Киистең иділген ниме-ноо кӧзідии
02.08.2023
Хабарлар
Кӧрігҷілер «Ӧңніг киистер» чайаачы устарның тоғыстарын кӧрчелер
Культура. Ӱр ниместе Ағбандағы «Чылтыс» хоосчылар кӧзідіг залында чайаачы устарның киистең иділген тоғыстарының «Ӧңніг киистер» кӧзідии азылған
Прайзы пілче, хой тӱгінең катанкалар пасчалар, че ідӧк аннаң аймах ниме-ноо идерге чарир. Пӱӱнгі кӱнде устар тӱктең пӧріктер, киптер, ойнаҷахтар, хоостар, сӱӱмектер, телефоннарға чехоллар, частар паза даа пасха чапсых нимелер пасчалар. Кӧзідігде киистең иділген ниме-нооны кӧріп паза холнаң тудып аларға чарир.
Кӧзідігнің азылғанында араласхан Ағбан город пазының социальнай сурығларҷа орынҷызы Татьяна Карташова:
– Ағбанда пастағызын на наа оңдайнаң «Ӧңніг киистер» кӧзідіг иртірілче. «Войлок Хакасии» пірігіс городтың аймах проекттерінде, фестивальларында сыбыра араласча. Ідӧк пірігіс устары чайаачы тоғыстарынаң Москвадағы, Санкт-Петербургтағы, Парижтегі кӧзідіглерде араласханнар. Олар «Кочевниктің чазы чолы» проектте паза «Турист сувенирі» тиксі Россия мариинда араласханнар. Че тоғыстарының кӧзідиин Ағбанда пастағызын на иртірчелер. Пӱӱн мында тиксі Хакасияның паза Хызылчар крайының чайаачы устарының иң артых хоос тоғыстары кӧзіділ парған. Ағбандағы хоосчылар галереязының специалисттері кӧзідігні чайаачы оңдайнаң чазирға полыс пиргеннер. Кӧзідігнің тузы уғаа килістіре таллал парған, сағам чайғы, чир-суубыста илееде турист. Олар мындағ чайаачы тоғыстарны хынып кӧріп аларлар тіп сағынчам.
Кӧзідіге прай 160 чайаачы тоғыс сығарылған, оларны 16 ус тимнеен. Полған на ипчінің позының чайаачы кӧрізі паза кӧңніне килістіре тоғыс полча. Кем-де пӧріктер, сілепелер, черкейлер пасча, кемнің-де кӧңніне ойнаҷахтар идері кірче, хайзы перчаткалар, мелейлер, палантиннер, киптер алай пасхаҷыл сӱӱмектер тікчелер. Пу кӧзідіге устар тоғыстарын, кӱстеніп, прай чӱреенең толдырғаннар. «Войлок Хакасии» чайаачылар пірігізі киис пасчаң киректе наа ла пастапчатханнарны паза ол киректе ус полыбысханнарны піріктірген. Че сизінерге чарир, олар прайзы пу чайаачы тоғысха прай чӱреенең хайчалар паза аннаң хынып айғасчалар.
– Пістің «Войлок Хакасии» пірігіс 2015 чылда тӧстелген. Сағам клубта 16 ус істенче. Киистең катанкалар ла нимес пазылча. Кӧрчезер, кӧзідігде хайдағ ӧкер тоғыстар сығарыл парған. Кӧзідіге килген аалҷыларның піреезі кииснең пазып айғас кӧрерге сағынза, пістің устар ӱгредерге тимделер. Піреезі пістің чайаачы пірігіске хозыларға сағынчатса, піc ӧрінербіс. Пістің прайзы кииснең айғазарға хынча паза ағаа прай чӱреенең хайча, – чоохтаан пірігіс устағҷызы Лариса Благодатина.
«Ӧңніг киистер» кӧзідіг 27 августха теере тоғынар. Хайди искірілген кӧзідігде, полған на тоғысты чахсы кӧріп аларға, кӧңніңерге кірчетсе, садызып аларға чарир. Ідӧк чапсых искіріг, «Войлок Хакасии» пірігіс амды чайаачы устарның тоғыстарын, ікі чылда пір хатап кӧзідіг тимнеп, чир-суғҷыларның хайиина сығарар. Ол тус аразына устар наа тоғыстар тимнирге маңнан турарлар. Илееде чайаачы тоғыс тимнелген. Олар прайзы даа кізі хайиин тартча. Уламох хакас чонның культуразынаң алай кибірлерінең палғалыстығ тоғыстар. Кӧзідігде киис пазарынҷа ус Надежда Нарылкованаң танызып алғам. Ол айғасчатхан чайаачы киректеңер паза хайди аннаң айғазарға пастааннаңар чоохтап пирген.
– Мин киис пазарынаң 2012 чылдаң сығара айғасчам. Пастап иирген чіпнең палғаҷаң полғам, анаң пірсінде садығ туразынзар чіп аларға парғам. Анда киистең чахайах идерге ӱгреткеннер. Мин ол мастер-класста аралазыбысхам. Таныхтирға кирек, хайхап таа парғам, хайди ӱр нимес тус аразына кічиҷек хой тӱгінең андағ ӧкер чахайах ит саларға чарир тіп. Ол садығ туразы «Вязанный Мир Альбины Черкасовой» адалған. Мастер-классты Альбина Черкасова иртірген. Ол Хакасияда киистең чайаачы тоғыстар пазып пастааннарның пірсі полча.
Мин амды тынағдабын, сағам чӱрееме чатчатхан ікі кирекнең айғасчам. Чайғызын чахайахтар ӧскірчем, хысхызын киистең аймах нимелер пасчам. Кииснең тоғынҷаң алынҷа мастерской чоғыл, аннаңар пістің пірігісте прайзы даа ол тоғыснаң ибде айғасча. Минің чағыннарым анзына ӱгрен тее парғаннар, айғасчатхан кирееме чахсы хайчалар.
Позымны сілепе итчеткен усха санапчам. Кииснең тоғынар алнында 1990 чылларда мин теердең пӧріктер тікчеңмін. Ол туста кӧбізі андағ пӧріктер кисчең, аннаңар кізілер оларны тіктірҷеңнер. Амды мин киистең сілепелер итчем. Кӧзідіге сілепелер, паннолар сығарылғаннар.
Минзер хакас иреннер удаа айланчалар, оларның кӧрізінең, хакас иреннернің пӧріктер чоғыл. Сыннаң чоохтаза, теердең тігілген чылығ пӧріктер пар, че чуға пӧрік кӧрбеем. Сизінчем, пасха тӱрк чоннарның андағ пӧріктер пар, кӧзідімге, тува чонның. Олар пӧріктерін кис салзалар, ырахтынох сизінчезің, тува чирінең тіп. Хырғыс, пӱрӱт иреннер пӧріктерін кис салзалар, уғаа ӧкер кӧрінче. Хакастарның ноға чоғыл ни? Піс Александр Иванович Котожековнаң ол сурығны ӱзӱргебіс. Анаң ол пос кӧрізінҷе пӧріктің хоозын тимнебіскен, мин пызыбысхам. Ол пӧрікті Александр Котожеков ӱлӱкӱннерде кибірлер иртірчетсе кис салча. Мин чуртағҷыларны хада-пірге тоғынарға хығырчам, арса, хакас иреннер мының алнында хайдағ пӧріктер кисчеңнерін піреезі пілче. Андағ пӧрікті хада тимнебізерге чарир, аны хоостыра минзер айланыңар. Мин хаҷан даа ӱзӱрерге тимдебін.
Киис пазарынҷа пастағы пілістерні мағаа Альбина Черкасова пирген, анаң позымның хоос кӧрістері хоостыра істенгем. Интернетте сілепелерҷе Россияның иң пӧзік пілістіг узы Ирина Спасскаяны таап алғам. Ол Москвада чуртапча, интернетче палғалызып, андар ӱгренерге пазын салғам. Москвазар парып, занятиелеріне чӧргем. Ол уғаа чахсы ус, аның сілепелерінің паазы аарлығ, кӧзідімге, «Хысхы нымахтар» чыындызындағы сілепе 25 муң салковайға турча. Анда ӱгредіг ниик турбинча, че мин кӱстеніп пар килгем. Наа пілістер алып алғам, ӱгредіг тузалығ полған. Амды кӱскӱзін, улуғ нимес группа чыып, киис пазарға ӱгредерге сағынчам, – чоохтаан Надежда Нарылкова.
Сом авторни
Автор :
Наталья Тюкпеева
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде