ӰГРЕНҶІЛЕР ШКОЛАНАҢ АНЫМҶОХТАСЧАЛАР
24.05.2023
Хабарлар
Калининдегі ортымах школаны тоосчатханнарның
чӱрек талбыратчатхан тузы
Халғанҷы саң. Пу кӱннерде школа тоосчатхан ӱгренҷілерге халғанҷы саң сыңыраан. Хакасияның ӱгредіг паза наука министерствозының искіриинең, пӱӱл республикада 11 классты 2400-че ӱгренҷі тоосча, 9 классты – 5600-че
АСХЫС АЙМААНДАҒЫ КАЛИНИНДЕГІ ОРТЫМАХ ШКОЛАДА 22 ӰГРЕНҶІ 11 КЛАССТА ӰГРЕНЧЕ. ПАСТАП ІКІ КЛАСС ПОЛҒАН, ЧЕ 9 ПАЗА 10 КЛАСС СООНАҢ КӦБІЗІ ТАШТЫПТАҒЫ, АСХЫСТАҒЫ, ПИИДЕГІ ПАЗА АҒБАНДАҒЫ ПРОФЕССИОНАЛЬНАЙ ӰГРЕДІГ УЧРЕЖДЕНИЕЛЕРІНЗЕР ӰГРЕНЕРГЕ ПАРЫБЫСХАНДА, ОЛҒАННАР АСХЫНАХ ХАЛҒАН. ОЛАРНЫ ПРАЙЗЫН ПІР КЛАССХА ПІРІКТІРГЕННЕР. КЛАСС УСТАҒҶЫЗЫ – РУСТАМ ЮРЬЕВИЧ КАНЗЫЧАКОВ.
– Пастағы класста спортнаң айғасчатхан пала кӧп полған. Олар волейбол, кӱрес, футбол секцияларына чӧрҷеңнер, ікінҷі клазы сала амыр полған. Оларны піріктірібіскенде, класста чуртас хынығ пол сыххан. Уйатчыл арахтар аймах мероприятиелерде ӧткін аралас сыхханнар. Пістің класс ынағ, амыр. Онҷа пала 4-5-ке ӱгренче.
Пу палаларны сығарыбыссам, 5-ҷі классты аларбын алай ба албаспын, ам чоохтап полбаспын. Кічіглерні алып алзам, оларнаң читі чыл тоғынарға кирек. Мин сағынчам, класстарны чиит ӱгретчілернің холына пирерге кирек. Олар чапчаңнар, олғаннарнаң табырах тіл алыс полчалар. Калининдегі школада, тізең, чиит специалист кӧп, – чоохтапча Рустам Канзычаков.
Пӱӱл школаны тоосчатханнарның тӧрті имҷі поларға пӧгінче, нинҷе-де олған техническай вузты таллап аларға сағынча. Олғаннарның аразында хакас тілі ӱгретчізі полар кӧңніліг ӱгренҷі парох.
– Алина Тюдешева хаҷаннаңох ӱгретчі поларға сағынча. Итсе-де, аннаң даа пасхазы ӱгретчі поларҷых, олар хакас тілінең чахсы чоохтасчалар, че имҷее ӱгренерге сағынчалар. Имҷілер піске киректерӧк, аннаңар имҷі ползыннар. Ізенчем, чииттер, профессия алып алзалар, ибзер, Хакас чирінзер, айланарлар, – чооғын узаратча класс устағҷызы.
Алина Тюдешева ӱгретчілер сӧбірезінде ӧскен. Ол Н.Ф. Катановтың адынаң Хакас хазна университедінің хакас кафедразынзар ӱгренерге кірерге пӧгінче.
– Рустам Юрьевичнең хада піс пис класстаң сығара хакас тілінҷе аймах марығларда, олимпиадаларда, конференцияларда араласхабыс. Аннаң пасха, минің улуғ харындазым Василий Андреевич Тюдешев Индіркі Тӧӧ аалда ӱгретчі полып тоғынча, іҷемнің пиҷезі Жанна Григорьевна Субракова Полтах аалда математика ӱгретчізі полча паза Асхыстағы коррекционнай школада кӧп туған тоғынча.
Школада піс ынағ чуртаабыс. Класс устағҷыбыс Рустам Юрьевич чорыхтарға чӧрерге хынчатхан кізі, аннаңар пісті дее хада ал турҷаң. Ирткен чылда піс Пуланнығ кӧлзер тынанарға чӧргебіс. Нинҷе-де километр чазағ парғабыс. Анзы иң хынығ полған тіп сағынчам. Піс чол пастыра кӧп чоохтасхабыс, хатхырысхабыс, – сағысха кирче Алина.
Виталий Асочаков ідӧк пӱӱл школа тоосча. Ол спортнаң айғасча. Футбол секциязына чӧрче.
– Мин Железногорсктағы университетсер ӱгренерге кірерге сағынчам. Анда ӧрт ӱзірҷеңе ӱгретчелер. Минің пабам ӧрт ӱзірҷең полып ӱр тоғын салған. Ам тынағда. Кӧрҷеңмін, хайди ол позының тоғызына, хада тоғынчатхан арғыстарына паарсаҷаң, аннаңар тоғысха хынып чӧрҷең. Мин дее іди тоғынарға сағынчам, – кӧңнінең ӱлесче чиит оол.
Ӱгренҷілерні школа тоосчатханынаң алғыстирға оларның пастағы ӱгретчілері, іҷе-пабалары, туған-чағыннары килгеннер. Олар пір саринаң ӧрінгеннер, че олох туста палалары ӱчӱн пичелленгеннер.
Cтанислав паза Маргарита Чаптыковтарның алтынҷы палазы пӱӱл школа тоосча. Палаларының прайзы даа пу школада ӱгренген, постары даа 40 чыл мының алнында пу школадаң сыхханнар.
– Хайдағ даа палабыс школа тоосчатса, чӱрек талбырапча. Оларның ӱчӱн сағыссырапчабыс, чоллары хайди парары ӱчӱн пичелленчебіс. Че ол чуртас. Хаҷан полза, палаларны пос хыринаң позыдарға кирек. Светлана хызыҷаабыс чахсы ӱгренген, сыныхтағларны ідӧк тудыбызарына ізенчебіс. Ол – чайаачы хызыҷах. Пу кӧстегҷе аннаң андар ӱгренерге сағынча, – чоохтапча Маргарита Васильевна.
Светлана хыстары школадаң парыбысса даа, Чаптыковтар школанаң анымҷохтаспастар. Тӧрт чыл пазынаң сӧбіренің читінҷі палазы пу школаны тоозар. Ағаа хоза пастағы пархаҷахтары ікінҷі класс тоосча, ікінҷізі пу школазар пӱӱл пастағы классха парар.
Асхыс аймааның ӱгредіг устанызы искіриинең, пӱӱл аймахта 550-ҷе ӱгренҷі 9 класс тоосча, 11 классты – 220-ҷе. Иң кӧп олғанны Асхыстағы лицей-интернат, Асхыс поселоктағы паза Калининдегі ортымах школалар сығарчалар. Иң асхынах ӱгренҷі Тӧӧ пазы паза Пирікчул ааллардағы школаларда. Пастағызында ікі пала 11 класс тоосча, ікінҷізінде – ӱc.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде