ЧИИТ ӰГРЕТЧІЛЕРГЕ ХАБАЗАР ПӦГІННЕҢ
14.02.2020
Хабарлар
Хакасияның Оӧркі Чӧп кнезі Владимир Штыгашев 12 февральда президиумның теестегі чыылиин иртірген
Чыылығның ӧӧн сурығлары республика законнарынзар алызығлар кирчеткен закон проекттері полғаннар. Закон проекттерінің пірсі ӱгретчілер праволарынаң паза социальнай гарантияларынаң палғалыстығ. Хайди искірген Хакасияның ӱгредіг паза наука министрінің орынҷызы Елена Конева, «Хакас Республикадағы ӱгредігдеңер» Хакас Республика Законының 2 паза 19 статьяларынзар алызығлар кирердеңер» закон проектінде чоох парча «чиит специалисттердеңер». Орта чоохтаза, ол категорияа кемнер кірчеткенін чарыт салардаңар.
- Амғы туста муниципальнай ӱгредіг учреждениелері «чиит специалист» оңнағны аймах-пасхали оңарчалар, - чарытхан Елена Конева. - Салтарында пірее чиит ӱгретчілерге «чиит специалист» статус пирілбин парча.
Пу киректі тӱзедер пӧгіннең республиканың ӱгредігдеңер законынзар алызығлар кирілче. Анда «чиит специалист» категорияа кемнер кірчеткені чарыдыл парар: «35 частаң улуғ нимес, пастағызын на ортымах профессиональнай алай пӧзік ӱгредіг алған соонаң 5 чылдаң орай нимес Хакас Республиканың хазна ӱгредіг организациязында алай муниципальнай ӱгредіг организациязында ӱгретчі тоғызын пастабысхан ӱгредіг тоғынҷызы».
Министр орынҷызы чооғынаң, пу оңдайнаң кемні чиит специалистке санир кирексіністер прай турғызыл парар. Ағаа хоза ӱгредіг соонаң тоғынып пастирына пирілчеткен тус ӧскіріл парар - амғы тустағы ӱс чылдаң пис чылға теере. Ікінҷізі ӱгредіг соонда декретте пол парған ӱгретчі ипчілерге хабазар тіп кӧрілче. Пу оңдайнаң оларның социальнай хабазығ пирчеткен «чиит специалист» категорияа кіріп аларына тус пар полар тіп кӧрілче.
Президиумдағылар республика законынзар пу алызығларны кирерге киректелчеткенінең чарасханнар, че олох туста ӱгредіг соонаң тус турғызылчатханы хоостыра ікінҷілестерінең ӱлескеннер: чиит ӱгретчі тоғысха кірче, 35 часха читкелек, че профессиязы хоостыра ол 5 чыл тоғынмаан - ол «чиит специалисттер» санынзар кір полбас пол парча.
- Пу сурығ алынҷа хайығ кирексіпче, - таныхтаан Оӧркі Чӧп кнезінің пастағы орынҷызы Юрий Шпигальских. - Ол чиит специалисттерге хоза тӧлеглер ле пирбинче нооза, мында ідӧк ӱгредіг тоғынҷызының алынҷа статузынаңар чоох парча.
Салтарында Оӧркі Чӧп президиумы Хакасия правительствозы кирчеткен закон проектін чағынғы сессияның ӱзӱриине сығарарға паза закон проектінҷе ӱзӱрігні анда узарадарға чарадығ алған.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде