пасха, хонҷых Тувадаң килгеннер араласханнар. Оларның улуғ делегация полған - 50 азыра спортсмен. Прай, тізең, 100-ке чағын кізі араласхан.
Таңмаҷа атары пасталыбысхан, марығны олғаннар пастааннар. Прайзы ах кип-азах кистір. Морсымнығ кӧрінчелер. Мындағ улуғ марығны иртірерге пістің тренерлерге тувадағылар полысханнарох.
Пасхаҷыл марығ. Ибіре амыр, сымзырых. Охчаалар хыллары хыылаза тӱсче паза соғаннар, таңмаа теңзелер, торли тӱсчелер, айа сабызы истілче.
Олғаннар марии кӱн тооза ирткен. Артыхтарны алғыстас пічіктерінең, медальлардаң пасха, сувенирлернең сыйыхтааннар.
Ікінҷі кӱнінде улуғлар марығласханнар, классическай паза блочнай охчаалардаң атып. Анаң хазии уйаннар алынҷа марығласханнар. Оларның аразында классическай паза блочнай охчаалардаң ідӧк атчатханнар ікі чарылғаннар.
Тува спортсменнері аразында чоннар аразындағы класстығ спорт узы, нинҷе-де спорт узы, спорт узына кандидат килтір. Олар прайзы кинектер, коляскалығ чӧрчелер.
Пір хыснаң пос тілінең чоохтазып пастадым. Хакас хыс полтыр - Бела Шарафутдинова, хыс фамилиязы - Боргоякова.
- Охчаадаң атарға наа ла пастапчам, - тидір ол. - Ағбандағы «Ирбис» клубсар чӧрчем, блочнай охчаадаң атчам. Ол классическай охчаадаң пасха арах. Хылын пастап тартчатсаң аар пілдірче. Че читіре тартыбыссаң ниик пілдірче. Аннаңар кӧстирге оой. Сала ӱр арах таа кӧстепчезiң. Классическай охчааның хылын тарт салып, ӱр кӧстеп полбассың, хол, салаалар, пілегің тал пастабысчалар. Охчаадаң атып марығласчатсаң атарға ӱгрентеечетсең, кізі сағызы саңай анда, пасха сағыстар паста чоғыл. Аннаңар чуртас сидіксіністері кидер парыбысчатханға тӧӧй.
Юрий Аёшиннең кӧмес чоохтасхам, ӱр ниместе аннаңар пістің газетада пазылған полған. Ол Исте паза Асхыста ӱзер кӱн тоғынча. Кӧрінче, ол тыс пілбес кізі, тоғызына прай пирін салтыр. Марығлар иртчеткен туста Апчанай аалдаң мини-футбол мариина Москвазар парыбысхан хызыҷахтар, андағыларны хыра утып, пастағы орын алып алтырлар тіп искіріг читкен. Юрий Ильичтің анда ӱс хызыҷах полтыр.
Марығ тузында ноо даа кізінең чоохтасса, прайзы тидір, охчаадаң атарынҷа марығларны тилідерге кирек. Пістің чон хаҷаннаң охчаадаң мирген атчаң. Кип-чоохтарда Ир Тохчын, пӱӱрлерні сӱрізіп, оларны ат ӱстӱнең улуғ чӱгӱрісте атча. Юрий Аёшиннің кӱстенгені сылтаанда пу спорт кӧрімі мыннаң мындар тилир.
Сағам, тізең, пьедесталда саңай тува спортсменнері турыбысханнар. Хазии уйаннарның аразында, классическай охчаадаң атып, ӱзінҷі орын алған Ағбанннаң килген Алексей Боргояков. Ол спорт устарынаң пір дее халбин атхан. Анзы уғаа поғдархастығ.
Мындағ марығ Асхыс чирінде ікінҷізін ирткен. Кӧрігҷілерге, спортсменнерге паза тренерлерге хозылчам, охчаадаң атарынҷа спорт кӧрімін тилідерге кирек.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде