ТОҒЫСТАР ТУЗЫНДА ТОЛДЫРЫЛАРҒА КИРЕК
01.10.2019
Хабарлар
Тоғыс чорығы. Хакасия пазы Валентин Коновалов 26 сентябрьда Ағбандағы паза Харатастағы чолларны сыныхтаан. Олар «Хорғыс чох паза чахсы чоллар» нацпроектче тыхталчалар. Ідӧк республика пазы Ағбан пилтірі аймаандағы имнег учреждениелерінде полған
Ағбанда Пушкиннің орамазында наа асфальтты «ДЭП-369» ОАО подряднай организация тузында саларға маңнанминча. Чайғыдаң сығара тыхталчатхан чолның тоғызы 10 сентябрьға теере тоозыл парарға кирек полған. Че подрядчик чарым айға орайлатча.
- Тыхтағ тоғыстарын толдырарға наңмыр харығ полча, - тіпче подрядчик. - Наңмыр чаған соонаң чолның хурирын ікі кӱн сахтирға кирек.
- Ам хаҷан тоозарзар тоғыстарыңны? - сурған Хакасия пазы Валентин Олегович.
- 15 октябрьға тоозарбыс, - нандырған подрядчик.
- 15 октябрь иң халғанҷы кӱн, - хызааннаан В.О.Коновалов. - Тоғызыңар толдыр полбазаңар, сірер киртістең сых парарзар. Городтың ӧңненізі паза чахсы чуртазы сірернің тоғыстарыңнаң палғалыстығох.
Анаң регион устағҷызы транспорт министрінің тоғызын толдырчатхан Олег Емелинзер айланған:
- План хоостыра чолларны тузында тыхтирға маңнанминчатхан подряднай организацияларның тоғыстарын кӱннің сай сыныхтағда тудыңар. Чоллар пик паза чахсы тыхталзын.
Валентин Олеговичтің сӧстеріне аның орынҷызы Юрий Курлаев хозылған. Ол подрядчиктерзер айланған:
- Сірер, наңмырға састырып, тоғыстарыңны тузында тоос полбинчабыс тіп сылтанчазар. Киҷее «Хорғыс чох паза чахсы чоллар» национальнай проект хоостыра Россия синінде чыылығ ирткен. Анда хазнабыстың алтынзархы регионнары кӧзідімге алылғаннар. Оларның часхы орай пасталча, чайғы, тізең, хысха. Че, андағ даа полза, соох регионнар нацпроекттің чӧптезіглерін 90 % толдыр салғаннар.
Аннаңар Хакасияда наңмырлығ кӱннер асфальт саларға харығ полғаны - ол сылтағ нимес.
Ағбанда Некрасовтың орамазында андағох сидіксініс подрядчиктер асфальтты кӧрілген тусха тӧзирге маңнанминчалар. Че мында пасха сылтағ - материал чидіспин парча.
- Пазағы чылда материалнаң сидіксініс чох полар ӱчӱн, аны хысхызынох тимнеп саларға киректелче. Піс ол сурығны ӱзӱрербіс, - теен Хакасия пазы.
Харатас городта пастыхтар Советскай орамадағы чолны кӧргеннер.
- Мында тыхтағ тоғыстары хаҷан тоозылар? - сурған подрядчиктең Валентин Коновалов.
- 30 октябрьға тоос саларға кирекпіс, - нандырғаннар ағаа.
- 30 октябрьға най орай, - теен регион пазы. - 20 октябрьға тоозарға кӱстеніңер. Октябрьның халғанҷы кӱннерінде, тасхар соохталып, хар даа чабызарға айабас. Тоғысчылар чаллаңар, техника хозыңар.
Пӱӱл «Хорғыс чох паза пик чоллар» национальнай проектке республикада 17 чол кірген. Оларны тыхтирына 2019 чылда 546 миллион салковай позыдылған.
Анаң Хакасия пазы Ағбан пилтірі аймаандағы имнег учреждениелерінде тыхтағ тоғыстары хайди толдырылғанын кӧрерге чол тутхан.
ИМНЕГ УЧРЕЖДЕНИЕЛЕРІ
Ағбан пилтірі аймааның ӧӧн имнег туразында наа аптека тоғынча. Ол аптеканы республика пазы Валентин Коноваловха Хакасияның хазых хайраллаӌаң министрі Владимир Костюш кӧзіткен.
- Аймахта тиксі 4700 льготник саналча, - теен Владимир Фёдорович. - Аптека ӧӧнінде оларға азылған.
- Имнернең сидіксініс пар ба? - сурған Валентин Олегович.
- Пӱӱнгі кӱнде имнер чидісче. Льготниктерге тузында пирілчелер. Пу аптека чох полғанда, чуртағӌылар имнер аларға Харатассар чӧрӌеңнер. Аймахтағы ӧӧн имнег туразы позының ахчазына аптеканы азып алды. Мында диабеттең паза онкологиядаң имнер пар, - нандырған В.Ф.Костюш.
Пӱӱнгі кӱнге Ағбан пилтірі аймааның ӧӧн имнег туразында 50 % имӌі чидіспинче. Аннаңар ағырчатхан кізілерге специалисттернең тоғазып аларға аар, олар узун теесте ікі дее час одыр салчалар. Пылтыр пу имнег туразынзар сигіс имӌі істенерге килген, пӱӱл - тоғыс специалист.
Ағбан пилтірінде улуғ пастыхтар олған поликлиниказында иртірілген тыхтағ тоғыстарын кӧргеннер. Андағы имӌілер нааӌылалған тураларына чӧпсінчелер, че ахча хырын алыстырарға читпеен тіпчелер. Поликлиниканың хыры 40 чыл алыстырылбин парир одыр.
Расцвет поселоктағы ФАП-ха нацпроект хоостыра тыхтағ тоғыстарын иртірерге ідӧк ахча позыдылған. Ол ахчаа кабинеттер нааӌылалған, ЭКГ кабинеді паза имнег персоналына алынӌа пӧлік азылған. Аның алнында чуртағӌылар ЭКГ-ны иртерге Ағбан пилтірі аймааның ӧӧн имнег туразынзар чӧрӌеңнер.
Пӱӱнгі кӱнде Расцветтегі ФАП-сар 989 улуғ частығ кізі хазиин сыныхтанарға чӧрче. Анда хан алчалар, прививкалар турғысчалар. ФАП-тох имнер садызып аларға чарир. Пӱӱл планға кирілген 268 кізінің 157-зі диспансеризация иртібіскен.
Хакасия пазы Валентин Коновалов Тепличнай поселоктағы амбулаториязар читкенӧк. Тыхтағ тоғыстарынаңар чоохтаза, анда ізіктер алыстырылғаннар, стенелер тӱзеділгеннер, амбулаториязар кірчеткен ізік ӱстӱнде чабығ иділген. Ідӧк наа имнег оборудованиезі алылған. Амды амбулаторияның наа электрокардиограф, тимір шкафтар, одырчыхтар пар.
Пір хомзыныс парох, амбулаторияның хырын алыстырарға кирек. «Ағаа ахча табарбыс, - теен Хакасия пазы. -Тура хырынаң наңмыр суу кір сыхса, пу тыхтағ тоғыстары тикке ле иртірілген тіп саналар».
Иң ӧӧн ӧрініс - амды Тепличнай поселоктағы амбулаторияда компьютер паза Интернет пар. Аның полызиинан имӌілер ағырчатхан кізілерні аймахтағы ӧӧн имнег туразының тирең пілістіг специалисттерінзер пазындыр салчалар.
Таныхтирға кирек, амбулаторияда имӌілер читкіӌе.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде