СИДІК ТУСТА ХАҶАН ДАА ПОЛЫЗЫҒА КИЛЧЕЛЕР
08.12.2021
Хабарлар
Хазых хайраллиры. Пу кӱннерде Хакасия правительствозы туразының улуғ залында республикада коронавирустаң тоғыр кӱрезерге полысхан Центральнай чаа округының специалисттерін паза ортын имнег тоғынҷыларын сыйыхтааннар
ТАНЫХТИРҒА КИРЕК, ПІСТІҢ РЕСПУБЛИКАЗАР ЧААҶЫ ИМҶІЛЕР НАА ЧУҒЫНҶАХ АҒЫРЫҒДАҢ ТОҒЫР КӰРЕЗЕРІНЕ ПОЛЫЗАРҒА ӰЗІНҶІЗІН КИЛГЕННЕР. ПАСТАҒЫЗЫН ОЛАР 2020 ЧЫЛДА ПОЛҒАННАР. ПӰӰЛ, ТІЗЕҢ, ЧАЙҒЫЗЫН ОЛАР РЕСПУБЛИКАНЫҢ ИМНЕГ УЧРЕЖДЕНИЕЛЕРІНДЕ ИМҶІЛЕР ЧИДІСПИНЧЕТКЕН ТУСТА ЧУРТАҒҶЫЛАРҒА ИМНЕГ ПОЛЫЗИИН ПИРГЕННЕР. АҒАА ХОЗА ЧААҶЫЛАР ГОСПИТАЛЬЫНЫҢ МОБИЛЬНАЙ ПУНКТЫ АҒБАНДА ПАСТАҒЫ МАЙ ПЛОЩАДЬЫНДА ТУРҒЫЗЫЛҒАН, ХАЙДА ЧУРТАҒҶЫЛАРҒА КОРОНАВИРУС ЧУҒЫНҶАХ АҒЫРЫҒДАҢ ТОҒЫР ВАКЦИНАЦИЯ ИРТІРІЛГЕН.
Кӱскӱзін Хакасияда наа чуғынӌах ағырығ тарап, чуртағӌылар ла аразында нимес, ідӧк «хызыл зонада» істенчеткен имӌілер ағырыға хаптырып, имнег тураларында имнег тоғынӌылары чидіспинібіскен. Аннаңар Хакасия пазы Валентин Коновалов республикада коронавирус чуғынӌах ағырығдаң тоғыр кӱрезеріне хабазарға Россияның арачыланыс министрі Сергей Шойгузар айланған.
Іди Центральнай чаа округының специалисттері паза ортын имнег персоналы 30 октябрьдаң коронавирустаң тоғыр кӱрезерге полыс сыхханнар. Хакасияда чааҷы имҷілер пір ай азыра істен салғаннар. Олар республика имҷілерінең хада-пірге тоғынып пастаанда, ағырчатханнарның саны пілдірте син парыбысхан.
Пу кӱннерде чааҷы имҷілер Хакасияда тоғыстарын тоосчалар. Новосибирсктегі 425-ҷі чааҷылар госпитальының ӧнетін имнег отрядының 20 азыра чааҷызы Хакасия правительствозының алғыстас пічиинең таныхтатхан. Республика пазының орынҷызы Ольга Пономарева чааҷы имҷілер коронавирус чуғынҷах ағырығдаң тоғыр кӱрезеріне улуғ хозым иткенін таныхтаан.
- Піс сірерге улуғ алғызыбыс читірчебіс, республикада наа чуғынӌах ағырығ тарапчатхан оой нимес туста ағырығнаң кӱрезерінде пістің имӌілерге хабасхан ӱчӱн. Сірернің хабазииңар пістің хазых хайраллаӌаң системаа уғаа кирек полған. Чааӌы имӌілер пу ағырығдаң тоғыр кӱрезерінде улуғ опыттығ паза пӧзік синде тимненістіг, - теен Ольга Игоревна.
Пістің республиказар Центральнай чаа округының Новосибирсктегі 425-ҷі чааҷылар госпитальының ӧнетін имнег отрядынаң терапевттер, анестезиолог-реаниматологтар, пульманологтар, инфекционисттер паза ортын имнег персоналы килген. Олар республиканың Н.М.Одежкиннің адынаң харах имнеҷең имнег туразында, республиканың чуғынҷах ағырығлар имнег туразында, республиканың Г.Я.Ремишевскаяның адынаң имнег туразында паза Харатастағы аймахтар аразындағы имнег туразында тоғынғаннар.
- Чааӌы имӌілер республикаа иң сидік паза хабазығ кирексіпчеткен туста полыс пиргеннер. Олар коронавирус чуғынӌахнаң ағыр чатханнарның саны иң пӧзік синде ілезіне сығысчатханда тоғынып пастааннар. Таныхтирға кирек, чуртағӌылар ла нимес, ідӧк имӌілер, коронавирусғы чухтырып, постары ағырғаннар. Аннаңар республиканың имнег учреждениелерінде имӌілер чидіспинчеткен. Ӧнетін имнег отряды килгенде, чуртағӌылар имнег полызиин тузында паза чахсы алғаннар. Оларның хабазиинаң республикада имнег кирее чахсыланча, - таныхтаан Хакасияның хазых хайраллаҷаң министрінің тоғызын толдырчатхан Александр Стреленко.
Алғыстас пічіктерін пайрамни читірген соонаң чааҷы имҷілер паза ортын имнег тоғынҷылары Хакасия пазының орынҷызы Ольга Пономареванаң хада фойеде сомға суурынғаннар.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде