Ағырсымнығ сурығлар пӧгілер
25.08.2023
Хабарлар
Асхыс аймаа пазының пастағы орынҷызы Евгений Костяков, Хакасия пазы Валентин Коновалов паза Хакасия пазының Асхыс аймаанҷа уполномоченнайы Яков Идимешев
Тоғыс чорығы. Хакасия пазы Валентин Коновалов республика чуртағҷыларынаң тоғазығларын узаратча. Ирткен неделяда ол Асхыста тоғыс чорығынаң полған
Тоғазығда ідӧк республиканың хай пірее министрлері паза Асхыс аймааның устағ-пастаа араласханнар. Чыылығ азыл парғанда, чуртағҷылар ағырсымнығ сурығларына нандырығлар алғаннар.
– Асхыс аалда автобустар маршрудын азыбызар оңдай пар ба? Аның ӱчӱн тохтағ орыннарын пӱдірерге, чолларда килістіре танығлар киректелер. Олар чох идінҷектер аалзар кірерге ынабинчалар.
– Андағ тоғысты идер ӱчӱн, аал чӧбіне тохтағларға орыннар кӧр саларға паза нинҷе ахча киректелерін санап саларға кирек, – нандырған Валентин Коновалов.
Асхыс аал чӧбі пазының орынҷызы Эдуард Пахтаевтің чооғынаң, аалда тохтағ орыннары пар. Аннаң ӱгренҷілерні школазар тарт чӧрчелер. Аалда маршрут азар ӱчӱн, перевозчиктернең чоохтазарға паза тохтағ орыннарын нааҷылабызарға киректелер. Хакасия пазы ол сурығны пӧгерінде хабас пирерге молҷаан.
– Асхыс – Ағбан чолда иң изелген кизектер тыхталған. Че сайбал парған орыннар ам даа пар, оларны тӱзедері кӧрілче бе?
Хайди таныхтаан Валентин Коновалов, тыхтағ республика правительствозының паза подрядчиктің чӧптезиинҷе толдырыл парған. РЖД-даң ахчаны айландырарынҷа ам даа тоғыс парча. Чол ӧдіске нааҷылалған. РЖД-даң ахча кірзе, тыхтағ тоғызы узарадылар.
Хакасияның транспорт паза чол хонии министрі Дмитрий Василиадинің чооғынаң, чолны иділген нааҷыластаң тӧрт хати кӧп тоғыс идібізерге киректелче. Аннаң пасха пландағы тыхтағ тоғыстары толдырылған. РЖД-даң ахча ӱртӱн айында кірері кӧрілче.
– Ағбанда 10-ҷы чурт аймаанда тураларны чарытхынаң чылыдар программа чуртасха кирілче. Аймахтарда ол тоғынар ба?
– Ол программа Ағбанда паза Алтай аймаанда толдырылча. Че ол тӧрт муниципалитетке кӧріл парған, андар Ағбан, Харатас городтар паза Алтай, Ағбан пилтірі аймахтары кір парғаннар. «Арығ кии» хазна программазына кіріп алзабыс, федеральнай бюджеттең ахча алып алар оңдай полар. Ідӧк уйан экологиялығ пасха аалларда ол тоғысты апарарын кӧр саларбыс. Че ол программа ам даа тоғынминча, – искірген Валентин Коновалов.
Ідӧк республикада туризмні тилідерінеңер сурығ кӧдірілген. Хакасия пазының чооғынаң, халғанҷы тӧрт чыл аразына пістің регионзар кӧп турист кил парған. Ирткен чылда Хакасияда миллионынҷы турист ааллаан. Пис чыл аразына республика бюджедінең туризмге хорадығлар читі хати ӧс парған. Ідӧк инфраструктураны тилідеріне ахча позыдылған. 2020 чылда туристтернің хайиин тартчатхан пис орын ілезіне сығарылған. Республиканың транспорт паза пӱдіріг министерстволары улуғ тоғыс толдырыбысханнар. Ирткен чылның салтарларынҷа, туризм бюджетке пір миллиард артиинаң салковай парыс пирген.
– Пилтір аалда олғаннар олаңай кӱреснең ӧткін айғасчалар. Пу чағында тузаланылбинчатхан тураны спортха пирібізер оңдай пар ба?
– Пилтір аалда спорт тимненізінің аймахтар аразындағы кінні пӱдірері кӧрілче. Пӱӱнгі кӱнде ол сурығны аймах устағҷылары республиканың спорт министерствозынаң пӧкчелер. Пазағы чылда аны пӱдіріп пастирлар.
– Ӱӱ тағ Асхыс аймааның ізии полча. Аны иптебізер оңдай пар ба? Анда тасхын чӧрҷең орын даа чоғыл.
– Биотуалетті турғыс салзабыс, аны прай сайбап саларға айабастар. Ӱӱ тағда ағас туалет турғыс саларға чахығ пирербін. Туризмге республика правительствозы улуғ хайығ салча. Хакасияның тиліс стратегиязынҷа Ағбан городта туризмҷе проектті чуртасха кирчебіс. Аны хоостыра чолларда музейлердеңер искірігліг танығлар турғызылча. Анаң туризм программазына кір парған объекттернің тиліс программазын тӧстирбіс.
– Тӧрт тас аалда наа школа пӱдірии кӧрілче бе? Амғы туста ӱгредіг учреждениезі ікі квартиралығ турада орныхча.
– Піс аймах устағҷыларына школада тиксі тыхтағ тоғызын толдырыбызарға чахығ пирерҷікпіс. Че федеральнай норматив хоостыра аалда палалар саны хозылары кӧрілбинчетсе, ол аалда наа школаны пӱдір полбас, – нандырған Валентин Коновалов.
Хайди таныхтаан Асхыс аймаа пазының пастағы орынҷызы Евгений Костяков, чайғызын Тӧрт тастағы школада тыхтағ тоғызы иділген.
– Кічіг паза ыраххы аалларны хайраллир паза тилідер программаны айландырарға сурынчабыс.
– Ол программа ам даа тоғынча, че пірее мероприятиелер аннаң сығарылған. Мал ӱчӱн тӧлеглер пирер оңдайларны алыстырыбысхабыс. Кресен-фермер хоныхтары сананыстаң суурынчалар. Налог тӧлир орнына олар полызығ алчалар. Аның ӱчӱн нинҷе-де ле мал ӱчӱн ахча пирілче. Пӱӱнгі кӱнде ол программаа 300-ке теере чуртағҷылығ ааллар кірчелер. Пӱӱл піс тӧлеглерні 20 процентке ӧскірібіскебіс. Программаларҷа пасха даа полызығлар пирілче.
Тоғазығда имнег киреене паза пасха даа сфераларға теелчеткен сурығлар кӧдірілген. Ағырсымнығ сурығларны республика паза аймах устағҷылары хайыға алғаннар.
Сом авторни
Автор :
Антон Чертыков
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде