Саңай тайма искіріг тарадылча
25.08.2023
Хабарлар
Хакасия пазының орынҷызы Юрий Курлаев
Кӱн сурии. СМИ-ларда СВО-да араласчатхан пістің чааҷыларға паза оларның сӧбірелеріне хабазар сурығларҷа, ідӧк фронтсар гуманитарнай полызығ ызар сурығларҷа регион ӱлгӱлері пір дее ниме итпинчеткеннеңер, пу тоғысты Хакасия правительствозы чахсы апарбинчатханнаңар искіріг тарадылча
Пу сурығлар ӱчӱн нандырчатхан Хакасия пазының орынҷызы Юрий Курлаев тарадылчатхан искірігні саңай тайма паза республика чуртағҷыларын алаахтырча тіп чоохтаан.
Хайди ол искірген, Хакасияда СВО араласчыларына паза оларның cӧбірелеріне хабазар оңдайлар тимнелген, алылған паза тоғынча.
Хакасия пазының чахиинҷа, мобилизация пасталарынаң республика правительствозы регионнаң парған чааҷыларға паза оларның сӧбірелеріне прай кирек полызығ пирче. Олох туста республика бюджедінең полған на чааҷаа ниме-ноо сухчаң хаптар толдырарына кирек ахча позыдылған. Оларға ахчанаң табырах полызарға, 2022 чылның октябрьында республика правительствозы резерв фондынаң мобилизацияа хабылғаннарның cӧбірелеріне ортымахти 40-ар муң салковай тӧлеп пирген. Бюджеттеңер закон тӱзеділген соонда ол тӧлег 100 муң салковайға теере кӧдірілген.
Пӱӱл январьда СВО-ның прай араласчыларына, ол санда контрактниктерге паза пос кӧңнінең парғаннарға паза оларның cӧбірелеріне хабазар Хакасия правительствозы тимнеен регион программазы алылған. Пу чылға ла аны толдырарына 200 миллион азыра салковай позыдылған. Ол программаҷа СВО араласчыларына коммунальнай полызығлар ӱчӱн тӧлеге паза тиксі тыхтаға льготалар, хара тас-одың садызарына тӧлеглер, транспортта чӧреріне льготалар, палаларын тикке хазыхтандырары паза имнег реабилитация иртірері кӧрілче.
Хакасияның прай муниципалитеттерінің устағ-пастаа мобилизацияа хабылғаннарның сӧбірелеріне хабазар хоза оңдайлар киргеннер: 5 – 11 класстар ӱгренҷілерін тикке азыриры паза олған сады ӱчӱн тӧлегдең позыдары.
Федеральнай ӱлгӱлернің паалаанҷа, СВО араласчыларының сӧбірелеріне хабазар республикада алылған оңдайларҷа, полызығны табырах паза чахсы пирерінҷе республика хазнада иң алнындағы он регион санына кірче.
– Піcтің армияа хабазарынҷа республика уғаа улуғ тоғыс апарча. СВО-ның пастағы кӱннерінең cығара республикада гуманитарнай полызығ чыыр тоғыс сыбыра апарылча. Республика чуртағҷылары, халых пірігіcтері, волонтерлар, олаңай даа кізілер анда араласчалар. Хакасия чир-суғҷыларыбысха чаалазығ парчатхан чирлерзер сыбыра таарлағлар ысча. Олар чааҷыларның сурыныстары паза кирексіністері хоостыра тӧстелчелер, прай кирек ниме-ноо ызылча. Хакасияның правительствозы чыылған таарлағларны апарарға, транспорт аларына полызығ пирче, – таныхтаан Юрий Курлаев.
Хайди ол хоза искірген, пӱӱл часхыда Хакасиядаң чаалазығ парчатхан чирлерзер 28 автомобиль парыбысхан, олар республика бюджедінің, идінҷектернің паза организацияларның ахчазына алылғаннар. Іди ызылған транспорт санынҷа пістің республика Сибирьде 2-ҷі орында полча.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде