ААЛ ХОНИИ ТОҒЫНҶЫЛАРЫ РЕСПУБЛИКАНЫ ТИЛІТЧЕЛЕР
Хыра тоғыстары тоозыл парғанда, мал азии пилетел парғанда, аал хонии тоғынҷыларының ниик тыныбызар тузы чит килген. Анзы аал хониинда тӱзiмнiг тоғынчатхан тоғынҷыларны таныхтир тус чит килгенiн таныхтапча. Пу кӱннерде Хакасия правительствозынаң аал хонии министерствозы иң чахсы тоғынҷыларны чеестееннер. А.М.Топановтың адынаң Хакас драма театрының залына кiзi тол парған. Олар прайзы аал хониинаң палғалыстығ тоғыста iстенчелер.
– Сiрернiң тоғызыңарның салтарларынаң кӧп ниме палғалыстығ: ас-тамах читкiҷе полары, промышленность безопаснозы, арачыланар оңдайлар. Аал хонии полызиинаң хазна тудылча. Республика тилiзiнiң ӧӧн чардығы аал хонии полча паза чылдаң чылға отрасльны тилiдерiне ахча синiн ӧскiрчебiс. Халғанҷы 3,5 чылға хабазығның синiн iкi азыра хати ӧскiрiбiскебiс. Пӱӱл бюджет проектi алыл парған. Аал хониина хабазарына 2 миллиардча салковай хорадылар. «Аалларның тиксi тилiзi» хазна программазы аалларны ӧткiн тилiдер оңдай пирче. Пӱӱн Асхыста улуғ пӱдiрiг парча. Хубачарға 1,5 миллиард салковай позыдылар. Килер чылда Таштып аймаандағы Арбыт аалға чарым миллиард салковай пирiлер.
Ирткен чылда аалдағы специалисттерге тиксi 6 муң квадрат метр чурт тузаланысха кирiлген. Пӱӱн социальнай объекттер, чурт пӱдiрчебiс. Хоныхтарың тилiпче. Салтарлар – нинҷе-де чыл изере тоңастығлар чахсы сыхча, мал саны ӧсче.
Аарлығ арғыстар, ӱлӱкӱнiңер мал тутчатхан, хыраларда тоғынчатхан кiзiлернi, ас-тамах сығарчатханнарны пiрiктiрче. Сiрерге паза аал хонии ветераннарына улуғ алғыс! Хазых, часкалығ полыңар! – алғыстаан аал хонии тоғынҷыларын Хакасия пазы Валентин Коновалов.
Хакасияның аал хонии паза ас-тамах министрiнiң орынҷызы Александр Башковха «Россияның аал хонии комплексiнiң аарластығ тоғынҷызы» ат пирiлген. Россияның аал хонии министерствозының Аарластығ пiчiктері «Хакас ветеринар лабораториязы» хазна учреждениезінiң директоры Татьяна Зайковаа, «Вива-Лаб» ООО-ның чабаны Николай Секирниковха, «Ширадағы ветеринар станциязы» хазна учреждениезiнiң пастығы Надежда Феллерге пирiлген.
«Ағбандағы ветеринар станциязы» хазна учреждениезiнiң мал имҷiзi Светлана Кобыжакова, «Саяногорсктағы ветеринар станциязы» хазна учреждениезiнiң мал имҷiзi Полина Багаева, «Мустанг» ООО-ның механизаторы Владимир Вахрушин Россияның аал хонии министерствозының алғыстазына турысханнарның санында полғаннар. Пу сыйых 17 кiзее читiрілген.
«Целинное» ООО-ның зерноток устағҷызы Мария Карелинаа «Хакасияның iстенiс сабланызы» ат пирiлген.
Хакасия тилiзiне улуғ хозым ит салған, аал хониинда кӧп чыл тӱзiмнiг тоғын салған Асхыс аймаандағы фермер Артём Мамышев паза «Бирюса» ООО-ның директор орынҷызы Владимир Лейман «Хакас Республика аал хонииның саблығ тоғынҷызы» аарластығ атха турысханнар.
Хакасия Правительствозының Аарластығ пiчиин аал хонииның 25 тоғынҷызы алған. Таштып аймаандағы фермер Аполлон Канзычаков, Пiҷiдегi ветеринар участогының устағҷызы Геннадий Сагатаев, Троицкайдағы ветеринар станциязының устағҷызы Ася Чистанова пу сыйыхты алғаннарның санындалар.
«Аршановское» ООО-ның механизаторы Александр Сметанин, «Целинное» ООО-ның механизаторы Павел Ребонен паза «Алтай» ООО-ның iнек сағҷаңы Ирина Филатова иң танығлығ сыйыхтарға, «Лада-Нива-Трэвел» ниикке чӧрҷең автомобильлер сертификаттарына, турысханнар.
Республиканың аал хонии паза ас-тамах министрi Сергей Труфанов аал хонии тоғынҷыларының тузазын таныхтаан:
– Ниик халас полбинчатханын прайзы пiлче. Хыра тоғызының тустары пасхалалча. Пӱӱл хыра тоғыстары аар ирткеннер – хуруғ чайғы мал азиин пилетирiне паза тоңастығлар сығызына тың теелген. Iди дее полза, пiстiң хоныхтарыбыс чахсы салтарларға читкеннер. Анзы хыраҷыларның чидии полча.
Таштып аймаандағы ӧлең чазы аал чуртағҷызы Аполлон Канзычаков 2010 чылдаң сығара фермер полча. Кресен-фермер хониин тӧстеенде, аның 20 пас мал полған.
– Мал санын ӧскiрерiне техника кирек полған, аннаңар фермер полыбысхам. Кредит алып, «МТЗ-82» трактор садызып алғам. Хорадылған ахчаның 40%-ін хазна айландыр пирген. 2015 чылда сӧбiре фермазы чiли грант алғам. Ахчаны трактор, сапхы паза маллар аларына хоратхам. Амды минiң 100 азыра пас мал. Володя, Артём харындастарым полысча. Малларны позыбыс хадарчабыс. Пiрееде кiзi чаллапчабыс. Амғы туста хазна аал хониина чахсы полысча: техника алған ахчаның чардығын айландырча, маллар ӱчӱн тӧлепче, гранттар пирче. Iнектер ӱчӱн тӧлегнi алар ӱчӱн, полған на пис чыл тӧллiг пуға садысчабыс. Амды мал саны ӧзiбiскенде, iкiнҷi пуғазын аларға кирек. Пiр частығ пуғаҷах 100 муң салковайға тур парча, – теен Аполлон Канзычаков.
Пӱӱл от уйан сыхханнаңар, Аполлон Канзычаков сызыр садысхан. 200 рулон азый от халғанох, че от сабар туста, ӧрт сығыс парып, ол кӧй парған. Пу син от малларны пiр ай азырирына чидерҷiк.
Автомобильге сертификат алған механизатор Александр Сметанин «Аршановское» ООО-да 9 чыл тоғын салған. Мының алнында «Очурское» ООО-да iстенген. Iстенiс чолы аал хониинаң на палғалыстығ.
– Мындағ сыйых аларбын тiп пiр дее сағынмаам. Минiң машиналығ чӧрер правам чоғыл. Амды хыра тоғыстарынаң маңнанып алғанда, Саяногорскта водительге ӱгренербін.
Мин Очыр аалда чуртапчам. 16 частығдаң сығара механизатор полчам. Хырада тоғынарға кӧңнiме кiрче. Тоңастығлар чыыр туста 5.00 час иртеннең 2.00 час харааға теере хырада тоғынчам. Iди iкi ай. Пӱӱл ӧӧнiнде рапсты чыырынаң айғасхам. Ирткен чылларда пӧзiк чидiглерге читкен ӱчӱн, аал хонии министерствозының ахчалығ сыйыхтарын алғам. Предприятие директоры Михаил Фролов ахчалығ сыйыхтар пирчеӧк. Мин ол ахчаны тураны тыхтирына хоратхам, – сағыстарынаң ӱлескен Александр Сметанин.
Пӱӱл Александр Сметанин 2840 тонна тоңастығлар саап салған. «Целинное» ООО-ның механизаторы Павел Ребонен 6775 тонна силос пилетеп салған. «Алтай» ООО-ның iнек сағҷаңы Ирина Филатова 9 айға 213660 килограмм сӱт саап алған. Олар иң чахсы тоғынҷыларға саналчалар.
Пӱӱл Хакасияның 200 азыра аал хонии тоғынҷызы аймах сыйыхха турысхан.
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |