ЫНАҒ ЧУРТААНЫ – ОРЫНДАҒЫ ЧОННЫҢ ӦРIНIЗI
18.01.2023
Хабарлар
Индіркі Тӧӧ аалдағы ӱгренҷілер
Чир-суубыс мында пасталча. Ӱр ниместе Асхыс аймаандағы Индiркi Тӧӧ аалда чорыхнаң пол килгебiс. Харнаң чабын салған аал амыр узупчатханға тӧӧй полған. Че аалзар кiрiбiскенде, тыс пiлбинчеткен, ӧткiн тудыныстығ чуртағҷыларнаң танысхабыс
СЫЙЫХТЫҒ ОРЫННАРҒА ТУРЫСЧАЛАР
Индiркi Тӧӧ аалдағы фельдшер-акушер пунктынзар чол тутхабыс. Ол улуғ нимес, ӱр ниместе пӱдiрiлгенi кӧрiнген. Анда iстенчеткен специалистнең танызып, аал чуртазынаңар пiлiп алғабыс. Фельдшер Галина Трофимовна Бытотова, Ағбандағы имҷiлер училищезiн 1982 чылда тоозып, Индiркi Тӧӧзер тоғынарға ызылған. Аның iстеніс стажы – 40 чыл.
Фельдшер Галина БЫТОТОВА
– Индiркi Тӧӧ Ӱс чул аал чӧбiне кiрче. Аалда прай пис орама: Советскай, Целиннай, Набережнай, Зеленай паза Школьнай. Халғанҷызын чонны санға алғаны хоостыра пiстiң аалда 328 кiзi чуртапча, оларның 90-ы пала. Мин пеер килгенiмде, иргi 12 квадрат метрліг турада тоғынғам. Анда соох полҷаң. Ол чылларда Индiркi Тӧӧде 450 кiзi чуртаан. Наа ФАП пӱдiрер алнында мин iкi иргi турада тоғынғам, оларда iдӧк соох полҷаң, аннаңар чуртағҷыларны сыныхтирға хомай полҷаң. 2011 чылда наа ФАП тимге сыхханда, мин дее, чуртағҷылар даа ӧрiнгебіс. Мында iдӧк санитарка, кочегар тоғынчалар. Пiс чыл сай, ФАП-тың ибiркiзін иптир аймах мариинда аралазып, сыйыхтығ орынға турысчабыс. Утып алған ахчаа имнег туразына киректелчеткен ниме-ноо алчабыс. Iди пiс пасхыс, кӱрҷек, тырбос, хаңааҷах, тример паза сырлар алғабыс. Ол оох-теек ниме-ноо, че оларны аларына ахча киректелче. Чиңiстер туза ағылча, – чоохтаан фельдшер.
Соохтар пасталыбысса, чуртағҷылар кискектеп алай соох кирiн салып айланчаттырлар. Галина Трофимовнадаң кискек ағыриинаңар паза вакцинациядаңар сурғам.
– Кискектепчеткеннер сағам аалда пiлдiрбинче. Школада прай амыр, кӱскӱзiн олғаннар соохха алдыртып айланғаннар. Городтарда, аймах кiннерiнде кискектепчеткеннер саны кӧдiрiлзе, пiрее iкi неделя пазынаң ол ағырығ пiссер читче. Анзы чуртағҷылар аар-пеер чӧргенiнең алай аалдағы студенттер килгенiнең палғалыстығ. Аннаңар Калининдегi аптеказар имнернi азынада чахып салчам. Неделя сай четвергте имнер ағыл пирчелер.
Аалдағы чон хомай чуртабинча, кӧбiзiнiң пос транспорты пар, олар, киректерiнең удаа аймах кiннерiнзер чӧрiп, киректелчеткен ниме-ноо паза имнер алып алчалар. Уйан арах чуртапчатхан алай транспорт чох кiзiлер имнернi мында садысчалар. Оларға аалда аптека тоғынчатханы тузалығ.
Пiстiң чуртағҷылар хазыхха нандырығлығ хайчалар. 120 улуғ кiзее кискектең тоғыр прививка турғысхам. Школада 71 пала ӱгренче, прайзына прививка турғызылған. Чуртағҷылар коронавирустаң тоғыр вакцинация ирткеннерӧк. Вакцинация аалда чахсы парча. Кiзiлер постары килчелер. Улуғ частығлар кил полбинчатсалар, позым парчам. Пiстiң ФАП-ха пирiлген вакциналарны чатырбинчам. Иртен вакцинаа пар килчем, олох кӱн кiзiлерге турғызыбызарға кӱстенчем. Пiрееде ле, пала ағырыбысса, вакцина халча, ол чазыл парза, турғысчам. Азах аар ипчiлер аймахтар аразындағы имнег туразында сыныхтанчалар, че iдӧк минің хайиимдалар. Iдӧк минiң хайиимда 18 кинек чуртағҷы, ол санда iкi пала, – чарытхан Галина Бытотова.
«ПАЙ ХАЗЫҢ» ПIРIКТIРЧЕ
«Пай хазың» – Индiркi Тӧӧ аалдағы орындағы пос устаныс пiрiгiзi. Пӱӱнгi кӱнде аннаң Татьяна Субракова устапча. Позы ол орындағы ортымах школада ӱгретчi полып тоғынча, че аал чуртазын тилiдер кирекнең айғазар тусты хаҷан даа таапча. Аның ӧӧн полысчызы Культура туразының устағҷызы Саяна Боргоякова.
"Пай хазың" ТОС-тың кнезі Татьяна СУБРАКОВА
– Саяна Павловна «Ватсапта» «Нижняя Тея» группа тӧстебiскен. Аал сурығларын чуртағҷыларнаң хада-пiрге пӧгер пӧгiннең. Пiрсiнде ол чирiбiстiң ибiркiзiн сӧп-саптаң арығлабызалар тiп искiрiг пазыбысхан. Анда-мында чайыл чӧрчеткен похсахты сомға суурыбох салтыр. Пiстiң аал хыринҷа федеральнай чол парча нооза. Иртчеткен кiзiлер хайди кiрлiг чуртапчалар тiп сағынча поларлар. Аның ӱчӱн сынап тың изi чох пiлдiр парған. Прайзы чарасхан. Анаң группанаңох чӧптезiп алып, чыылызып, аалыбысты арығлабызарға чаратхабыс. Iди пылтыр апрель айда иртiрiлген субботникте чӱске чағын кiзi араласхан, ӱгренҷiлернең хада саназа. Олар школаның ибiркiзiн арығлааннар. Ӱс чул аал чӧбiнең таарлағ машина пирiлген. Мындағох оңдайнаң 1 майда пic Илбек Ада чаа араласчыларына чарыдылған хумартхы тас хырин иптеебiс, ибiре ағастар одыртхабыс. Анда iдӧк аалдағы улуғ-кiчiг араласхан, – чооғын пастаан Татьяна Семёновна.
Соонаң «Пай хазың» орындағы пос устаныс пiрiгiзi Асхыс аймаандағы ТОС-тар аразындағы гранттар мариинда аралас кӧрерге чаратхан. Спорт площадказы кирек тiп чарадығ алыбысханнар индiркi тӧӧдегiлер. Проект тимнебiзiп, марыға ызыбысханнар. Салтарында, оларға сыйыхха 200 муң салковай пирiлген! Пу ахчаа алылған спорт тирiглерiн Индiркi Тӧӧ аалдағы чуртағҷылар iдӧк хада-пiрге турғысханнар. Клуб хыринда орных парған спорт площадказын постарыох сиденнееннер, сырлааннар. Анаң август айда аны пайрамни асханнар.
– Школа хыриндағы олған площадказын иптебiзердеңер сағыс тӧреен. «Ватсапсарох» чонзар айланыс пазыбысхабыс, сырға ахча чыып, сиденнi сырлабызалар тiп. Аалдағылар, тiзең, анзы читкiҷе полбас, сиден-столбаларны, пӱкӱлеезiнең алыстырып, сырлирға кирек тiп нандырығ пазыбысханнар. Пазох сағысха тӱзiбiскебiс. Ахча уламох кӧп кирек нооза. Хайди аны чыып аларға? Че ит кӧрелер тiп, хорадығларыбысха нинҷе ахча кирек поларын санап сыххабыс. Анаң «Ватсаптағы» группазар искiрiбiскебiс. Чон ынабысхан. Ахча кӧместең чыыл парған. Сиденге чардылар алып алғабыс, столбаларны аал чӧбi пирген. Iди пiс пос кӱзiнең олған площадказын иптеп алғабыс, – узаратхан ТОС кнезi.
Пӱӱнгi кӱнде оларның «Нижняя Тея» группазында 120 кiзi осхас. «Мындағ оңдайнаң пiс аалдағы чуртағҷыларның полғанының на ӧрiнiзiнеңер, хомзынызынаңар, чидiглерiнеңер пiлiп алчабыс. Кем хайда полғанын, хайдағ марығ-фестивальда араласханын ызылған сомнар хоостыра кӧрчебiс. Аалда пайрам алай олох субботник полар тiп искiрзебiс, чон сах андох ӱндесче. Аалдағылар ынағ чуртапчатханы, тiзең, пiске иң ӧӧнi полча», – тiпче ол.
Татьяна Субракованың таниинаң, «Пай хазың» ТОС орындағы Культура туразынаң тӧремiл хада тоғынча. Пос устаныс пiрiгiзiнiң сан пирiстiг сомнар кӧзiдии клубта парох.
КЛУБТЫҢ ЧАЙААЧЫ ТОҒЫНҶЫЛАРЫ
Асхыс аймаандағы Индiркi Тӧӧ аалдағы Культура туразы 2018 чылның ноябрь айында пайрамни азылған. Андада тиксi аалда ӱлӱкӱн полған тиирге чарир. Орындағы чон пай стол салған, хой соғып, улуғ-кiчiг хазаннарда чарбалығ ӱгре хайнатхан. Чуртағҷылар тимнеен татхыннығ чиистi амзаан улуғ аалҷыларның пiрсi Хакасия пазы Валентин Коновалов полған. Чоохтирға кирек, аның Индiркi Тӧӧзер мындағ чорығы пӱӱнгi кӱндегi республиканың аал-городтарынҷа кибiрлiг тоғыс чорыхтарының иң пастағызы полча! Андада Валентин Олегович Хакасиянаң наа ла устап пастаан.
Клуб устағҷызы Саяна БОРГОЯКОВАНАҢ хоос устағҷы Ирина БОРГОЯКОВА
Саяна Боргоякова ана олох тустаң сығара Индiркi Тӧӧ аалдағы Культура туразынаң устапча.
Пӱӱнгi кӱнде Индiркi Тӧӧ аалдағы Культура туразы композитор, хоосчы, писатель, чон узы Павел Михайлович Боргояковтың адын ал чӧрче. Ол пу аалда чуртаан. Анда сағам ӱс кiзi тоғынча: устағҷы Саяна Боргоякова, хоос устағҷы Ирина Боргоякова паза пес одынҷаң ус Владимир Субраков.
– Пiстiң тоғыс чоннаң хада апарылча. Пiс оларға аймах пайрам-ӱлӱкӱннер иртiрчебiс. Ӧткiн чуртағҷылар кӧп. Олар клуб мероприятиелерiнде тӧремiл араласчалар.
Олғаннарға клубта сарнирға, тахпахтирға ӱгренiп алар оңдай пирiлче. Ол кружоктарны хоос устағҷы Ирина Михайловна Боргоякова апарча, – чарытхан Саяна Павловна.
Аалдағы библиотека клубтыңох туразында орныхча. Ағаа проект хоостыра алынҷа пӧлiк кӧрiл парған. Че ол улуғ нимес. «Школа соонаң олғаннар кӧнiзiнең пеер килчелер. Кем-де кружокка, хайзы-да книга-журналлар алып аларға. Библиотекаа толдыра палалар чыылыс парза, уғаа кiчiг орын тiп пiлдiрче», – чооғын узаратхан клуб устағҷызы. Хайди ол анаң хосхан, амғы туста оларның библиотекарь чоғыл, аннаңар ағаа аның тоғызын толдыр турарға килiсче.
Пiс библиотеказар кiргебiзӧк. Уғаа истiг орын, чарых. Ана ол кинде-журналларның хазназында ағастаң ипти чайалған абдыралар паза тӱӱр сапчатхан хамнар чайал парған паннолар хайиибысты тартханнар. Сынап уғаа чапсых тоғыстар. «Оларның авторы пiстiң кочегар Владимир Данилович Субраков полча. Танызарзар ба аннаң?» – сурыбысхан Саяна Боргоякова. Хайди таныспас?
– Тӧреен-ӧскен, амды чуртапчатхан чирiм Индiркi Тӧӧ аал полча. Ағаста киртерiнҷе ӧнетiн ӱгредиим чоғыл. Пос кӧңнiмнең паза пос туста ла айғасчам ол кирекнең. Иң пастағы тоғызым «Чатханнығ апсах» полған. Аны мин 90 чылларда чайаам. Пычахнаң на. Андада аалдағы клубнаң миннең хада пiр класста ӱгренген арғызым устаан. Асхыс аймаандағы культура учреждениелерi аразында хайдағ-да марығ ирткен. Ол, минiң оңдайым пiлiп, кӧзiдiге пiрее хоос ағаста кирт пир тiп сурынған. Мин чайап пиргем. Ам ол хайдазын пiлбиндеечем. Соонаң пиҷеме сыйыхха пiр панно тимнеем. Ам минiң ӧнетiн тирiглер – резактар – пар. Ағаста киртерiнең пос туста ла айғазып одырчам, – чоохтап пирген Владимир Данилович.
Ус холлығ Владимир СУБРАКОВ
Ол чӱреене чағын киреенең аннаң андар даа iдӧк ле пос алынҷа айғазарҷых, неке. Че Индiркi Тӧӧ аалдағы Культура туразының устағҷызы Саяна Боргоякова, аның ус холлығ полчатханын пiлiп алып, ағаа хоза ахча тоғынып ал турар оңдай пирче. Ағаста кирткен хоостарға, абдыраларға хынчатханнарнаң чоохтазып, Владимир Субраковха чахығлар таап пирче. Чайаачы кӧңнiлiг кочегар, оларны толдырып, хоза ахча тоғынып алча.
Библиотекадағы пiс ӧкерсiнген ниме-ноо iдӧк чахығ хоостыра толдырылған полтыр. Ээлерiн сахтапчаттырлар.
ХЫНЫП ОЙНАПЧАЛАР
Индiркi Тӧӧдегi ортымах школазар кiргенде, олғаннарның табызы прай коридорға тарапчатхан. Олар ниме итчеткенiн пiлiп аларым килiбiскен. Табыстар соонҷа парып, спорт залын таап алғам. Ӱгренҷiлер, меспекнең ойнап, суум-саам тӱсчеткеннер. Олғаннарның физкультура урогы парчаттыр, аны ӱгретчi Аркадий Аверьянович иртiрген. Хызыҷах-оолахтар ойынға толдыразынаң пирiнiп ойнапчатханнар, аннаңар спортзалзар кiргенiмнi сизiнмееннер дее. Ӱгретчi кiзi сизiктiг, минi кӧр салып, пастырған. Аннаң чоохтазып, ӱгренҷiлер хайдағ ойын ойнапчалар тiп сурыбысхам.
– Физкультура урогы, iкi класс пiрiктiрiлiп, иртiрiлче. Мында iкiнҷi паза тӧртiнҷi класстар. Пӱӱн пiстiң пасталығ класстарға кӧрiлген «Iкi капитан» ойын парча. Олғаннар мында меспек тастирға паза аны хабарға ӱгренчелер. Пу ойын хызыҷах-оолахтарға волейбол паза баскетбол ойнаҷаң устарын таптапча. Аннаңар урокта аны турғысчам, ағаа хоза олғаннар ол ойынны хынып ойнапчалар, – чарытхан Аркадий Субраков.
ЫНАҒ ӦМЕ – КӰСТIГ ШКОЛА
Индiркi Тӧӧ аалдағы С.П.Ултургашевтiң адынаң ортымах школа ӱгретчiлерiнiң ӧмезi, улуғ даа полбаза, уғаа ынағ. Пӱӱнгi кӱнде пу ӱгредiг учреждениезiнең Лилия Павловна Ултургашева устапча. Школаның адын пӧзiк синге кӧдiрер пӧгiннең олар аймах марығларда тӧремiл араласчалар. Кӧзiдiмге, 2019 чылда пу аалдағы ортымах школа, «Россияның иң артых 100 школазы» марығда аралазып, «Аалдағы иң артых школа» номинацияда чиңiсчi полыбысхан. «Школа мындағ чидiглерге улуғ опыттығ ӱгретчiлер ӧмезiнiң чон палазын ӱгредерге кӱстенгенi сылтаанда читче», – теен устағҷы.
Паза алынҷа ӱгретчiлернi таныхтирға кирек тiп санапчабыс. Олох Татьяна Семёновна Субракованы. Индiркi Тӧӧ аалдағы школада ол 2019 чылдаң тоғын парир. Аның ӧӧн предметтерi тархын паза обществознание полчалар. Че олох туста ол технология уроктарын апарча. Анда ол ӧӧн хайығны чiбекнең, нинҷiнең хоостирға ӱгредерiне салча. Татьяна Семёновна iдӧк школаның «Тадар иб» музейiнең устапча. Аны алғыдарына паза тиксi чирге сабландырарына ол iдӧк кӧп кӱс салча. Чоохтирға кирек, чайаачы кӧңнiлiг ӱгретчi, аймах марығларда аралазып, пӧзiк сыйыхтығ орыннарны удаа алча. Индiркi Тӧӧдегi школа музейiнiң халғанҷы андағ чидии Наа чыл алнында полған. Татьяна Субракова ӱгренҷiлерiнең хада, «Тадар иб» музейнi чазап, Асхыс аймаа синiндегi «Наа чыл кӧзенек тохлатча» марығда чиңiсчi полыбысханнар.
– Улуғ класстардағы палаларнаң хада ДВП-даң тӱлгӱҷектi паза хозаннарны тимнебiскебiс. Оларға хакас кип-азаан «кизiртiбiскебiс». Анаң музей тастында ипти турғыс салғабыс. Сомға суурып, марығның школа музейлерiн Наа чылға чазирынҷа номинациязына ызыбысхабыс. Пастағы орын пиргеннер! Соонаң пiс ол аңыҷахтарыбысты школа iстiнзер кир салғабыс, Наа чыл пайрамында сомға суурынар орын идiп, – чоохтап пирген Татьяна Субракова.
Индiркi Тӧӧдегi школаның ӱгретчiлерiн пiр ле ниме сағыссыратча – чыл сай ӱгренҷiлер саны хызырылча! Мындағ оңдайнаң, хайдағ-да чылда улуғ класстарда ӱгренҷең пала чох пол парча. Ӧрiнiске, пӱӱл оларның 11-ҷi класс пар. Анда тӧрт пала ӱгренче.
ХАЛЫХ ЧУРТАСТА ӦТКIН АРАЛАСЧАЛАР
Фельдшер-акушер пунктында кӧп палалығ сӧбiрелердеңер пiлiп алғам. Хайиимны тартхан читi паланы ӧскiрчеткен Мария Толмашова. Хомзынысха, хонғаны, ағырыбызып, ах чарыхтаң парыбысхан. Амды Мария Владимировна палаларын чалғысхан, ӧскiрiп, азахха турғысча. Сағам тоғынминча, иб аразында хайынып, палаларынаң айғасча. Пiлдiстiг, улуғ сӧбiреде ибде дее тоғыс пас азыра.
– Минiң тӧрт оол паза ӱс хыс. Сағам чазы читкелек пис пала. Тун оолғым Максим Хакас хазна университедiнiң хакас филология кафедразынзар ӱгренерге кiрiп алған. Очно ӱгренiп, пос туста тоғынча. Яна хызым Олимп резервi училищезiнде ас-тамах тимнеҷең усха ӱгренче. Пӱӱл ӱгредиин тоосча. Леонид Таштыптағы училищеде штукатур-маляр специальнозын алча, ол iдӧк халғанҷы курста. Светлана тоғызынҷы класста, ол, 11 класс тоозып, аннаң андар ӱгредиин узарадарға пӧгiнче. Хайдағ специальность аларға пӧгiнчеткенiн чоохтабинча. Иосиф читiнҷi класста, Айсили пис класста, Рустам ӱзiнҷi класста ӱгренчелер, – чоохтаан Мария.
Мария ТОЛМАШОВА палаларынаң хада
Толмашовтарның чуртынзар чағын пастырғанда, тасхар чарых таа полған полза, тураның тасты наа чыл гирляндазынаң чазал парғаны кӧрiнген. Наа чыл алнында полған на кiзi чалахай кӧңнiліг полча, хайдағ-да хайхастар сағыпча алай позы ол хайхастарны идерге кӱстенче. Халғанҷы чылларда хысхызын пiр хадыллығ тураларда чуртапчатханнар чурттарын чазапчалар. Хай пiрее муниципальнай пӱдiстерде иң артых чазалған тураның ээзiне сыйых читiрiлче. Индiркi Тӧӧ аалда андағ марығ чарлалбиндыр. Мария Толмашова палаҷахтарының сурынызынаң тураны чарыпчатхан гирлянданаң чазаптыр. Таныхтирға кирек, Мария позы даа, палалары даа аалның халых чуртазында ӧткiн араласчалар.
– Пiстiң аал чуртағҷылары халых чуртаста ӧткiн араласчалар. Аннаңар ӱлӱкӱннер хынығ иртчелер, чииттер дее тартылчалар, хада тимненчебiс. Ойыннар турғысчабыс, сарнапчабыс. Ӱр ниместе Наа чыл пайрамы ирт парған, коронавирус чуғынҷах ағырығ тарап, пiстiң Культура туразында Наа чыл iкi чыл таныхталбаан. Чон ӱлӱкӱнге тың сағын парған, аннаңар клубсар илееде кiзi чыылған. Олғаннар даа, улуғлар даа чахсы тынанып алғаннар, – таныхтаан Мария.
Кӧп палалығ iҷе иркеҷектерiн чалғызан даа ӧскiрчетсе, оларға чахсы хайча паза полғанынаң на чоох алысчаң тус таапча. Чайғы тынағ кӱннерiнде улуғ сӧбiре чир-суубыстың чапсых чирлерiнде паза кӧллерiнде пол килче. Ӱлӱкӱннерге алай тӧреен кӱннерге палалары чыылызып, улуғ пайрам итчелер. Ит сыстап, ойыннар ойнап, тусты хынығ иртiрчелер.
САДЫҒ ТУРАЗЫНДА
Аал чуртазынаңар паза наа хабарларны садығ туразында пiлiп аларға чарир. Аннаңар «Надеждазар» кiргебiс. Сыннаң даа, анда нинҷе-де чуртағҷы чоох алысчатхан. Че пiс хабарҷы полчатханыбысты пiлiп алғаннарында, чоохтазарға уйадыбысханнар. Садығҷы Маргарита Мамышева садығ туразында 10 азыра чыл iстен парир, аалдағы чуртасты чахсы пiлче. Кӱннiң кiзiлер кил парчалар, сағыссыратчатхан сағыстарынаң ӱлесчелер. Аннаң аалдағы чуртастаңар, сидiксiнiстердеңер чоохтап пирерге сурынғам.
Садығҷы Маргарита МАМЫШЕВА
– Пiстiң аал кӧрерге ле улуғ, сыннаң мында чуртағҷылар cаны асхынах. Туралар анда- мында турчалар, аннаңар аал узунға парыбысча. Ағаа хоза аразында ээн чурттар тоғасча. Чииттер мында тудылбинчалар, кӧбiзi город-аймахтарзар тоғыс соонҷа парыбысча. Че аалны саңай изелче тиирге чарабас. Мал-хус тудып айғасчатханнар пар. Кӧбiзi пос хониин тилiдiп парыстанча, оларның санында чииттер дее пар, аалда iдӧк кӧп палалығ сӧбiрелер чуртапчалар. Мыннаң мындар чуртас хайди салылары сағыссыратча, аалда чуртас чахсыланар ни?
Пiстiң аалда газеталар таратчаң кiзi чоғыл. Тоғыс тың сидiк тіп полбассың, че чал ахчазы уғаа асхынах тӧлелче. Ағаа хоза оларны, садығҷылар чiли, аймах-пасха ниме-ноо садарға кӱстепчелер. Хайдағ-да парыс ағыларға киректер почтаа. Аннаңар анда тоғынарға ынабинчалар.
Аал чуртағҷылары ӧӧнiнде мал тудып парыстанчалар нооза, пӱӱл, тiзең, ибде мал соғарға чарадылбиныбысты. Че мал сохчаң цехтар асхынах, пастап пӱдiрiп аларға, анаң чарлағ сығарарға кирек тiп сағынчам. Олаңай чонның малны ол цехтарзар апарар транспорт чох полар нооза, хайди поларбыс ни... – прай даа аал чуртағҷыларын сағыссыратчатхан сағыстарны читiрген Маргарита Мамышева.
Автор :
Александра КАРАМЧАКОВА, Наталья ТЮКПЕЕВА Сомнар Наталья ТЮКПЕЕВАНИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде