ТӦРЕЕН КӰНІНДЕ ААРЛЫҒ СЫЙЫХНАҢ ТАНЫХТАТХАН
07.03.2017
Хабарлар
3 мартта Асхыс аймаа администрациязы туразының улуғ залынзар 11.00 часха чон чыылызып пастаан. Асхыс аймааның пазы Абрек Васильевич Челтыгмашевті пайрамнығ 60 чазынаң чеестирге чыылысханнар.
Мына пастыхтар кірчелер, таныбас кізі чоғыл. Хакасияның Ӧӧркі Чӧбінің кнезі Владимир Николаевич Штыгашев, аппарат тоғынҷызы Георгий Григорьевич Майтаков, Хакасия пазының администрация устағҷызы Валерий Васильевич Денщиков, спорт министрінің тоғызын толдырчатхан Виктор Андреевич Струков, Пии аймааның пазы Юрий Николаевич Курлаев, Асхыс аймааның депутаттар чӧбінің кнезі Владимир Михайлович Зимин паза даа пасхазы.
Чыылығны пастаан паза апарған Валерий Васильевич Денщиков. Ноо нимее чыылысханнарын чарыда чоохтап, сӧс Хакасияның Ӧӧркі Чӧбінің кнезі Владимир Николаевичке пирген. Ол Ӧӧркі Чӧптің, ӱлгӱнің адынаң Абрек Васильевич Челтыгмашевті 60 чазынаң алғыстаан, анаң, Асхыс аймаана, Хакасияның тилізіне кӧп тузалығ тоғыс иткен ӱчӱн, республика Правительствозы паза Ӧӧркі Чӧбі А.В.Челтыгмашевті «За заслуги перед Хакасией» орденнең сыйыхтапча тіп чарлаан. Сах андох орденні Абрек Васильевичке читіріп, кӧксіне хазаан. Кирек кӧмес киліспинчеткенге тӧӧй полған. Че Владимир Николаевич чарыт пирген: «Президент, орденнер сыйлап хазапчатса, оой ла хазап пирче. Оларның ӧнетін
сыйых полар алай пиджак лацканнары иртеезін тимнел парча полар». Орден Абрек Васильевичтің кӧксіне хазал парған, чон ӧрінче, айа сабызы тохтабинча.
Анаң Валерий Васильевич Денщиков Хакасия пазының алғыстас пічиин хығыр пирген. Георгий Григорьевич Майтаков Ӧӧркі Чӧптің адынаң авторучка сыйлап пирген. Олаңай авторучка полбас, неке, прай пызыңнапчатхан. Анаң Виктор Андреевич Струков, Юрий Николавич Курлаев паза Владимир Михайлович Зимин Абрек Васильевичті алғыстааннар.
Алғыстастар соонаң Абрек Васильевич чоох тутхан. Кӧбізін Владимир Николаевичнең Валерий Васильевичсер айланған. Владимир Николаевич хаҷан-да Асхыс аймаанда, КПСС-тың пастағы хачызы полып, илееде чыллар тоғынған. Чон аны чахсы таныпча, улуғлардаң полар, чииттер дее. Валерий Васильевич, тізең, спорт министрі полып, Асхыс аймаана кӧп хайығ салған. Ағаа «Асхыс аймааның аарластығ чуртағҷызы» ат пиргеннер.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
28 | 29 | 30 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде