ААРЛАСТЫҒ ААЛӋЫЛАР
01.10.2019
Хабарлар
Тоғазығ. Хакасияның пазы Валентин Коновалов летчик-хантигірӌі, Россияның Матыры Олег Артемьевнең тоғасхан
Ирткен неделя тоозылчатханда, регион устағҷызы летчик-хантигірҷі, Россияның Матыры Олег Артемьевнең паза «Роскосмос» корпорацияның арачылағ службазының тоғынҷызы Александр Лазаренконаң тоғасхан. Ирткен чылның орғах айында Олег Артемьев Ағбанны Чоннар аразындағы хан тигір станциязынаң сомға суурған, амды позы Хакасияның ӧӧн городында ааллапча.
- Чоннар аразындағы хан тигір станциязының учухчатхан чолы полған на кӱн Хакасияның ӱстӱнде учуғарға оңдай пирче. Республика удаа камераларның объективтерінзер кір парча. Пу уғаа сіліг чир, - таныхтаан Олег Артемьев.
Таныхтирға кирек, Байконур космодромнаң позыдылчатхан спутниктернің траектория чолы Таштып аймаандағы тайғалығ чир ӱстӱнҷе парча. Іди ӱр ниместе Байконурдаң ӱрге экспедициянаң хан тигір корабльы учуғыбысхан. Тоғазығ араласчылары ол киректі ӱзӱргеннер. Ідӧк чоохтазығ тузында Россия космонавтиказының чидіглерінеңер чоох парған.
- Пістің республика мындағ аарластығ аалҷыларны удурлапчатханына ӧрінчем. Хакасияа пу уғаа танығлығ кирек. Алғызым читірчем Сірерге, опыдыңарнаң чиит улуснаң ӱлесчеткеніңер, хан тигірдеңер чоохтапчатханыңар паза пос кӧзідімінең оларның кӧңнілерін кӧдірчеткеніңер ӱчӱн, - таныхтаан Хакасияның пазы Валентин Коновалов.
Олег Артемьев видеоблог апарча паза чииттернең ӧткін палғалыс тутча. Олох кӱн ол Н.Ф. Катановтың адынаң Хакас хазна университеді студенттерінең тоғасхан. Пӱӱл вузта ӱгредігліг чааҷы кіні тӧстелген, хайда студенттер «Радиолокация станциязының операторы» специальность алып алар паза Кии-хан Тигір кӱстерінің ракета-техникалығ войсколарында служба иртеріне тимненіс иртібізер оңдайлығлар.
Хоза танығ: Прай тархын тузына республикада нинҷе-де ле хантигірҷі ааллаан. 1975 чылда Сойан-Сус ГЭС-та Георгий Береговой полған, 80 чылларда пістің регионзар Николай Рукавишников паза Виктор Савиных кил парғаннар, 90 чылларда - Георгий Гречко.
Автор :
Хакасия пазыныц администрациязы
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде