166 МИЛЛИОН САЛКОВАЙ - ӦӦН КИРЕКСІНІСТЕРГЕ
27.03.2020
Хабарлар
Ахча сурии. Хакасия ӱлгӱлері ирткен чыл тоозылчатхандох республикада ахчанаң сидіксіністер парын таныхтааннар. Олох сылтағнаң правительство резерв чыындызынаң 166 миллион салковайны ӧӧн кирексіністерге позыдарға чаратхан
Пу искіріг пастағызын тарадылғанда, республика чуртағҷыларына ахча хайдағ чыындыдаң алылчатханы толдыразынаң чарыдылбаан. Аннаңар піреезі ахча Хакасия правительствозының сағыбаан саайларны паза хорылыстарны полдыртпазынҷа паза ӱреглерні чох идерінҷе резерв чыындызынаң алылча тіп сағын салған. Сынында, тізең, ол Хакасияның резерв чыындызынаң алылча. Ноға мындағ чарадығ алылғанын чарытча Хакасия пазының орынҷызы - финанстар министрі Ирина Войнова:
- Хакасияның пар ікі резерв чыындызы: республиканың резерв чыындызы паза саайлар тузына кӧрілген резерв чыындызы, - таныхтаан Ирина Ивановна.
- Хакасия правительствозының чарадиинҷа ахча позыдылар ӧӧн кӧстеглерні чарыт пирерге сағынчам. Тиксі 166 миллион салковай позыдылча. Нимее? Аның ӧӧн чардығы - 60 миллион азыра салковай - 3 - 7 частығ палаларға социальнай тӧлеглерге хоза ахча пиреріне позыдылча.
Ол Россия президентінің Федеральнай Чыылиинзар айланызы хоостыра иділче. Сағысха кирчебіс, аймах хабазығ кӧрімнері уғаа кӧп таныхталған, ол санда 3 - 7 частығ палаларға тӧлеглер. Федеральнай кін регионға субсидия пирче, піске, тізең, позыбыс чардығын тимнеп саларға кирек: тиксі хорадығларның 91 процентін федеральнай кін пирче, 9 процентін - республика бюджеді.
Іди 60 миллион салковай пу кӧстеге кӧрілче.
Аннаң пасха, 20 миллион салковай Чоғархы Пазадағы школа пӱдіриине ызылар. Пӱдіріг тоозыл таа парир, че подрядчикнең саназыбызарға кирек.
40 миллион азыра салковай - Хубачарда имнег туразының пӱдіриин тоозарына. Прайзы пілче, ол имнег туразын 10-ҷа чыл пӱдірчеткенібісті. Орындағы чуртағҷылар ізеністерін чідір тее салғаннар. Ағаа хоза, ирткен чылда «Аалларның амғы кӧрімі» программаа пічіктер тимнеебіс, марығда араласханда, пу чылға имнег туразынзар оборудование аларына 50 миллион салковай федеральнай ахча пиргеннер. Аннаңар пу имнег туразын пӱдір саларға кирек.
Культура министерствозына 13 миллион салковай кӧріл парған. Социальнай сетьтерде чон тоғырланчатханын хығырғам. Ӧрттер сығызарына хорғыстығ тус, піс, тізең, культураа... Таныхтапчам, ол 13 миллион салковай 9 Майны таныхтирына кӧрілче. Полған на чыл 9 Майға, Республика кӱніне, выпускнойға піс килкім ахча хоратчабыс: чарытхы, искіріг оборудованиезі, экраннар арендаа алылчалар... Пӱӱл ол нимені прай садызып аларға чарадығ алылған. Чиңіс кӱнін, Республика кӱнін, выпускнойны алза, олох ла ахча киліс парарҷых, ол ахчаа оборудованиені сыбыра арендаа ал турған ползабыс.
Таныхтирға кирек, Хакасияның резерв чыындызында 30 миллионҷа салковай халған. Хакасия пазының орынҷызының таниинаң, киректелзе, ол ахча ідӧк саайларны полдыртпазынҷа паза чох идерінҷе резерв чыындызын толдырарына позыдылар. Ирина Войнова республика сағыбаан саайларға хорғыстығ тусха тимде тіп санапча, че хоза хорадығлар киректелбезіне ізенче.
Ирина Ивановна ідӧк республика пӱӱл федеральнай бюджетке айландырар ӧдіс чардығын соонаң тӧлир оңдай сығызарын чарыт пирген. Чоох парча асхынах нимес ахчадаңар - 1,4 миллиард салковайдаңар. Аны Хакасия федеральнай кінге 2017 чылда иділген чӧптезіг хоостыра пӱӱл айландырарға кирек. Тиксі алза, республиканың федеральнай бюджетке ӧдізі 14 миллиардча салковайға тиңнелче.
- График хоостыра 1 миллиард 400 миллион салковайны республика пӱӱл октябрь-ноябрьда тӧлирге кирек, - чарытча республика пазының орынҷызы. - Тиксі ӧдістің 10-ынҷы чардығы. Че бюджеттің улуғ сидіксіністерін - хара тас отрасльынаң парысха пір дее налог кірбезін, алюминий отрасльында налог сині кӧп нимес ӧскенін, ідӧк коронавируснаң палғалыстығ сидіксіністерні - санға алза... Чуғынчах ағырығ Европада паза Азияда алғым тарапчатханы экономикаа тың теелче, ол санда, кӧзідімге, алюминий отрасльына. Россия правительствозы, аннаңар амох сағыссырап, пос киреенең айғасчатханнарға, чуртағӌыларға хабазар оңдайларны тілепче. Аннаң пасха, Россияның премьер-министрі Михаил Мишустин финанстар министрі Антон Силуановха регионнарның бюджет кредиттерінҷе тӧлеглерні соонаң айландырар оңдайны кӧр саларға чахаан. Пістің регионны алза, ол - пу чылға 1 миллиард 400 миллион салковай. Тӧлег соона артызылза, пістің бюджетке чахсы хабазығ полар.
Автор :
Пазып алған Наталья СУБРАКОВА
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде