Наа аттар хозылча
06.09.2023
Хабарлар
Чиңісчілер Илья Топоев паза Вероника Чертыкова Хакасияның культура министрі Светлана Окольникованаң хада
Хакасияның Чайаачылар туразы хакас тілінең пазылған хоос произведениелер мариин тӧртінҷі хати иртірген. Ікі хоос произведениелер 2023 чылның 1 февральынаң пасти 31 майына теере ызылғаннар.
Пӱӱл марығда араласчатханнарға тӧреен чирінеңер кип-чоохтар пас саларға кирек полған. Республикада андағ кип-чоохтарны прозанаң алай кибеліснең пазарға алты кізі тідінген. Алында чарых кӧрген паза книгаа пазылған тоғыстарны марыға ызарға чарабас полған.
Мына 4 сентябрь чиде тӱскен. Прай республика ол кӱнні алғым таныхтаан. Ӱгредіг паза культура учреждениелерінде постары оңдайынҷа ол ӱлӱкӱнні иртіргеннер. Хакасияның Чайаачылар туразының тоғынҷылары, Ағбан город орамазынзар сығып, ӧткін кізілерні чыып, тілдеңер кибелістер хығырғаннар. Анда писательлер, ӱгретчілер, студенттер паза ӱгренҷілер араласчатханнар. Кибелістер хығырғаннарның полғанына ла пістің саблығ поэттерібістің кибелістер чыындыларын сыйлааннар.
Анаң Чайаачылар туразында кип-чоохтар марииның артыхтарын таныхтирға чыылысханнар. Чиңісчілерні алғыстирға паза ахчалығ сертификат сыйлирға ӧнетін кил парған Хакасияның культура министрі Светлана Окольникова. Ол пастап Чайаачылар туразының тоғынҷыларын, устағҷы Надежда Бурнакованы паза Хакасияның Писательлер пірігізінің кізілерін таныхтаан. Олар, мындағ литература марығларын иртіріп, наа аттар таапчалар, чииттернең чахсы тоғынчалар. Аннаңар Хакасиядағы Писательлер пірігізі араласчыларының саны чыл сай хозылча. Пу даа марығда, пастағызын на аралазып, ікінҷі орынға сыххан чиит автор Вероника Чертыкова. Ол Асхыс чоғархы аалдаң. Пастағы орынны алған писатель паза драматург, «Хакас чирі» газетаның хабарҷызы Илья Топоев. Ол хобый родынаңар кип-чоохтарны, чыып, алыптығ нымах оңдайынаң пас салған.
Сом Людмила Сазанаковани
Автор :
Торбай Пигенов
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде