КИСКЕК АҒЫРЫҒЛАРЫНА УЛҒААДАРҒА ПИРБЕҢЕР
13.02.2019
Хабарлар
Кӱн сурии. Республикада кискек ағырығларынаң кӧп кізі ағырча
Хакасияда ирткен неделяда кискек ағырығларынаң ағырыбысхан 7,5 муң азыра кізі имҷілерзер айланған. Иң кӧп айланыс 4-5 февральда полған. Оларның кӧбізі - 7 - 14 частығ палалар. Пу ағырығлар эпидемиязының саны ікі хати кӧп полған тіп искіргеннер имҷілер пресс-конференциязында. Ол «Хакасия» газета редакциязында ирткен. Анда араласханнар Хакасияның хазых хайраллаҷаң министрінің орынңызы Елена Быкова, Роспотребнадзорның Хакасияҷа управлениезінің устағҷызы Татьяна Романова паза андағы пӧлік пастығы Елена Шалгинова, республиканың олған имнег туразының паза пасха даа имнег учреждениелерінің имҷілері.
Роспотребнадзор тоғынҷыларының танығларынаң, пу кӱнде ағырчатханнарның саны олох ла синде тудылча. Че ам ӧӧнінде улуғлар паза 0 - 2 частығ палаҷахтар ағырчалар. Кискек ағырығларынаң тоғыр профилактика тоғызы ідӧк узарадылча. Хакасияда эпидемия пасталғаннаң 31 школада ӱгредіг тохтадылған. Ідӧк 12 олған садынзар палалар чӧргізілбинібіскеннер. Аннаң пасха, хай пірее школаларда пу ағырығлар эпидемиязы тузында карантинге алынҷа ла класстар чабылчалар.
Іди 13 муниципальнай пӱдістің аразында карантинге школалар паза олған садтары 11 муниципалитетте чабылғаннар. Пу кӱнде андар 22 муңҷа пала чӧрбинче. Школаа чӧрбинчеткен олғаннарның саны 30 процентке тиңнелче. Сағам Абазада паза Таштып аймаанда ла саңай пасха кирек парча. Лаборатория сыныхтағлары республикада сыбыра апарылча тіпчелер санитарнай имҷілер. Андағ сыныхтағларда грипп ағырығның ікі штаммы ілезіне сығарылған. А вирустың H1N1 2009 чылдағы кӧрімі (аны ідӧк пандемическай адапчаттырлар) паза H3N2 кӧ-рімі (сезоннай). Пу ікі штамм кискек ағырығларынаң тоғыр вакциназар кирілтір. «Аннаңар пу ағырығлардаң тоғыр кӱрезерінде прививкаларның тузазы улуғ полча», - таныхтаан Татьяна Романова.
Хайди санапчалар имҷілер, грипп паза кискек ағырығларын нимее салбин поларға чарабас. Ол, сынап улғаадыбысса, кізі хазиина хорғыс ағылча, аның сылтаанда бронха, ӧкпе паза пасха даа тыныс органнары, чӱрек-тамырлар ағырыбызарға айабас. Кізі кискектебіссе, ибзер имҷіні хайди даа хығыртарға кирек, посха хайди ла полза имненерге чарабинча. Имҷі, ағырыбысхан кізіні кӧріп, гриппнең ағырчатханын алай кискектепчеткенін ілезіне сығарып, хайди орта имненерінеңер чоохтап пирер.
Республикада пылтыр кӱскӱде грипптең тоғыр прививканы чуртағҷыларның 4б проценті ле турғыстыртыр. Имҷілернің чооғынаң, ам оларзар ӧӧнінде прививка турғыстырбаан кізілер, ағырыбызып, айланчалар. Ирткен неделяда имҷілерзер ағырчатхан кӧп кізі айлан сыхханда, пір участковай имҷее кӱнде 30-ар хати иблеп чӧрерге киліс турған. Кӧзідімге, Ағбандағы имнег туразындағы имҷілерзер кӱнде 150 - 170 хати сығдырат турғаннар. Андағ кӧп айланыс тузында табырах имнег службазы паза специалисттер прайзынзар тузында парарға маңнанминчатханнар. «Че имнег полызии чох пір дее кізі халбаан», - таныхтаан Елена Быкова. Имҷілер чуртағҷыларзар айланчалар, эпидемия тузында имҷіні ибзер хығыртыбыссар, аның килерін хайди даа сахтап алыңар, че онар хати сығдыратпаңар. Имҷілер, маңнанып алзалар, имнег полызиин пирерге хайди даа килерлер.
Пала кискекнең ағырыбысса, аны олған садынзар алай школазар чӧргізерге чарабас тіп чӧп пирчелер специалисттер. Улам на улуғ хайығны киректепчелер пір часха читкелек палаңахтар. Андағ палаларның грипп ағырии саңай пасха иртче. Ол иді ізібин дее ағырча, азыранмин сығарға, уйғаа ла пастырарға айабас. Аннаңар сала маңзыри имҷізер айланарға кирек.
Пу тоғазығда имҷілер, кискек ағырығларынаң ағырыбыспас ӱчӱн, посты хайди хайраллирдаңар чӧптер пиргеннер. Кискек ағырығларынаң тоғыр прививканы кӱскӱде турғыстырарға кирек тіп санапчалар. Эпидемия тузында кӧп кізі чӧрчеткен орыннарзар чӧрбеске кӱстенерге, маска кис чӧрерге кирек. Холларны сыбыра чууп турарға. Пурунны, тасхартын кірзе, чууп турарға. С витаминге пай ас-тамахты чиирге.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде