Ойыннар пастыра чоннар культуразынаң танысханы
01.09.2023
Хабарлар
Северск городтағы артист Александр Гренчюк паза «Подорожник» культура кінінің устағҷызы Павел Шнягин
Фестиваль. Пу неделяда Ағбандағы «Подорожник» культура кіні «Тилекей ойыннары» театрлар фестивальын ікінҷі хати иртірді
Мындағ алғым ӱлӱкӱнні наа культура кінінің устағҷызы, актёр, режиссёр Павел Шнягин сағын таап алған. Ол президенттің культура пастағлары чыындызының грантын, 2300000 салковай азыра, утып алған. Пу ахчаа ол, Санкт-Петербургтаң, Тюменьнең паза Томск облазынаң пис театр ӧмезін хығырып, республика чуртағҷыларына улуғ фестиваль иртірген.
– Пылтыр «Тилекей ойыннары» фестивальда аймах тілліг чоннарның ойыннарын на иртіргебіс. Пӱӱл, тізең, Россиядағы чоннарның культураларынаң театр искусствозы паза национальнай ойыннар пастыра таныстырчабыс, – ӱлескен Павел Шнягин.
«Тилекей ойыннары» фестиваль орғах айының 29-ҷы кӱнінде Ағбандағы культура паза тынағ паркында азылған. Ол тӧрт кӱн ирткен. Пу тус аразына піс ыраххы городтардаң килген артисттернең, танысхлап, чоохтазып алғабыс.
Пастағы кӱнінде иирде Санкт-Петербургтағы «Karlsson Haғs» театр «Мама Му. Счастливая корова» ойынны кӧзіткен. Анда ікі чиит артист Ася Галимзянова паза Михаил Хлюнев ойнааннар. Пу нымахта олар хазаада одырчатхан, че хайхастарға киртінчеткен інектеңер паза, учух чӧріп, прай чир ӱстӱн кӧрчеткен, че пір дее нимее хайхабинчатхан харғадаңар кӧзітчелер.
– «Karlsson Haғs» театр Россия синінде 10 – 15 чыл мының алнында сабланып пастаан. Аннаң сығара аны кӧклӧ театрлары аразында чахсы таныпчалар. Санкт-Петербургта пістің ойыннар кӧзітчең пис ачых пар. Полғанында ла аймах спектакльлар кӧзітчебіс. Репертуарыбыс улуғ, олғаннарға даа, улуғларға даа ойыннар тимнепчебіс, – чоохтаан артист Михаил Хлюнев.
Михаил позы «Karlsson Haғs» театрда пір чылҷа ла тоғынча. Алында ол Москвадағы аймах театрларда 15 чыл істенген. Позы Нижний Новгородта тӧреен, андағыох театр училищезін тоосхан. «Karlsson Haғs» театрдаңар хаҷанох искен, аннаңар анда тоғынарға чарадыбысхан. Пу театрдаң «Тилекей ойыннары» фестивальға пис артист килген.
Санкт-Петербургтағы «Петроглиф» театр – ол чиит театр. Анда ікі ле кізі тоғынча – ирепчі Павел паза Анастасия Овсянниковтар. Фестивальда олар «Что случилось с крокодилом?» хынығ ойынны кӧзіткеннер.
– Мин актёр полып илееде чыл тоғын парирбын. Че ӱс чыл мының алнында хонғаным Анастасиянаң хада пос театрын тӧстеп алғабыс. Аны «Петроглиф» адап салғабыс. Піске нанҷыларыбыс полысчалар. Репертуарыбыс алғым даа полбаза, спектакльларыбысха хынчабыс, оларны аймах фестивальларда кӧзітчебіс, – теен театрның устағҷызы Павел Овсянников.
Павел Овсянников 1995 чылда Екатеринбургтағы театр институдын «Кӧклӧ театрының актёры» специальностьча тоосхан. Итсе, ол позы Омскта тӧреен-ӧcкен. Аның тӧреен городында андағ институт чохтаңар ол Екатеринбургсар ӱгренерге парған. Андағыох театрда актёр полып чибіргі чыл тоғынған. Анаң Санкт-Петербургта «Кӧклӧ театрының режиссёры» специальностьха заочно ӱгренген, андох Анастасиянаң танызып алған. Соонаң хада Санкт-Петербургсар кӧзібіскеннер.
– Мин актёр тоғызын Ярославль облазындағы Рыбинск городтың театрында пастаам. Анаң Екатеринбургта, соонаң Кировта тоғынғам. Санкт-Петербургта алтынҷы чылы чуртап парирбыс, – хозылған Анастасия Овсянникова.
«Петроглиф» театр ӧӧнінде олғаннарға ойыннар турғысча. Театрның пос туразы чоғыл, аннаңар артисттер ӧӧнінде хығыртығ хоостыра тоғынчалар паза фестивальларда араласчалар. Оларны школаларзар паза олған садтарынзар сыбыра хығырчалар.
«Тилекейдегі ойыннар» фестивальға Тюменьнең «Старый саквояж» театр «Северная сказка» ойынны ағылған. Хайхастығ, пу театрда пір ле артист тоғынча – Сергей Дмитриевич Каданов.
– Пандемия алнында «Старый саквояж» театрның директоры, водительі, техниктері пар полған. Ковид пасталыбысханда, ойыннар кӧзідерге чарадылбиныбысхан, аннаңар театрның тоғынҷылары тарас парғаннар. Итсе, мин театрны 1996 чылда Пермьдегі искусство колледжіндегі студенттерге тӧстеем. Пастағы спектакль «Принцесса на горошине» полған, – чоохтаан Сергей Дмитриевич.
– Ноға театр «Старый саквояж» адалча? – сурғабыс піс.
– Мының алнында прай кӧклӧлерібіс иргі саквояжсар сыып пар турҷаңнар. Соонаң театр алғыдылған, – нандырған артист.
– Театрның пос туразы пар ба? – пазох сурығ пиргебіс.
– Мин театрға тураны арендаа суурғам. Пылтыр аның ээзі тураны садыбысхан. Амды спектакльларны музейлерде кӧзітчем, – теен Сергей Каданов.
Фестивальда Сергей Дмитриевич Россияның чон писательі Инна Заграевскаяның пьесазынҷа турғызылған «Северная сказка» ойынны кӧзіткен. Полтазы хоостыра, Ай хыс пала ӧскірче, Кӱн – оолны. Северде, тізең, чарым чыл хараа полча, чарым чыл – кӱнӧрте. Хараанаң кӱнӧрткі алысчатханда, Кӱннің оолғы Айның хызын кӧр салча. Олар удур-тӧдір кӧӧленізібісчелер, че хада поларға чарабас. Оларның ӱчӱн чир-чайаан саайлары пасталыбысча. Паза полбаста, Айнаң Кӱн палалары ӱчӱн хости турыбысчалар.
Сергей Каданов позы Кубаньда тӧреен, Казахстанда ӧскен. Пермьдегі искусство колледжінде артистке ӱгренген. Санкт-Петербургтағы «Перо» театрда, Астраханьдағы паза Кемеровтағы кӧклӧ театрларында істенген. Алты чыл мының алнында Тюменьзер кӧскен.
Ідӧк фестивальда араласханнар – Санкт-Петербургтағы «Чемодан-дуэт «КВАМ» театр паза Северск городтағы артист Александр Гренчюк.
«Тилекей ойыннары» фестиваль тузында ыраххыдаң килген аалҷыларға Хакасияның музейлерінҷе экскурсия иртіргеннер.
Таныхтирға кирек, Павел Шнягин «Подорожник» культура кінін пу чайғызын пресс-конференциялар, актёрларнаң тоғазығлар, чайаачы иирлер иртірер, ойыннар кӧзідер ӱчӱн тӧстеп алған.
Сом Дмитрий Сунчугашевт
Автор :
Татьяна Тютюбеева
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде