КӦЗIДIГДЕ – ПУРУНҒЫЛАРЫБЫС ЧУРТАЗЫ
11.01.2023
Хабарлар
Эдуард Киргинеков пастыхтарны наа залнаң таныстырча
Турыстығ сыйых. Хакасиядағы Л.Р.Кызласовтың адынаң чир-суғ ӱгренҷең музейде уғаа чапсых зал азылды. Наа чыл алнында республика чуртағҷыларына турыстығ сыйых тiп паалирға чарир
Археология залын пайрамни азарында араласханнар Хакасия пазы Валентин Коноваловнаң Ӧӧркi Чӧп кнезi Владимир Штыгашев. Пастыхтарның хайзы даа пiстiң чир муңарлап чыл мының алнындох позының пӧзiк чидiглерiнең махтаға сыхчаң полғанын таныхтаан, хайдағ cаблығ археологтар Хакасияда тiлег-icтезiглiг тоғыстар иртiргенiн сағысха кирген.
Музейде наа зал азылған соонда пастыхтар, аалҷылар аннаң танызарға парғаннар. Хайди таныхтаан кiзiлернi археология залынҷа ӱдес чӧрген, андағы иргi экспонаттарнаң таныcтырған Эдуард Киргинеков, музейде прай 23 муң экспонат чыыл парған. Чыл сай аның саны хозылып ла одырча. Кӱргеннернi хасхан сай пiрее наа чапсых ниме табыл ла парадыр. Оларны сыныхтирға, нааҷыли тыхтирға улуғ городтарның лабораторияларынзар ысчалар. Анаң олар Хакасиязар нандыра айландырылчалар.
Оңарылыстығ, хайдағ даа пастых позының тоғызын чахсы саринаң кӧзiт пирерге харасча, iстенic ӧмезiн махтап пастабысча. Музей директоры Андрей Готлиб андағларның санына кiрбинче тиирге чарир. Хайдағ улуғ тоғыс идiл парған тiп махтапчатсалар, кӱлiмзiреп ле саладыр.
– Кӧрiңер, паалаңар. Прай ниме харахтарың алнында, – амыр ла чоохтаныбысча Андрей Иосифович.
Ол археолог, тархын наукаларының кандидады, аннаңар наа азылған залдағы ниме-ноодаңар тоозылбас-парбас чоох апарар оңдайлығ. Че ол кӧрiгҷiлернiң кӧңнiн позының пай пiлiзiнең чабыра пазарға сағынминча. Пастых кiзi оңарча, полған на кiзiнiң позының кӧрiзi, сағызы, паалаа. Археология залында, тiзең, хайығ айландырҷаң, чапсыҷаң иргi экспонаттар толдыра.
Пастыхтарның соона халып, Хакас телевидениезiнiң хабарҷызы Альберт Кулумаевнең хада пурунғы чааҷыларның тирiглерi хыринда тохтабысхабыс. Пiстiң хайиибысты охчааларның паза соғаннарның аймағы тартхан. Алыптығ нымахтар пастыра пiлчебiс нооза, охчаадаң таңма атар марығлар хайдағ хазыр оңдайда ирт турғанын. Тыннығ хостоларны алып-кӱлӱктер iдӧк охчаадаң атчаңнар. «Ыырҷыларымны прай хырып, алнымда килiп тӱзерзiң», – тiп чахирға ундут салзалар, чир ӱcтӱндегi прай тiрiг нименi чох итпеенде, тыннығ хосто хорғыстығ тоғызын тохтатпинча.
Пурунғыларыбыстың чааласчаң, аңнаҷаң, палыхтаҷаң, иб аразында хайынҷаң-тудынҷаң тирiглернi сыныхти кӧрглепчеткен туста Эдуард Киргинековты харах одынаң позытпасха харасчабыс. Хайди ол искiрген полған, музейде хайраллалчатхан 23 муң экспонаттың 16 муңы наа залда кӧзiдiге сығарылған. Ол, пастыхтарнаң хада пастырып, пурунғыларыбыстың чуртас оңдайынаң чағын таныстырчатхан. Анзын Эдуард Николаевич холын пiр экспонаттаң пасхазынзар улапчатханы хоостыра чахсы сизiнер оңдай полған. Пiди кӧрiп-сизiнiп одырза, iзестiг тудынча, туртухчатханы сала даа пiлдiрбинче.
Мына ол ӱр нимеске сым турыбысты, Валентин Олеговичтең харах албинча. Хакасия пазы ағаа хайдағ-да сурығ пирчеткен одыр. Аны истiп алып, музейнiң наука тоғынҷызы хонҷых пӧлiксер пастырча, анда кӧзiдiге сығарылған ниме-нооға аалҷыларның хайиин айландырып, хынығ чооғын узаратча. Республика музейiнiң пӧлiк устағҷызы уғаа хоос сӧстiг. Муңарлап чыл мының алнында чуртаан пурунғыларыбыстаңар чоохтап сығар полза, сыбыра оларның аразында хайын чӧрген чiли ипти-тапти чоллап пастапча.
Музейде археологияның наа залы кибiрли азылған соонда хабарҷылар Игорь Таштандиновты ибiр салтырҷыхтар. Ол даа мында наука тоғызынаң айғасча. Маңзырабас оңдай-хылыхтығ учёнай cурығларға iдӧк амыр ӱннең нандырча, прай чарыда чоохтап пирче. Наа залда турғызылған экспонаттарның кӧбiзi иргi музейде пiрее-пiрее хати кӧзiдiге сығарылҷаң полғаннаңар cурыға нандырып, пазын на икiп салған. Анаң Хакасияда чуртапчатхан аң-хустарның харалдылары даа, пiстiң чонның кибiрли тiгiлген кип-азаа даа, пасха даа экспонаттар иргi музейде удаа кӧзiдiге сығарылғанын таныхтаан.
– Чох, пу наа залнаң ипти-тапти чағын танызып аларға пiр кӱн читпес. Пеер удаа кил турарға кирек. Андада пурунғыларыбыс чуртазын сала чағын арах пiлiп аларға чарир, – чоохтасчалар кӧрiгҷiлер.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде