ЧУРТАҒҶЫЛАРҒА - НАА ТУРАЛАР
08.12.2021
Хабарлар
Нацпроекттер. Тӧрт наа тураның клӱстері Таштып аалның чуртағҷыларына пирілді. Олар Россияның аал хонии министерствозы чарлаан «Аалларның тиксі тилізі» программаҷа пӱдірілгеннер
- Пӱӱл Таштып аймаанда «Аалларның тиксі тилізі» программаца 13 тура пӱдірілче, оларға 32 миллион азыра салковай кӧріл парған.
Пӱӱн наа тураларзар имнег, культура, ӱгредіг сфераларының паза аал чӧбінің специалисттері кірерлер.
Подрядчик «Сибстрой» ООО полча. Тураларныңулии 42 квадрат метрдең пасти 126 квадрат метрге теере пар, иң улуғ иб Чоғархы Таштыпта пис палалығ сӧбірее пӱдірілче, - чарытча Таштып аймаа пазының орынҷызы Елена Цыганкова.
3 декабрьда улуғ пайрамнаң тура ээлерін алғыстирға республиканың аал хонии министрі Сергей Труфанов, Таштып аймааның пазы Алексей Дьяченко килгеннер.
- Пастағызын на пу чылда піс аал тоғынҷыларына Хакасияда 74 тура пӱдірчебіс. Анзы аал чуртағҷылары аалдаң парбазына кӧрілген, олар аймах-пасха чуртас сфераларын тилітчелер. Аннаң пасха, піс чоллар, школалар, олған садтарын, культура тураларын тыхтапчабыс паза пӱдірчебіс.
Аймах, аал пастыхтарына алғызым читірчем, пу программада араласханнары ӱчӱн. Тура ээлеріне часка, хазых алғапчам, пала-пархаларың пу тураларда чуртирға маңнанзыннар, - теен республиканың аал хонии министрі Сергей Труфанов.
Наа тураа кіргеннернің санында Жанна Боргоякова, Таштып аймаа имнег туразының тоғынҷызы ӱлесче:
- Мағаа наа тура пирілердеңер пастағызын на истіп салғанымда, уғаа ӧрінгем. Ибде чылығ, сіліг обойлар, чарых. Піс пеер кӧскелекпіс, че тоғыста хада тоғынчатхан хыстар тура тойын хаҷан идерзер тіп сурап ла салчалар. 72 квадрат метрліг чурт мағаа паза ус палама кӧрілген. Ікізі студент полча, имҷее ӱгренчелер, очы хызым пӱӱл 11 класс тоозар. Пис чыл пазынаң пу тураа приватизация идерге чарир, анзы ідӧк ӧріндірче.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде