ӰЗӰРІГЛЕР УЗАРАДЫЛАР
29.12.2021
Хабарлар
ФРУМ Улуғ хырлас айының 23-ҷі кӱнінде республикада «Халых чоохтазығ» гражданскай форум тоғызын тоосхан
Мындағ салтарға килгеннер «Халых чоохтазығларының» араласчылары. Пос кӧрізінең ӱлезерге, сурығларға нандырығ алып аларға, читпестерӌе чӧптер пирерге - мындағ оңдайларны пирген республикада кічіг хырлас айының 30-ӌы кӱнінең улуғ хырлас айының 23-ӌі кӱніне теере ирткен гражданскай форум. Аның тоғызында Хакасияның ӱлгӱ органнарының кізілері, орындағы пос устаныс кізілері, халыхчылар, идінӌектер, хабарӌылар паза чуртағӌылар араласханнар. Кӱн суриина коронавирустың тарапчатханы республика чуртағӌыларының тоғызына, чуртазына теелчеткені паза аның сылтаанда сығысчатхан сидіксіністерні пӧкчең оңдайларның, чарадығларның паза кирексіністернің тузазы ӱзӱрілген. Ӱс неделя хазыр ӱзӱріглер парған даа полза, чоохтазығларның «ізии» сообаан. Гражданскай форум чуртағӌыларға сағыссырастарынаңар азых чоохтанарға, уламох пос кӧрізін ӱлгӱдегілерге читір пирерге чахсы орын полған. Че хайдағ даа чахсы кирек тоозыладыр. «Халых чоохтазығ» гражданскай форумның салтарларын итчең тус читкен. Араласчыларның ӱндезиинең пілдістіг полған, мындағ азых чоохтазығлар чуртағӌыларның кирексінізінең тузаланча.
- Мин форумны иртірген, анда араласхан полған на кізее алынӌа алғызым читірчем, - теен Хакасия пазы Валентин Коновалов. - Пӱӱнгі кӱнде коронавирус сурии уғаа кирек, олох туста аймах кӧрістер тӧрітче. Форум сидіксіністерні тиксі саринаң ӱзӱрерге полысхан. Аймах чуртас-экономика кӧстеглері кізілерін паза эксперттерні ӱзӱріге сығарып аларға киректелген. Хыйға паза тузалығ чӧптер кирілгені ӧріндірче. Чоохтазығ сидіксіністерзер пасха пулуңнаң кӧрісті асхан паза COVID-19 иргі, хаӌаннаң пӧгілбинчеткен сидіксіністерге хайығ киректелчеткенін кӧзіткен. Чӧптер паза пӧкчең оңдайлар, санға алылып, тузаланысха кирілер. Ізенчем, 2022 чылда піс пу тоғысты узарадарбас.
Валентин Коновалов позының паза правительство адынаң алғыстас пічіктерін республиканың Халыхтар палатазы кнезі Ольга Левченкаа, Ағбандағы имнег туразының ӧӧн имҷі орынҷызы Ирина Ягодкинаа, алынҷа халыхчыларға паза идінҷектерге читірген.
Форумның халғанҷы чыылиинда резолюция проектіне кирілген ӧӧн чӧптер искірілген. Оларнаң Хакасияның Халыхтар палатазының кнезі Ольга Левченко таныстырған. Аның таниинаң, пу резолюцияа полған на площадкада алылған резолюциялар хозылар. Араласчылар чӧптепчелер: Россияның прай субъекттеріне наа коронавирус чуғынҷахтың тарапчатханын тохтадарынҷа уғаа хорғыстығ туста федеральнай, регион паза орындағы ӱлгӱ органнарына хаалағларның пірге федеральнай стратегиязын тимнирге, чуғынҷах ағырығлардаң имнеҷең наа имнег тураларын пӱдірерінҷе национальнай проект тимнирге, нацпроекттерҷе наа спорт пӱдіріглері санын хозарға, 2022 чылда ӱгредіг, имнег кирее тоғынҷыларына паза коронавируснаң аар ағырғаннарға реабилитация паза профилактика істезиин кӧр саларға паза пасхазы. Резолюция форумның сайтында (dialog19.ru) толдыразынаң сығарылар. Хакасияның Халыхтар палатазы халых пірігістеріне 2022 чылның азығ айында паза пір килкім форум тимнепче.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде