ФОРУМ ХАКАСИЯА ТӰЗӀМНӀГ ИРТКЕН
11.06.2019
Хабарлар
Иркутск облазының пазы Сергей ЛЕВЧЕНКО паза Хакасияның пазы Валентин КОНОВАЛОВ пірге тоғынардаңар чӧптезігде хол салғаннар
Экономика форумы. Хакасия Санкт-Петербургтағы чоннар аразындағы экономика форумында араласханының салтарлары.
РЕСПУБЛИКАА КИРЕК СУРЫҒЛАР ӰЗӰРІЛГЕН
Хакасия пазы Валентин Коновалов Санкт-Петербургтағы чоннар аразындағы экономика форумының тоғызы хоостыра сағыс-кӧрізінең ӱлескен. Регион устағҷызы таниинаң, форум ӱзӱріглері тузында республикаа уғаа кирек сурығлар ӱзӱрілген, ол санда сӧп-сап реформазын чуртасха кирерінҷе паза экономика ӧзізіне килістіре оңдайлар тӧстирінҷе.
- Форум Хакасия делегациязына тӱзімніг иртче. Мин нинӌе-де площадкада араласхам. Пӱӱн Россия Сбербанкынаң чӧптезіг иділген, хайзынӌа кічіг паза ортын бизнеске хабасчаң пӱдіріг отрасльын тилітчең, чуртағӌыларға чурт аларға полысчаң паза аннаң даа пасха программалар кӧрілче. Сағынчам, республика форумнаң нинӌе пар тузазын алып аларға кирек. Форумның ікінҷі кӱні андағох тузалығ полар. Москвадағы улуғ компаниялар устағӌыларынаң тоғазығлар иртер паза Хакасияның ӧӧн отрасльларын тилідер кӧстегліг чӧптезіглер иділер, - чоохтап пирген регион устағҷызы Валентин Коновалов.
РЕГИОННАРНЫ ТИЛІТЧЕҢ СУРЫҒЛАР
Хакасия пазы Валентин Коновалов экономика форумының ӱзӱріглерінде араласхан. Пленарнай ӱзӱрігнің кӱн суриинда регионнарның экономиказын тилітчең сурығлар полған.
«Россия экономиказы ӧзіс оңдайларын тілепче» ӱзӱрігнің кураторлары Россия правительствозы кнезінің пастағы орынҷызы Антон Силуанов, Россияның экономика тилізі министрі Максим Орешкин паза Россия Центробанкының кнезі Эльвира Набиуллина полғаннар. Хырығ озаринаң килген спикерлер аразынаң Европадағы банк федерациязының президенті Фредерик Удеа чоох тутхан.
Эксперттернің кӧрізінең, экономика ӧзізінің ӧӧн кӱс оңдайлары істеніс ресурстары, инвестициялар паза сығарыс тӱзімі полча. Экономика отрасльын тилідеріне мына пу кӧстеглерҷе тоғысты тыыдарға кирек. Алынҷа хайығ кирексіпчелер инвестиция, сын конкуренцияа килістіре оңдайлар идері, бизнесті арачылиры паза хабазары, хырығ озариндағы партнерларнаң палғалыстар тӧстирі паза экспортты алғыдары.
ХАЙДИ СӦП-САПТЫ ЧИҢІП АЛАРҒА
Форум араласчылары сӧп-сап реформазы олаңай нимес, че стратегия саринаң уғаа кирек сурығ тіп таныхтааннар. Форумда сӧп-сап реформазын чуртасха кирерінең палғалыстығ сидік сурығларны пасха хазналар хайди пӧкчеткені кӧрілген.
Ӱзӱрігнің ӧӧн спикерлері аразында Хазна Думазының экологияҷа паза ибіркі чир-чайаанҷа комитедінің кнезі Владимир Бурматов паза Россияның чир-чайаан ис-пайы паза экология министрі Владимир Логинов полғаннар.
Форум араласчылары сӧп-сапты чох идерінең паза олардаң ниме-ноолар сығарарынаң палғалыстығ сидік сурығларны пӧкчең чолларны таныхтап салғаннар. Ол - инвестициялар кирері, наа технологияларнаң тузаланары, пасха хазналар опыдынаң тузаланары паза сӧп-сап реформазын чуртасха тӱзімніг киреріне инфраструктура пӱдірері. Ӱзӱрігде тилекей синіндегі эксперттер араласханнар.
Россияның кӧп субъекті сӧп-сап реформазын чуртасха кирерінде аймах сидіксіністерге урунча. Хакасияда андағох кирек. Мындағ тӱзімніг тоғазығлар паза ӱзӱріглер сылтаанда істіндегі сидіксіністерні пӧгері наа синзер сығарылча.
РОССИЯ СБЕРБАНКЫНАҢ ЧӦПТЕЗІГ
Петербургтағы экономика форумында Хакасия правительствозы паза Россия Сбербанкы пірге тоғынардаңар чӧптезіг иткеннер. Пічікте Хакасияның пазы Валентин Коновалов паза Сбербанк устааның кнезі Герман Греф хол салғаннар. Чӧптезігҷе республиканың чуртас-экономиказын тилідер кӧстеглерҷе ахча-кредит сферазында пірге тоғынары кӧрілче.
- Россияның иң улуғ банктарының пірсінең пірге тоғынары Хакасияның экономика кӱзін тилідеріне уғаа кирек. Піс чуртағӌыларның чуртас синін чахсыландырарына кӧстелген полған на пастаға удур парчабыс. Мындағ пірге тоғыс инвестиция проекттерін чуртасха кирерге оңдай пирер. Улам коммунальнай комплексті паза транспорт инфраструктуразын чахсыландырар социальнай кирексіністіглерні, - таныхтаан Хакасия пазы Валентин Коновалов.
Чӧптезігҷе регионның инфраструктуразын, ол санда промышленность сығарызын, агропромышленность комплексін, энергетика, туризм паза пасха отрасльларны, тилідеріне кӧстелген инвестиция проекттерін чуртасха кирерінде пірге тоғынары кӧрілче.
- Пу чӧптезігде хол салғаны Сбербанк чылығ, суғ пирӌең системаларзар энергия саринаң тӱзімніг паза ӱзӱрлестіг технологиялар кирӌең аал-городтарның инженер инфраструктуралары системаларын нааӌылаӌаң, ідӧк экология саринаң хорғыс чох идерін паза ибіркі чир-чайаанны арачылирын ӧскірҷең программаларға, хайзылары Хакасия чуртағӌыларына уғаа кирек, кредит пирерінде аралазарын таныхтапча, - таныхтаан Герман Греф.
Оӧн кӧстеглер санында - экономика ӧзізі хаалағларын айныдар кӧстегнең наа технологиялар кирері паза пӧзік технологиялығ сығарыстарны тилідері. Ідӧк регионда таарлағлар паза пассажирлер тартар системаны чахсыландырарынҷа пірге тоғынары кӧрілче.
НАЦПРОЕКТТЕРНІ ЧУРТАСХА КИРЕРІ
Хакасияның пазы Россияның Хазна Чӧбінің чӧптезігліг комиссиязынын чыылиинда араласхан. Чыылығның ӧӧн сурии - «Национальнай проекттерні чуртасха кирері: регионнар бюджеттерінің оңдайлары паза пик полары». Чыылығ Россия президенті администрациязы устағҷызының пастағы орынҷызы Сергей Кириенконың устаанынаң ирткен.
Национальнай проекттерні чуртасха кирері 2024 чылға теере кӧрілген. Республика оларның 11-інде араласча. Амғы тусха региондағы 49 проекттің паспорттары тимнелген паза чарадыға алылған, оларҷа федеральнай министерстволарнаң 39 чӧптезіг иділген. Ідӧк республиканың Тиліс чӧбінде стратегия тилізінҷе паза национальнай проекттерҷе комитет тӧстелген.
- Нацпроекттерні чуртасха кирерінің ӧӧн кӧстее - кізілернің чуртазын чахсыландырары. Аны Россия президент турғысхан, Хакасия чуртағӌылары чахсы саринзар алызығлар полчатханын сизінеріне піс прай кӱзібіс саларға кирекпіс, - таныхтаан Хакасияның пазы Валентин Коновалов.
Амғы туста республикада нацпроекттерні чуртасха кирерінҷе стратегия тоғызы апарылча. Тиксі нацпроекттер хоостыра 2024 чылға теере республиказар 32 миллиард салковай кирерге пӧгінілче.
ЧИИТТЕР КИРЕКТЕРІНҶЕ ТОҒАЗЫҒ
Экономика форумының ікінҷі кӱні андағох тӱзімніг паза тоғазығларға пай полған. Хакасия пазы Валентин Коновалов пастап Чииттер киректерінҷе федеральнай агентство устағҷызы Александр Бугаевнең тоғасхан.
Сариларның пірге тӱзімніг тоғыс апарҷаң кӧп оңдай пар. Кӧзідімге, агентство Подмосковьеде чиит специалисттерге хазнаның чииттер политиказының ӧӧн пӧгіннерінең таныстырар кӧстегнең ӱгредіг иртіріп пастабысхан. Амды анда «Сағыстар чирі» площадка чыл ибіре тоғынар. Хакасия специалисттері ол ӱгредігліг мероприятиелерде амох аралазарға маңнанғаннар. Республика пазы Александр Бугаевке пістің регионға хайығ салчатханы ӱчӱн алғызын читірген.
Хакасияда Россия чииттерінің «Тиң тиңе чоохтазығ» федеральнай проекті чуртасха ӧткін кирілче. Чоохтазығ тузында регион пазы Александр Бугаевті ол проектте аралазарға ааллап хығырған.
ХАКАСИЯНАҢ ИРКУТСК ОБЛАЗЫ ПІРГЕ ТОҒЫНАРЛАР
Хакасия паза Иркутск облазы правительстволары аразында чӧптезіг иділген. Ол чӧптезігҷе регионнар чуртас-экономика, культура паза наука-техника хоостыра пірге тоғынарлар тіп кӧрілче. Регионнар устағңылары Петербургтағы чоннар аразындағы экономика форумында пу чӧптезігде хол салғаннар.
Сарилар опытнаң ӱлезерге, кічіг паза ортын бизнес, пӱдіріг, аал хонии, промышленность сфераларында паза аннаң пасха даа отрасльларда удур-тӧдір полызарға пӧгінчелер.
Ідӧк инвестиция тоғызы сурығларынҷа, чурт-коммунальнай хоных технологияларын тилідерінҷе пірге тоғынары кӧрілче.
*****************************
"Хабар" газетаның толдыра хабарларын хығырып аларға чарир PDF-кӧрiмiнде. Чарым чылға 200-ле салковай турча.
Пазыңар почтаға, ахча тӧлеглерiнiң реквизиттерiн анда ыс пирербiс.
Пазыңар почтаға, ахча тӧлеглерiнiң реквизиттерiн анда ыс пирербiс.
Редакцияның адрезi:
655017, Ағбан г.,
Щетинкин орамазы, 34,
www.khakaschiry.ru
e-mail: stranahabar@mail.ru
Автор :
Хакасия пазының администрациязы
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде