ИМНЕГ КИРЕЕНIҢ ТАҢДАҒЫ ТОҒЫНҶЫЛАРЫ
25.01.2023
Хабарлар
Пастағы парта кистінде Аймир САГАЛАКОВНАҢ Анастасия ДАНИЛОВА одырчалар,
ікінҷі парта кистінде – Дарья КОБЕЖИКОВА
25 январьда – Россия студенттерiнiң кӱнi. 2022 чылның сентябрь айында Алтай аймааның Хубачар аалында Харатастағы кӧп профильлiг техникумның филиалы iзиин студенттерге пастағызын на асхан. Анда чииттер «Сестринское дело» специальность алчалар
Наа азылған ӱгредiг заведениезi ортымах школаның туразында орныхча. Сағам анда пiр группа ӱгренче, отыс кiзi саналча. Прай Хакасиядаң студенттер ӱгренчелер. Iдӧк хонҷых регионнардаң килген олғаннар пар: iкiзi – Тувадаң, пiрсi – Хызылчар крайындағы Ужур город хыриндағы чааҷы частьынаң. Алты студент кӧстеглiг оңдайнаң ӱгренерге кiрген, олар стипендияларына хоза Хакасияның хазых хайраллаҷаң министерствозынаң тӧлеглер алчалар. Iдӧк ахча тӧлеп ӱгренчеткеннер пар. Ӱгренiсте маңнаныстығ олғаннар стипендия алчалар, социальнай стипендия пирiлiбӧкче.
Студенттернiң чуртаҷаң орны пар. Амғы туста общежитие орныхчатхан тура Хубачар аал чӧбiни полча, аннаңар оол-хыстар анда социальнай найм чӧптезиинҷе чуртапчалар. Пӱӱл ол училищее пирiлер тiп кӧрiлче, кирек пiчiктер тимнирiнҷе тоғыс апарылча. Амды анда тыхтағ тоғыстары апарылча, студенттернiң чуртас ондайларын чахсыландырарға кӱстенчелер.
Техникум филиалынаң Татьяна Толкачева устапча. Ол кӧп чыл Алтай аймааның ӱгредiг устанызында тоғынған, анаң Хубачардағы коррекционнай школа-интернаттың директоры полған. Паза мында методист Ирина Непомнящая iстенче, студенттернiң кураторы полча. Мының алнында ол Хубачарда полған училищеде тоғынған, аны чабысханнарында, Ағбандағы колледжсер тоғысха кiрген. Ам пазох Хубачарзар айланған. Пасха тоғынҷылары – ортымах школаның ӱгретчiлерi.
Тоғынҷылар ӧмезi паза студенттер ортымах ӱгредiгде чолларын наа ла пастапчатхан ползалар даа, пастағы чидiглерi пар. Iди Алтай аймааның проекттер мариинда грант утып алғаннар, ол ахчаа агитация тоғызын апарарға сағынчалар. Материаллар тимнеп, аймахтың школаларынзар чӧрерлер, абитуриенттерге ӱгредiг учреждениезiнеңер чоохтирлар. Ӱр ниместе студенттер, республика синiнде иртчеткен олимпиадада аралазып, биология предметче ӱзiнҷi орын алғаннар.
Пастағы курста олғаннар 10-11 класстарның ӱгредiг программазын иртчелер. Iкiнҷi курстаң специальность хоостыра дисциплиналарны ӱгренiп пастирлар. Андағ даа полза, кирек оборудование азынада алылған паза полған на студенттiң алынҷа компьютерi полар тiп кӧрiлче. Ӱгредiг 3 чыл 10 айға кӧрiл парған.
Киҷеегi ӱгренҷiлер пӱӱнгi кӱнде студент чуртазына кӧместең кӧнiкчелер.
Анастасия Данилова Асхыс аймааның Пилтiр аалынаң. Ол имнег киреене ӱгренерiнеңер хаҷанох сағынғам тiп чоохтапча. Аннаңар Интернетте килiстiре ӱгредiг учреждениелерiн тiлепчеткенде, Хубачарзар медсестраға ӱгренерге алчатханнаңар хабарны кӧр салған. Анастасияның пабазы саринаң имнег киреенде iстенчеткен туғаннары пар. Iдӧк аның хазии уйан туңмазы пар, пiрееде ол ағырыбысса, Настя аны кӧрче, полысча. Арса, анзы даа хыс паланың имнег киреен таллирына сылтағ полған. Ол чахсы ӱгренче, мыннаң мындар ӱгредиин хайди даа узарадып, техникумны тоосхан соонаң имҷее ӱгренерге пӧгiнче.
Аймир Сагалаков Ағбан городтаң, 20 № школаны тоосхан. Аның чооғынаң, пеер кiрiп, ол позының кӱзiн сынирға сағынған. Имнег тураларында удаа чадарға, имҷiлернiң тоғызын кӧрерге килiсчең, хынығ пiлдiрҷең тiпче ол. Ағаа хоза, Аймирге пастағы имнег полызиин пирерге килiстiр. Арғыстарынаң суға сомарға чӧртiрлер, пiр оол холын тың сызырып алтыр. «Палиин сӱртклеп, пластырь чапсырғам. Ханны кӧрiп, пiр дее хорыхпаам», – чоохтапча ол. Ол iдӧк имҷее ӱгренiп аларға кӱстенербiн тiпче. Уламох Татьяна Толкачева аны уғаа кӱстенҷiк оол тiп таныхтапча. Аймир ахча тӧлеп ӱгренче, че ол позын чахсы ла саринаң кӧзiтчеткеннеңер, филиал директоры аны бюджет орнына кирер оңдайларны тiлепче.
Дарья Кобежикова Шира аймаандағы Хызыл чул аалдаң. Чоохчыл аалдағы школаны тоосхан. «Пиҷем имҷi поларға сағынған, че аның ол чолҷа парар оңдайы килiспеен. Аннаңар ол мағаа имнег киреен таллирға чӧп пирген. Хайда ӱгренердеңер позымның сағыстары чох полғанда, аннаң чарасхам», – нандырған ол, ноға имнег киреене ӱгренерге чаратхазың тiп сурғанымда. Пурун Дарья Харатастағы кӧп профильлiг техникумзар кiрерге пiчiктер пиртiр, соонаң ағаа Хубачарзар кiрiп алғазың тiп сығдыраттырлар. Специальнозын позы таллабаан даа полза, ол ӱгредиин тоозарға пӧгiнче. Пастап имнег туразында тоғын кӧрербін, анаң, пу кирек кӧңнiме кiрчетсе, ӱгредиим узарадарбын тiпче чиит хыс.
– Пастағы сессияның салтарлары чахсы тiп санапчам. Хай пiреезiнiң «ӧдiстерi» парох, че, сағынчам, олғаннар оларны табырах чабызарлар. Уламох оларнаң кӱстiг ӱгретчiлер тоғынчалар. Студенттерiбiс сағам экзаменнер тударға ӱгренчелер, наа чуртас оңдайларынаң танысчалар. Мыннаң мындар орындағы имнег туразынаң, музейнең хада-пiрге тоғынарына iзенчем. Олғаннарға Пушкин карталарын итiрерге пӧгiнчебiс, – ӱлескен сағыстарынаң Татьяна Васильевна.
Харатастағы кӧп профильлiг техникумда наа ӱгредiг чылында Хубачарда медсестраларға ӱгредер хоза группа азылар тiп кӧрiлче, iдӧк ас-тамах тимнеҷең устар группазы полар. Iзенербiс, пола-пола мыннаң сыххан олғаннар, постарын турыстыра кӧзiдiп, ӱгредiг учреждениелерiн сабландырарлар.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде